Azərbaycan və Pakistan - güzəştli ticarət və 2 milyardlıq sərmayənin zamanı yetişdi...
Əli Əlirzayev: “Razılaşma ticarət dövriyyəsinin yaxın perspektivdə əhəmiyyətli dərəcədə artmasına təkan verəcək”
“Azərbaycan və Pakistan arasında ticarət güzəştli formatda olacaq”. Bunu Prezident İlham Əliyev İslamabadda Pakistanın Baş naziri Məhəmməd Şahbaz Şərif ilə mətbuata bəyanatında deyib.
Ölkə başçısının fikrincə, bu əsasla biz qarşılıqlı ticarətin həcmini birmənalı olaraq artıracağıq: “Yatıracağımız sərmayələrin ilkin həcmi, əziz qardaşımın qeyd etdiyi kimi, təxminən iki milyard dollardır. Biz energetika, infrastruktur, daşımalar və bir sıra digər sahələrdə, o cümlədən çox uğurla əməkdaşlıq etdiyimiz müdafiə sənayesində bir sıra layihələri artıq nəzərdən keçirdik. Beləliklə, biz güclü tərəfdaşlığı nəinki siyasi səviyyədə, o cümlədən iqtisadiyyat, ticarət və sərmayələr sahələrində də quracağıq. Baxın, bu gün nə qədər sənəd imzalandı. Biz həmin sənədlərin mübadiləsinin şahidi olduq. Onları mübadilə etmək çox vaxt apardı və təsəvvür edin ki, onların hazırlanması nə qədər vaxt tələb edib. Bu əsasla biz qarşılıqlı ticarətin həcmini birmənalı olaraq artıracağıq. Onlardan birini mən xüsusilə qeyd etmək istərdim. Bu, güzəştli ticarətlə bağlı sənəddir. Biz ilkin mərhələdə güzəştli ticarət formatına aid 9 maddəni müəyyən etdik. Lakin bu, yalnız başlanğıcdır”.
“İki ölkə arasında qarşılıqlı sərmayə qoyuluşunun artırılması iqtisadi dinamikliyi artıracaq”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı alim Əli Əlirzayev Azərbaycanla Pakistan arasında iqtisadi əlaqələrin genişləndirilməsini müsbət dəyərləndirdi: “Əvvəla, Pakistan bizim üçün çox yaxın qardaş ölkədir. İki ölkə arasında həm siyasi, həm də iqtisadi münasibətlər yüksək səviyyədədir. Ona görə də iqtisadi-ticarət əlaqələrini daha da genişləndirmək lazımdır. Ötən il iki ölkə arasında ticarət dövriyyəsinin həcmi 100 milyon dollar olub. Ancaq bu, Azərbaycanla Pakistan arasında mövcud olan potensiala adekvat deyil. Ona görə ki, tərəflər arasında potensial bundan qat-qat böyükdür. İki ölkə arasında güzəştli ticarət razılaşması ticarət dövriyyəsinin yaxın perspektivdə əhəmiyyətli dərəcədə artmasına təkan verəcək. Artıq bununla bağlı bir sıra işlər görülür. Məsələn, Azərbaycan Pakistandan idxal edilən düyüyə güzəşt tətbiq edir. 2022-ci ildə Nazirlər Kabinetinin Pakistan düyüsünə tətbiq etdiyi gömrük rüsumundakı güzəşt effekt verib. İdxalçılar Pakistandan 1 192 tonluq düyü idxal ediblər. Bu, ötən ilin eyni dövrünü 2 dəfədən çox üstələyir. Pakistan düyüsü ilə bağlı NK-nin qərarı 2022-ci ilin dekabrından qüvvəyə minib və 31 dekabr 2027-ci il tarixinədək idxal gömrük rüsumundan azad edilir. Pakistan həm də böyük bazardır. Ölkədə əhalinin sayı 240 milyon nəfərdən çoxdur. Bu isə o deməkdir ki, Azərbaycanda istehsal olunan bir sıra məhsullar orada satıla bilər. İki ölkə arasında qarşılıqlı sərmayə qoyuluşunun artırılması iqtisadi dinamikliyi artıracaq. Elə sahələr var ki, orada Azərbaycan, elə sahələr də var orada Pakistan böyük təcrübəyə malikdir. Ona görə də bütün bunlardan maksimum istifadə olunması hər iki ölkənin maraqlarına cavab verir”.
Vidadi ORDAHALLI
