NATO-nun Vaşinqton sammiti və Azərbaycan məsələsi...
![Image](/uploads/posts/2024-07/nato.webp)
Mirkazım Seyidov: “Rusiya bilir ki, Azərbaycan, Ermənistandan fərqli olaraq, ikibaşlı siyasət yürütmür və bizim hansısa tədbirdə formal iştirakımızdan ona zərər gəlməz”
İyulun 9-dan 11-dək Vaşinqtonda NATO-nun yubiley sammiti keçiriləcək. Sammitə dəvətlilər sırasında Azərbaycan və Ermənistan da var. Ermənistan iştirakını əvvəlcədən təsdiqləsə də, Azərbaycanın rəsmi cavabı bir qədər gec gəldi.
XİN-dən verilən xəbərə görə, iyulun 9-da Xarici işlər naziri Ceyhun Bayramov Amerika Birləşmiş Ştatlarına işgüzar səfərə yola düşüb.
Səfər çərçivəsində, nazir Ceyhun Bayramovun ABŞ-nin paytaxtı Vaşinqton şəhərində keçirilən NATO Zirvə Görüşündə iştirakı, habelə bir sıra yüksək səviyyəli ikitərəfli görüşlərinin keçirilməsi nəzərdə tutulub.
Ceyhun Bayramovun belə bir tədbirdə iştirakı Azərbaycana nə verə bilər və bu, Rusiya ilə münasibətlərə təsir edə bilərmi?
Siyasi şərhçi Mirkazım Seyidov “Bakı-Xəbər”ə açıqlamasında bildirdi ki, NATO ilə ölkəmiz arasında əməkdaşlıq dayanmayıb, müxtəlif sahələrdə davam edir: “ İyulun 2-də Azərbaycan Ordusunun Baş Qərargah rəisi Kərim Vəliyev Bakıda NATO-nun Brunssum Birgə Qüvvələr Komandanlığının qərargah rəisinin müavini Stefan Fiks ilə görüşüb. K.Vəliyev Azərbaycan-NATO əməkdaşlığının bundan sonra da hər iki tərəf üçün faydalı olacağını, səmərəli görüşlərin davam etdiriləcəyini deyib.
Bəzi ekspertlər isə düşünür ki, Azərbaycanın NATO-nun Vaşinqtondakı sammitində iştirakı regionun digər oyunçuları – Rusiya və İranı qıcıqlandıra bilər.
Azərbaycanın bu tədbirdə iştirakı o demək deyil ki, biz anti-Rusiya koalisiyasında yer alacağıq.
Hazırda Qərblə əməkdaşlıq tərəfdarı olanlar Azərbaycanın sammitə qatılmasının vacibliyini bildirir. Azərbaycan Prezidenti İlham Əliyevin 2022-ci ilin 22 fevralında Rusiya prezidenti Putinlə imzaladığı “Müttəfiqlik qarşılıqlı fəaliyyəti haqqında Bəyannamə” var. Azərbaycan buna sadiqliyini nümayiş etdirir. Bu baxımdan da Rusiyanın incikliyi üçün ciddi əsas yoxdur.
Rusiya XİN isə Azərbaycan və Ermənistanın NATO sammitinə dəvətini “qonşu və dost ölkələri Rusiyadan uzaqlaşdırmaq” və “Amerikalıların öz dağıdıcı təsirlərini dünyanın hər bir bölgəsinə yaymaq cəhdi” kimi qiymətləndirərək, rəsmi Bakını və İrəvanı bu tədbirdən uzaq durmağa çağırıb. Bunlar rəsmiyyətdən irəli gələn addımlardır. Rusiyanın mövqeyi belə də olmalıdır. Rusiya bilir ki, Azərbaycan, Ermənistandan fərqli olaraq, ikibaşlı siyasət yürütmür və bizim hansısa tədbirdə formal iştirakımızdan ona zərər gəlməz”.
Məhəmmədəli QƏRİBLİ