ABŞ alimi böhtan atdı - “Əliyev sazişi uzadacaq, ABŞ-da seçkiləri gözləyəcək”...
Ramil Hüseynov: “O, erməni lobbisindən bəsləndiyi üçün onların sifarişi ilə belə böhtançı mövqedən çıxış edir”
“Washington Examiner” jurnalı yazır ki, ABŞ prezidenti Co Baydenin komandası Co Baydenin “siyasi uzunömürlülüyünü” təmin etmək və onun səhhətinin qeyri-sabitliyi ilə bağlı söz-söhbətləri dağıtmaq üçün Ermənistan və Azərbaycan arasında sülh müqaviləsinin imzalanmasına hər cür səy göstərəcək.
Qeyd edilir ki, Amerika siyasətçiləri iyulun 9-dan 11-dək Vaşinqtonda NATO sammiti zamanı Ermənistanın baş naziri Nikol Paşinyana və Azərbaycan prezidenti İlham Əliyevə təzyiq göstərə bilər. Məqalənin müəllifi, American Enterprise Institute (AEI) əməkdaşı Maykl Rubin iddia edib ki, guya Prezident Əliyev Ermənistanla sülh sazişinin imzalanmasını ABŞ-da keçirilən prezident seçkilərinə qədər yubadacaq.
Maraqlıdır, Azərbaycanın dövlət başçısına yönəlik bu yalan, qərəzli fikir haradandır?
“Seçkidə Trampın, yoxsa Baydenin yenidən seçilməsinin bununla heç bir əlaqəsi yoxdur”
Sözügedən məsələ ilə bağlı fikirlərini “Bakı-Xəbər”lə bölüşən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, belə açıq iftira həmin şəxsin erməni lobbisi ilə bağlılığını ortaya qoyur: “Çünki müəllif M.Rubin yazıda açıq-aşkar ermənipərəstliyini, separatçıları himayə etdiyini və bütün bunlardan çıxış edərək qərəzli mövqe ortaya qoyduğunu nümayiş etdirir. Bəlli olur ki, o, erməni lobbisindən bəsləndiyi üçün onların sifarişi ilə belə böhtançı mövqedən çıxış edir. Yəni bu, məsələnin bir tərəfi. Məsələnin digər tərəfinə gəldikdə isə, Azərbaycan sülh sazişinin imzalanmasında niyə maraqlı olmasın ki? 2020-ci ilin 44 günlük Vətən müharibəsində biz ərazi bütövlüyümüzü təmin etdik. 2023-cü ilin sentyabrında keçirilən bir günlük antiterror əməliyyatı sayəsində suverenliyimizi tam təmin etdik. Delimitasiya prosesi çərçivəsində Qazaxın işğal altında olan 4 kəndi Azərbaycana qaytarıldı. Bütün bunlardan sonra Azərbaycan sülhdə niyə maraqlı olmasın ki? Seçkidə Trampın, yoxsa Baydenin yenidən seçilməsinin bununla heç bir əlaqəsi yoxdur. Əksinə, Bakıda keçiriləcək COP29 tədbiri çərçivəsində sülhün imzalanması Azərbaycanın maraqlarına cavab verir. Bu, ölkəmizin imicinə müsbət təsir edəcək. Başqa bir tərəfdən, Azərbaycan sülh sazişinin tezləşməsində ona görə maraqlıdır ki, kommunikasiya xətlərinin açılması prosesi sürətlənsin. Vacib tranzit ölkə olaraq bu, bizim üçün çox mühüm əhəmiyyət kəsb edir. Ən nəhayət, ABŞ-ın hazırkı hakimiyyəti sülh müqaviləsini tezləşdirmək hesabına Baydenin seçkidə qələbəsini təmin etməyə çalışır. Ancaq Bayden elə bərbad durumdadır ki, onu heç nə xilas edə bilməyəcək. Yəni onun seçkidə məğlub olacağı qaçılmazdır”.
Vidadi ORDAHALLI
