Xurafatın hədəfi – uşaq və gənclər!
![Image](/uploads/posts/2024-07/1691395423_474.webp)
Məlum olduğu kimi, iyulun 15-16-da Aşura mərasimləri keçiriləcək. Çox təəsüf olsun ki, bir sıra radikal dini qruplaşmalar insanların zərif mənəvi tərəflərindən, dini inanclarından sui-istifadə edərək öz mənfur və məkrli planları üçün yararlanmağa çalışırlar. Dini ayin adı altında yeniyetmə və gənclərin, ən dəhşətlisi isə körpə uşaqların məkrli planlara alət edilməsi qəti olaraq qəbuledilməzdir. Qeyd edək ki, Qafqaz Müsəlmanları İdarəsi və Dini Qurumlarla İş üzrə Dövlət Komitəsi hər dəfə Aşura günü ilə bağlı zəruri tövsiyələr verir, bildirirlər ki, Aşura günü islam dininə zidd əməllər həyata keçirmək qəbuledilməzdir. İctimaiyyət nümayəndələri və ilahiyyatçılar da məsləhət görürlər ki, Aşura günü qan çıxarmaq istəyənlər qanvermə aksiyasında iştirak etsinlər. Ümumiyyətlə, daha yaxşı olar ki, qocalar və uşaqlar evləri ziyarət edilsin, daha fərqli savab işlər görülsün. Ələlxüsus da, azyaşlı uşaqları bu cür mərasimlərə cəlb etməsinlər.
Heç kimə sirr deyil ki, Azərbaycanda bəzi radikal dini qruplar zaman-zaman vətəndaşları, o cümlədən gəncləri təsir dairələrinə salmağa cəhd göstərirlər. Ən dəhşətlisi odur ki, dini radikal qruplar geniş təbliğat işləri apararaq xüsusilə gəncləri öz sıralarına cəlb etməklə onlardan öz niyyətlərinin həyata keçirilməsində istifadə edirlər. Bu, ən təhlükəli və qorxunc haldır. Təəssüf doğuran digər məqam isə ondan ibarətdir ki, dini təriqətlərə qoşulanların çoxu, valideynlərinin və ya ətrafındakı radikal dindarların təhriki ilə təhsildən yayınırlar. Heç şübhəsiz ki, bütün bunlar gənclərin sonrakı həyatında öz mənfi nəticələrini göstərir. Gəncləri ibadət adı ilə məscidlərə yönəldib dini ibadət əvəzinə onların beyinlərini zəhərli təbliğatla doldururlar. Bu faktlar zaman-zaman mətbuatda hallanıb. Əslində İslam dini elm dinidir, cəhalət dini deyil. Hər kəsə gün kimi aydındır ki, İslam dini cəhalətin, təhsilsizliyin, elmsizliyin əleyhinədir. Qurani-Kərimdə də qeyd olunur ki, alimlə cahilin qiyməti bir deyil. Radikal dini qruplaşmalar gəncləri elm və təhsil əvəzinə din adı altında mənfur niyyətlərinə qurban edirlər. Cəhalət sürüsü hazırlamaq bunların başlıca məqsədidir. Əlbəttdə bu cür halların qarşının alınması təkcə Təhsil Nazirliyinin dairəsində olan məsələ deyil. Burada müxtəlif qurumlar, ictimai təşkilatlar, ümumən bütün cəmiyyət bu işlə məşğul olmalıdırlar. Bu istiqamətdə maarifləndirmə işləri həyata keçirilməlidir.
Bəli, bu gün müasir dövrdə gənclərin dini ekstremizmə cəlb olunması, onların müxtəlif vədlərlə aldadılıb terrorçuluğa yuvarlanmaları acı reallıqdır. Daima gözəl ənənələri, yüksək təhsil dəyərləri ilə seçilən Azərbaycan cəmiyyəti bu gün həmişəkindən daha ayıq-sayıq olmalıdır. Çünki xurafatın əsas hədəfi uşaq və gənclərdir...
Mətləb