Baydenə prezidentlik yarışından çəkilməsi üçün təzyiqlər artır - 90 milyon dollarlıq yardım dayandırılır...
Noyabrda ABŞ-da keçiriləcək prezident seçkiləri dünya gündəmindən düşmür. Keçmiş prezident Donald Trampla prezidentlik yarışına girməyə hazırlaşan Demokrat namizəd Baydenin canlı yayımda rəqibi ilə debatından sonra yarışdan geri çəkilməsi ilə bağlı müzakirələr davam edir. Baydenə qarşı "namizədliyini geri çək" təzyiqləri də artır. "New York Times" qəzeti Baydenin namizədliyini geri götürmədiyi təqdirdə ona verilən 90 milyon dollarlıq ianə öhdəliyinin dayandırılacağını yazıb.
Qəztin məlumatına görə, bəzi tanınmış Demokrat donorlar, ABŞ Prezidentliyinə namizədliyini geri götürməsə, Bayden tərəfdarı olan ən böyük super PAC (siyasi fəaliyyət komitəsi) olan "Future Forward"a verdikləri 90 milyon dollarlıq ianə öhdəliyini dayandıracaqlar.
Adı açıqlanmayan mənbələrə görə, iyunun 27-nə keçən gecə Baydenin "fiasko" kimi xarakterizə edilən canlı yayım performansından sonra "Future Forward" mümkün alternativlərlə bağlı sorğu keçirib. Sorğuda Bayden vitse-prezident Kamala Harris, Kaliforniya qubernatoru Gavin Nevsom və Miçiqan qubernatoru Gretchen Uitmerin qarşısında "ən pis" seçim kimi dəyərləndirilib.
Siyasi komitə, Baydenin rəsmi olaraq namizəd kimi tanınacağı avqustun 19-da Çikaqoda keçiriləcək Demokratik Milli Konqresdən sonra noyabrda keçiriləcək seçkilərə qədər 250 milyon dollar dəyərində televiziya və rəqəmsal reklam planlaşdırdığını açıqlayıb. Qeyd olunur ki, sözügedən komitə və onun törəmə şirkətləri Baydenin seçki kampaniyası üçün indiyədək 430 milyon dollar ianə toplayıb.
Koloradodan olan Nümayəndələr Palatasının üzvü Brittani Pettersen Baydeni "yarışdan çəkilməyə" çağırıb, bu qrupa Kaliforniya nümayəndəsi Mayk Levin də qoşulub. "Yeni liderlə birlikdə hərəkət etməyin vaxtıdır" deyən Levin Baydenin yarışdan çəkilməsinə açıq çağırış edən Nümayəndələr Palatasının 19-cu Demokrat üzvüdür.
Demokratlar Partiyasının gənclərdən ibarət qrupu olan "Günəşin Doğuşu Hərəkatı" da yazılı açıqlama yayaraq Baydeni "məşəli yeni namizədə ötürməyə" çağırıb.
TAHİR
