Korrupsiyaçı məmurun müsadirə olunmuş əmlakı öz ailəsinə satılır - Şıxəliyev nümunəsi...
Şəmsəddin Əliyev: “Hesab edirəm ki, o cinayətin iştirakçıları sırasında hakimlər də var”
Uzun illər keçmiş Milli Təhlükəsizlik Nazirliyinin İstintaq Baş İdarəsinə rəhbərlik etmiş general-mayor Mövlam Şıxəliyevin həbsindən sonra müsadirə olunmuş əmlakı yenidən onun öz oğluna satılıb. Söhbət Novxanı kəndi, 685B ünvanında yerləşən, toplam sahəsi 1087 kvadratmetr olan bağ evindən gedir.
Məlum olub ki, satılan əmlakların alıcısı arasında M.Şıxəliyevin öz oğlu da var. Elvin Şıxəliyev Novxanı qəsəbəsində yerləşən bağ evlərini hərracda 1 milyon 174 min manata alıb. 2021-ci ildə sözügedən əmlakın üzərinə həbs qoyularkən bağ evi 1 milyon 305 min manat qiymətində dəyərləndirilmişdi.
Ümumiyyətlə, hansısa məmurun əmlakı müsadirə ediləndən sonra satışa çıxarılanda həmin əmlakın onun yaxınlarına və ya ailə üzvlərinə satılması nə dərəcədə doğrudur? Çünki bu cür hallarda ona görə əmlak müsadirə edilib satışa çıxarılır ki, o əmlakın alınması üçün qazanılan pulun mənbəyi şübhəlidir. Söhbət korrupsiya, kriminal və digər qanunsuz yollarla əldə edilən əmlakların müsadirə edilməsindən gedir. O baxımdan o əmlakı alan şəxsin özünün 1,3 milyon manat pulu haradandır? Adamın əgər əlində olan əmlakı, aldığı pulların mənbəyi kriminaldırsa, şübhəlidirsə, onu təkrar hərracda alarkən qazandığı pulun mənbəyi haradandır? Ona görə də, hətta qanunvericilik imkan versə də, o müsadirə olunmuş əmlakların ailə üzvlərinə satılması qadağan olunmalıdır. Çünki bu, ən azından, məntiqcə düzgün deyil.
“Belə qərarlar sosial ədalətin bərpasına yox, əksinə, sosial ədalətsizliyi bərpa etməyə yönəlib”
Sözügedən məsələ ilə bağlı fikirlərini “Bakı-Xəbər”lə bölüşən hüquqşünas Şəmsəddin Əliyev hesab edir ki, istər hüquqi, istərsə də məntiqi baxımdan korrupsiyada ittiham edilən məmurun müsadirə edilmiş əmlakının öz ailəsinə, yaxınlarına satılması düzgün deyil: “Bu çox ciddi məsələdir. Son zamanlar bəzi dövlət məmurlarının müəyyən mənada cəzasını çəkdikdən sonra hakimin təkrar qərarı ilə bunların cinayət yolu ilə əldə etdikləri əmlakın onlara qaytarılması sosial ədalətin bərpasına yox, əksinə, sosial ədalətsizliyi bərpa etməyə yönəlib. Azərbaycan Respublikasının Korrupsiya haqqında hüquqpozmalara dair normativ hüquqi aktı var. Həm də biz 2003-cü ildə Avropa Konvensiyasının korrupsiya ilə əlaqədar cinayət məsuliyyəti haqqında 1999-cu il konvensiyasına qoşulmuşuq. Orada bir sıra məqamlar öz əksini tapıb. O cümlədən də vəzifəli şəxslərin tutduqları vəzifədən öz şəxsi maraqları üçün sui-istifadə etməsi ilə əlaqədar cəzalar nəzərdə tutulub. Əslinə baxanda, dövlət məmurları ələ alınmamalıdır. Məmur belə hallara yol verirsə, bu, dövlətə xəyanətdir. Çünki dövlət məmurları, qulluqçuları vəzifəsinə başlamazdan öncə Azərbaycan Bayrağı qarşısında and içirlər. Məmurun korrupsiya yolu ilə əldə etdiyi əmlakın yenidən onun ailə üzvlərinin əlinə keçməsi hardasa onun cəzasız qalması anlamına gəlir. Hakimin qəbul etdiyi aktın əsas məqsədi sosial ədaləti bərpa etməkdən ibarətdir. Əgər burada doğrudan da sosial ədalət bərpa edilmirsə, deməli hakimin Azərbaycan dövləti adından qəbul etdiyi aktın heç bir mənası yoxdur. O, aciz bir görkəmdə cəmiyyətdə dolaşır. Ona görə də hesab edirəm ki, o cinayətin iştirakçıları sırasında hakimlər də var. Hüquqi məntiq baxımından cinayət yolu ilə əldə olunmuş əmlakın sonradan geriyə, o əmlakın sahibinə və yaxud onun ailə üzvlərinə qaytarılmasının özü də bir cinayətdir. Ən azından, 1,3 milyon manatlıq bağ evinin bu məbləği haradandır və necə qazanılıb? Dövlət qulluqçusu 20 il işləsə belə, maaşla bu əmlakı ala bilməz. Nəzərə almaq lazımdır ki, korrupsiya cinayətləri ehtiyatsızlıq üzündən baş vermir. Bu, bilərəkdən, qəsdən törədilir. Yəni vəzifəli şəxs nə etdiyini çox gözəl anlayır. Ona görə də bu məsələdə boşluqlara yol vermək olmaz”.
Vidadi ORDAHALLI
