Heydər Əliyevin 1994-də Kasablankada başlatdığı Kəşmirə dəstək siyasəti davam edir - ən yeni olay...
![Image](/uploads/posts/2024-07/1720797285_aliyev.webp)
Bəhruz Quliyev: “Hindistanın heç bir arqumenti bu xalqın azadlığını məhdudlaşdırmağa yetərli deyil”
“Kəşmirdəki qardaşlarımızla hər zaman yan-yana olacağıq”. Bunu Prezidenti İlham Əliyev İslamabadda Pakistanın Baş naziri Məhəmməd Şahbaz Şərif ilə mətbuata bəyanatında deyib.
Ölkə başçısının fikrincə, biz hər işdə, istənilən beynəlxalq təsisat daxilində, hər beynəlxalq məsələdə bir-birimizi dəstəkləyirik: “Məsələn, irəli sürdüyümüz təşəbbüsdə qardaşlarımız bizi dəstəkləyir və eyni dəstək qarşılıqlı olur. Cəmmu və Kəşmir məsələsində bizim birmənalı dəstəyimiz qardaşlığımıza, eləcə də beynəlxalq hüquqa olan sadiqliyimizdir. Kəşmirlilərin hüquqları onilliklər boyu diqqətdən kənarda qalmış, pozulmuşdur. BMT Təhlükəsizlik Şurasının qətnamələri məsələnin necə həll olunmasını aydın şəkildə təsvir edir. Lakin əfsuslar olsun ki, BMT Təhlükəsizlik Şurasının qətnamələrinin icra mexanizmləri yoxdur. Ancaq qardaş və dost kimi biz Sizinlə, Kəşmirdəki qardaşlarımızla hər zaman yan-yana olacağıq, beynəlxalq hüququn və ədalətin tərəfində dayanacağıq. Mən əminəm ki, ədalət zəfər çalacaq”.
Onu da qeyd edək ki, Ümummilli Lider Heydər Əliyev 1996-cı ildə Pakistanda rəsmi səfərdə olarkən ölkənin baş naziri Benazir Bhutto ilə keçirdiyi mətbuat konfransında 1994-cü ilin dekabrında Kasablankada keçirilən toplantı ilə bağlı vacib məqamları xatırladıb: “Kəşmir problemi ilə əlaqədar Azərbaycan həmişə Pakistanın mövqeyini dəstəkləyib və bu gün də dəstəkləyir. Bu məsələ Kasablankada İslam Konfransı Təşkilatının toplantısında müzakirə olunarkən cürbəcür fikirlər vardı, ancaq Azərbaycan nümayəndə heyəti və şəxsən mən, Azərbaycan prezidenti Pakistanın mövqeyini nəinki müdafiə etdi, hətta Kəşmir problemi ilə əlaqədar Hindistanın pislənməsi və Pakistanın dəstəklənməsi haqqında qətnamənin qəbul olunmasında müəllif kimi iştirak etdi”.
Bütün bunların fonunda görünən odur ki, Heydər Əliyevin 1994- cü ildə Kasablankada başlatdığı Kəşmirə dəstək siyasəti bu gün də davam edir.
“O zaman olduğu kimi, bu gün də Prezident Əliyevin timsalında qardaş Pakistana verilən dəstək davam edir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Azərbaycanın Kəşmir məsələsində sərgilədiyi qətiyyət önəmli əhəmiyyət kəsb edir: “Pakistan Azərbaycanın dostu, xalqı isə bizim qardaşlarımızdır. İki xalq arasında münasibətlərin tarixi qədimdir və ən əsası səmimidir. Azərbaycan uzun illər SSRİ-nin tərkibində olub, amma bu, Pakistan-Azərbaycan münasibətlərini azalda bilməyib. Pakistanda hakimiyyətdə kimin olması da qardaşlığımıza zərrə qədər də təsir göstərməyib. Bir sözlə, hər zaman dostluq və qardaşlığımız daim yüksələn xətlə inkişaf edib. Hər iki ölkə bir-birinin ərazi bütövlüyünə hörmətlə yanaşıb və beynəlxalq təşkilatlarda da bir-birini dəstəkləyiblər. Həm də bu dəstək haqlı olub, ədalətə söykənib, beynəlxaq norma və prinsiplərdən kənara çıxmayıb. Bu da özündə onu ehtiva edir ki, Pakistan və Azərbaycan bütün beynəlxalq məsələlərin, qlobal problemlərin həllində yalnız ədalət prinsipini rəhbər tutur. Prezident İlham Əliyevin qardaş Pakistana səfəri, dövlət başçımızın qarşılanması, keçirilən görüşlər, müzakirə olunan məsələlər və verilən vədlər onu göstərir ki, iki ölkə arasında münasibətlər - iqtisadi, siyasi, humanitər, həmçinin hərbi əməkdaşlıq zamanın çağırışlarına və tələblərinə uyğun şəkildə qurulacaq”.
Politoloqun fikrincə, Pakistanda keçirilən görüşlərdə iki ölkə arasında əlaqələr, bir-birinə verilən dəstəyin yeni keyfiyyətləri üzərində fəaliyyət planına start verildi: “Bugünümüzə qədər ölkələrimiz beynəlxalq təşkilatlarda bir-birindən yetərincə dəstək alıblar. Amma Cammu və Kəşmir məsələsinin hələ də ədalətli həllini tapmayıb. Bu da onu göstərir ki, qarşıda görüləcək işlər çoxdur. Azərbaycanın mövqeyi açıq və dəyişməzdir, Cammu və Kəşmir Pakistanın ayrılmaz hissəsidir. Burada yaşayan yerli xalqın Hindistanla heç bir bağlılığı yoxdur, nə mənəvi, nə dini, nə dil baxımından. Kəşmirlilər uzun illərdir ki, Hindistanın işğalından qurtulmaq üçün mübarizə aparırlar. Beynəlxalq təşkilatlarda aparılan müzakirələrdə Hindistanın heç bir arqumenti bu xalqın azadlığını məhdudlaşdırmağa yetərli deyil”.
Siyasi analitik onu da əlavə etdi ki, Azərbaycanın müstəqilliyinin ilk illərindən Cammu və Kəşmir məsələsinə münasibəti birmənalı olub: “Ulu Öndər Heydər Əliyev 1996-cı ildə Pakistanda rəsmi səfərdə olarkən Kəşmir məsələsi ilə bağıə Azərbaycanın mövqeyini bəyan edib. 1994-cü ilin dekabrında Kasablankada keçirilən İslam Konfransı Təşkilatının toplantısındakı bəzi vacib məqamlara toxunub. Və bir daha təkrar edib ki, Kəşmir məsələsində Azərbaycan Pakistanın mövqeyini dəstəkləyir. Kasablankada Azərbaycan lideri Pakistanın mövqeyini nəinki müdafiə edib, hətta Kəşmir problemi ilə əlaqədar Hindistanın pislənməsi və Pakistanın dəstəklənməsi haqqında qətnamənin qəbul olunmasında müəllif kimi çıxış edib. O zaman olduğu kimi, bu gün də Prezident Əliyevin timsalında qardaş Pakistana verilən dəstək davam edir”.
Vidadi ORDAHALLI