Azərbaycandan imtina etdi, Ukraynaya "hə" dedi - bu da Yaponiya...
![Image](/uploads/posts/2024-07/yapon.webp)
Ramil Məmmədli: “Sözlə, eyni texnikanın Azərbaycana deyil, Ukraynaya verilməsi riyakar mövqedir, ikili standartlar şəkilində yanaşmadır”
Yaponiyanın Ukraynaya 4 ədəd minatəmizləmə maşını verməsi bu ölkənin Azərbaycanla bağlı qərarını növbəti dəfə gündəmə gətirib.
Azərbaycan bir müddət öncə Yaponiyaya minatəmizləmə maşını üçün müraciət etmiş, işğaldan azad edilmiş ərazilərin təmizlənməsində texniki yardım istəmişdi. Ancaq bildirilir ki, Yaponiya buna razılıq vermədi.
Bu, həm də Yaponiyanın elan etdiyi humanizm, insanlıq, təbiəti qoruma və digər çox mütərəqqi prinsiplərə zidd qərarıydı. Qarabağ dünyanın mina ilə çirklənmiş ən təhlükəli ərazilərinin başında gəlir. Yaponiya sadəcə minatəmizlənmə texnikası təqdim etməklə, mülki insanların həyatını xilas edə bilərdi. Niyə Ukraynaya olar, Azərbaycana yox?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, 1988-ci ildən başlayaraq Ermənistanın Azərbaycana qarşı aqresiyasının , işğalçılıq siyasətinin şahidi olmuşuq: “Bu işdə ona Qərbin böyük dəstəyi olub. Vaxtilə sülh danışıqları dövründə də Qərb siyasi dairələrinin Azərbaycanla bağlı verdikləri qərarlar hər birimizdə ikrah hissi doğururdu. Bütün bu addımlar, humanist dünya ictimaiyyəti tərəfindən riyakarlıq kimi təqdim olunurdu. Mən hesab edirəm ki, Yaponiyanın bu addımına da biz riyakarlıq kimi yanaşa bilərik. Bəllidir ki, mina təmizləmə fəaliyyəti iki istiqamətdə həyata keçirilir. Bunun biri hərbi strukturların həyata keçirdiyi, digəri isə humanitar mina təmizləmə işləridir. Təbii ki, Azərbaycan öz daxili imkanları hesabına bölgədə işğaldan azad olunan ərazilərdə mina təmizləmə işlərinin icrasını həyata keçirir. Bu istiqamətdə külli miqdarda vəsait xərclənir və kadr potensialının artırılması üçün müəyyən tədbirlər görülür. Azərbaycanlı mütəxəsisslərin bu istiqamətdə fəaliyyətləri yüksək səviyyədədir. Ancaq texnikaya, texnalogiyaya hər zaman ehtiyac duyulur. İndiki texnalogiyalar mina təmizləmə işlərini daha da yüngülləşdirir, rahat formada icrasını təmin edir. Azərbaycan bu istiqamətdə bir sıra ölkələrlə əməkdaşlıq edir. Təbii ki, Yaponiya da mina təmizləmə istiqamətində ixtisaslaşmış texnalogiyaların istehsalçıları arasında ön yerlərdən birini tutur. Çox təəssüf ki, Azərbaycanın bu məsələ ilə bağlı dünya ictimaiyyətinə etdiyi müraciətlər bir çox hallarda cavabsız qalır. Halbuki mina təmizləmə işi əslində humanitar bir layihədir, mülki vətəndaşların təhlükəsizliyinin təmin olunması istiqamətində atılan addımlardır. Əslində Yaponiyanın belə bir mövqe nümayiş etdirməsi gözlənilməz idi. Azərbaycana qarşı belə etməsini qeyri - səmimi addım hesab edirəm. Düşünürəm ki, Yaponiya siyasi dairələri, humanitar təşkilatları Azərbaycanla dostluqda maraqlıdırlar. Ancaq, Azərbaycana olan bu münasibət göstərir ki, Yaponiya da Qərbin bir parçası, müttəfiqi kimi Azərbaycana qarşı riyakar mövqeyini nümayiş etdirmək fikrindədir. Azərbaycana deyil, Ukraynaya belə texnalogiyaların verilməsi bu gün hər şeyi bəlli edir. Yaponiya Amerikanın sifarişlərini həyata keçirir. Azərbaycan isə heç məsələlərini bir ölkənin vasitəsi ilə deyil, birbaşa özüm. Bir sözlə, eyni texnikanın Azərbaycana deyil, Ukraynaya verilməsi riyakar mövqedir, ikili standartlar şəkilində yanaşmadır”.
Məhəmmədəli QƏRİBLİ