"İslamabadı Bakıya oxşadacağıq" - Baş nazir paytaxtın baş planını belə təqdim etdi…
Azər Həsrət: “Azərbaycan paytaxtı daha modern, səliqəli olduğu üçün qonşu ölkələrin diqqətini cəlb edir”
“Biz bu cür planları bəzən İstanbuldan nümunə götürürdük, indi isə Bakıdan nümunə götürürük. İslamabadı Bakıya oxşadacağıq". Bu fikri Pakistanın Baş naziri Məhəmməd Şahbaz Şərif iyulun 11-də İslamabadda Azərbaycan Prezidenti İlham Əliyev ilə mətbuata bəyanatında deyib.
O bildirib ki, İslamabad Bakının formasında olacaq.
“Dost ölkə Pakistanın Azərbaycandan örnək götürməsi sevindirici haldır”
Bakı artıq qonşu ölkələr üçün nümunə, örnək kimi seçilir. Islamabadın Bakını nümunə seçməsinin əhəmiyyəti haqqında danışan siyasi şərhçi Azər Həsrət "Bakı-Xəbər"ə açıqlamasında qeyd etdi ki, dost ölkə Pakistanın Azərbaycandan örnək götürməsi sevindirici haldır. Eyni zamanda, bu hal Pakistanın özü üçün də uyğundur: "Azərbaycan və Pakistanın tarixin qədim dövrlərində bir-birinə bağlılığı olub. Uzun illər Pakistan türk coğrafiyasının bir parçası olub. Eyni zamanda, Pakistanla Azərbaycan arasında dostluq yaşanıb. Xarakter və millət olaraq da bir-birimizə bağlıyıq. Pakistanın baş naziri Məhəmməd Şahbaz Şərifin belə bir fikir səsləndirməsi təəccüblü deyil. Xatırladım ki, Məhəmməd Şahbaz Şərif bir müddət əvvəl Bakıda olarkən Azərbaycan prezidenti ilə görüşündə bildirmişdi ki, sizin şəhər çox gözəl tərtib olunub və biz sizdən örnək götürmək istəyirik. Bakının gözəlliyi, səliqəsi, quruluşu Pakistan şəhərləri üçün örnəkdir. İndinin özündə də onların bu fikiri təsdiqləməsi təsadüf deyil. Onlar yaxın təmasda bizimlə öz məsələlərini həll edə bilər".
Həmsöhbətimiz hesab edir ki, Azərbaycan paytaxtı daha modern, səliqəli olduğu üçün qonşu ölkələrin diqqətini cəlb edir: "Pakistanın İstanbulu deyil, Bakını seçməsinin məlum səbəbi var. Belə ki, İstanbulda sıxlığın yüksək səviyyədə olduğu hər kəsə bəllidir. Burda siyasi məna yoxdur. Nəzərə almaq lazımdır ki, Pakistanın qardaş ölkə Türkiyə ilə münasibəti yüksək səviyyədədir. Pakistan özlərinə uyğun Bakını seçib".
A.Həsrətin fikrincə, Azərbaycanda şəhər tikintisi ilə məşğul olan aidiyyəti şəxslər dost Pakistana bu məsələdə yardım edər və öz köməyimizi, dəstəyimizi göstərməliyik.
Günel CƏLİLOVA
