Ətin, yumurtanın istehsalı artsa da, qiyməti düşmür - ancaq istehsal azalsaydı...
Akif Nəsirli: “İstehsal artsaydı, o zaman ölkəmizə ət idxalı azalmalıydı, lakin…”
2024-cü ilin yanvar-may aylarında Azərbaycanda quş əti də daxil olmaqla diri çəkidə 230,8 min ton ət, 915,1 min ton süd, 983,5 milyon ədəd yumurta, 11,4 min ton yun istehsal edilib. Açıqlanan statistik rəqəmlərə əsasən, 2023-cü ilin müvafiq dövrünə nisbətən ət istehsalı 1,7%, süd stehsalı 0,6%, yumurta istehsalı 7,1% artıb, yun istehsalı isə 2,6% azalıb.
Qeyd edək ki, 2024-cü ilin yanvar-may ayları üzrə kənd təsərrüfatının ümumi məhsulunun faktiki qiymətlərlə dəyəri 3352,4 milyon manat təşkil edib ki, onun da 2569,4 milyon manatı heyvandarlıq, 783 milyon manatı bitkiçilik məhsullarının payına düşür.
Maraqlıdır, istehsal artdığına görə ət, süd və yumurtanın qiyməti dəyişəcəkmi?
“Ölkə daxilində ət istehsalı artırsa, qiymət enməlidir, ancaq biz bu gün bunun əksini müşahidə edirik”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, qırmızı ət, toyuq əti, süd və digər məhsulların satış qiyməti günü-gündən artır: “Yumurta xaric, digər sadalanan məhsulların istehsalı elə də çox deyil. Ət məhsullarının istehsalı azalmaqda davam edir. Statistika Komitəsinin təqdim etdiyi məlumat həqiqət deyil. Ölkə daxilində ət istehsalı artırsa, qiymət enməlidir. Ancaq biz bu gün bunun əksini müşahidə edirik. Ölkədə çox olan məhsul niyə bahalaşmalıdır? Reallıqda ət istehsalı yetərli səviyyədə deyil. Ölkəmizdə ət qıtlığı var. Bu səbəbdən ətin qiyməti artır. Həmçinin onu da deyim ki, ət idxalı artır. İstehsal artsaydı, o zaman ölkəmizə ət idxalı azalmalıydı. Lakin gözlənildiyi kimi, ət idxalı azalmaq əvəzinə artmaqda davam edir. Ət istehsalının artması üçün heyvandarlıq inkişaf etməlidir. Heyvandarlığın inkişafı üçün isə örüş yerləri artmalıdır”.
Ekspert onu da bildirdi ki, digər məhsullarla müqayisədə yumurtanın satış qiyməti ucuzlaşıb. Bunun da səbəbi istehsalın artması ilə bağlıdır. Istehsal çox olanda, təbii olaraq qiymət də enir.
Günel CƏLİLOVA
