QHT Gəncədə üç aylıq layihə həyata keçirir
“Kimsəsiz Uşaqların Sosial Müdafiəsi” İctimai Birliyinin təşkilatçılığı ilə Gəncə Uşaq Evində (sığınacaq) “Valideynlərini itirmiş və valideyn himayəsindən məhrum olmuş uşaqların psixoloji reabilitasiyası” adlı üç aylıq layihə həyata keçirilir. Layihənin donoru Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyidir. Layihə “Sağlam ruh, sağlam cəmiyyət naminə uşaqların psixoloji reabilitasiyası” adlı şüarla həyata keçirilir. On iki mövzu ətrafında həyata keçirilən reabilitasiya xidməti ixtisaslı psixoloq tərəfindən aparılır. Hər seans ayrı-ayrı mövzuları əhatə edir. Gəncə uşaq sığınacağında keçirilən bugünkü beşinci seansın mövzusu “art terapiya ilə uşaq və yeniyetmələrdə aşkar edilən travmaların korreksiyası” adlanır.
Art terapiya, digər adı ilə desək təsviri sənət terapiyası özündə rəsm, musiqi, hərəkət-rəqs, ədəbiyyat kimi sənət növlərini birləşdirir. Art terapiyanın əsas məqsədi fərdin özünü azad və rahat şəkildə ifadə etməsini, içində yığılıb qalmış hisslərini, duyğularını üzə çıxarmasını, yaradıcılığını daha da artırıb, estetik yönlərini ortaya çıxarmasını təmin etməkdir. Terapiya zamanı problemlərə birbaşa deyil, dolayı yolla toxunulur. Yəni yeniyetmə və uşaqlar adətən sıxılır, danışmaqdan imtina edir ya da danışdıqları ilə psixoloqu yanıltmağa çalışır və ya dolayı yolla daxili dünyasına enməyə icazə vermir, onu açmaqdan qorxur. Lakin, bu terapiya ilə sadalanan hallara daha estetik və yumşaq yanaşılır.
Art terpaiyada onu sübut etmək olur ki, bir şəkil min sözə bərabərdir. Art terapiya kiçik yaş qruplarında və yeniyetmələrdə yaxşı işləyən bir sistemdir. Ünsiyyət qura bilməyən uşaq və böyüklər üçün bu üsul xüsusilə yararlıdır. Art terapiyada istifadə olunan vasitələr müxtəlifdir. Rəngli qələmlər, rəngli karandaşlar, boyalar, divar boyası, rəngli təbaşirlər, barmaq-əl boyaları və s. art terapiyaya aid edilə bilər. Layihənin beşinci mövzusu olan “art terapiya ilə uşaq və yeniyetmələrdə aşkar edilən travmaların korreksiyası” adlı seansda bu üsullarla uşaqların psixoloji problemləri müşahidə edildi və aradan qaldırılması üçün tədbirlər görüldü.
