Türkiyə erməni təyyarəsinə yol vermədi, səbəb - şübhəli hərbi yük...
Tural İsmayılov: “Son dövrlər Türkiyə mətbuatında hava yolu ilə Ermənistana çox şübhəli yüklər daşındığı yazılır”
Türkiyə səmasını Avropadan Ermənistana uçan yük təyyarəsinin üzünə bağlayıb. Bu barədə erməni mətbuatı məlumat yayıb. “Hetq” yazır ki, iyulun 9-da Türkiyənin aviasiya rəsmiləri Efiopiya Hava Yollarına məxsus Boeing 777F yük təyyarəsinin onun hava məkanından uçmasına qadağa qoyub.
Nəşrin məlumatına görə, təyyarə Belçikanın Lyej şəhərindən havaya qalxıb və bir sıra Avropa ölkələrinin hava məkanından keçərək Bolqarıstandan Türkiyə hava məkanına daxil olmalı idi. Lakin Türkiyə tərəfdən icazə almadan Vyanada aralıq eniş edən təyyarə Lyjeyə qayıdıb.
Qeyd edək ki, Türkiyə dəfələrlə Ermənistana uçan təyyarələrə öz səmasını bağlayıb. Təbii ki, Türkiyənin bu addımları heç zaman əsassız olmayıb. Hər zaman bu məsələdə Türkiyə haqlı olub. Yadınıza gəlirsə, Türkiyə haqlı olaraq 2023-cü ildə İrəvanda Nemezis “əməliyyatı iştirakçılarına” qoyulan abidənin açılmasına etiraz edərək analoji addımı atıb. Hər dəfə Ermənistan tərəfdən şübhəli, qanunsuz bir davranış hiss ediləndə Türkiyə təhlükəsizlik məqsədilə belə halları gerçəkləşdirir.
Ekperstlər qeyd edir ki, Türkiyə bir neçə dəfə öz səmasından Ermənistan təyyarələrinin keçidinə qadağa qoyub, bunu da səbəbsiz etməyib.
2023-cü ildə Nemezis abidəsi açılanda da Türkiyə qadağa qoymuşdu. Ekspertlər hesab edir ki, indi baş verənlərin də səbəbləri mütləq var. Ekspertlərin fikrincə, görsənir ki, o təyyarədə Ermənistana şübhəli hərbi yüklər daşınırmış, bunu da Türkiyə tərəf bilib. Bu baxımdan, Türkiyə düz edib bu addımı atıb. Bu qadağanı qoyubsa, demək əsaslı şübhələr var. Bilirik ki, Fransa ilə Ermənistanın silah alveri var. Çox ehtimal ki, bunu ört-basdır etmək üçün fransızlar hərbi yüklərini Belçikadan yükləyib Ermənistana gətirə bilərlər.
Bu baxımdan, Türkiyə lazımı addımı atıb və səmasını Avropadan Ermənistana uçan təyyarənin üzünə bağlayıb...
“Ermənistana qanunsuz şəkildə silah-sursatın aparılması ilə bağlı ortada mövqelər mövcuddur”
Politoloq Tural İsmayılov “Bakı-Xəbər”ə “Əlbəttə, Türkiyənin tam hüququ var ki, öz hava məkanını lazım olanda Ermənistan daşımaları üçün qapatsın. Son dövrlər Türkiyə mətbuatında hava yolu ilə Ermənistana çox şübhəli yüklər daşındığı yazılır. Bütün bu yazılanlar Türkiyə rəsmilərinin uyğun addımlar atmasına səbəb olub. Sözün açığı, bu gün Ermənistana şübhəli yüklərin daşınmasından söhbət gedəndə yəqin ki, silah-sursat məsələsi xüsusi nəzərdə saxlanılır. Çünki Ermənistana qanunsuz şəkildə silah-sursatın aparılması ilə bağlı ortada mövqelər mövcuddur”-deyə bildirdi.
T.İsmayılovun sözlərinə görə, son dövrlərdə Fransanın Ermənistanı silahlandırması, eyni zamanda təyyarələrlə mənşəyi məlum olmayan yüklərin İrəvana tez-tez daşınması Türkiyədə haqlı şübhələr yaradır. “Türkiyə də bu şübhələr əsasında öz hava məkanını Ermənistana gələn təyyarələrin üzünə qapatmaq hüququna malikdir. Türkiyə bu məsələdə çox doğru addım atıb. Çünki bir məsələdə şübhə hökm sürürsə və eyni zamanda Ermənistan hakimiyyət orqanları Türkiyəyə “yüklərlə” bağlı aydın bir mövqe izah edə bilmirsə, Türkiyənin də tam haqqı var ki, öz hava məkanını Ermənistana gedən yük təyyarələri üçün qapatsın. Nəzərə almaq lazımdır ki, bu gün Türkiyə-Ermənistan münasibətlərinin yaxşılaşdırılması, Ermənistanla Azərbaycan arasında sülh bəlli dairələrin maraqlarına xidmət etmir, onlar prosesi pozmaq üçün əllərindən gələni edirlər”-deyə T.İsmayılov vurğuladı.
İradə SARIYEVA
