QHT üç aylıq layihə həyata keçirir
“Kimsəsiz Uşaqların Sosial Müdafiəsi” İctimai Birliyinin təşkilatçılığı ilə Gəncə Uşaq Evində “Valideynlərini itirmiş və valideyn himayəsindən məhrum olmuş uşaqların psixoloji reabilitasiyası” adlı üç aylıq layihə həyata keçirilir. Layihənin donoru Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyidir. On iki mövzu ətrafında həyata keçirilən reabilitasiya xidməti ixtisaslı psixoloq tərəfindən aparılır. Hər seans ayrı-ayrı mövzuları əhatə edir. Gəncə uşaq sığınacağında keçirilən bugünkü üçüncü seans “uşaqlarda ünsiyyət bacarığının formalaşdırılması” mövzusunu əhatə edirdi.
Uşaqların inkişaf edən sosial bacarıqlarından biri də düzgün metodlarla qazanılmış ünsiyyətdir. Ünsiyyət uşaqların ən vacib tələbatlarından biridir. Ünsiyyət nitq vasitəsilə baş verir ki, burada da uşaq dörd nitq bacarığından istifadə edir: dinləmə, danışma, oxumaq və yazmaq. Gündəlik həyatda uşağın qarşılaşacağı sosial mövzularda, telefonla necə danışmaq lazımdır, insanlar bir- birinə niyə təşəkkür edir, birindən bir şey istəyərkən necə davranmalısan, xoşuna gəlməyən vəziyyətdə nə deməlisən və s. bu kimi tərzlərə həssaslıqla yanaşılıb uşağın ünsiyyəti düzgün şəkildə formalaşdırılmasına faydalı olacaq cavablar verməlisən. Əgər uşaq nitq vasitəsilə gördüklərini rəsmləri, hadisələri təsvir etməyi bacarırsa demək ki,onda məntiqi təfəkkür inkişaf edir.
Ekspertlər deyir ki, körpə yaşlarından dinləyici olan uşaqların nitqində laylalar, oxşamalar, nağıllar xüsusi yer tutur. Beyin hüceyrələrinin inkişafı dövrü uşaq anadan olandan 3 yaşınadək olan dövrdür. Uşaqlarda nitq 1,5 yaşlarından formalaşmağa başlayır. Bu yaşdan artıq uşaqların söz bazaları zənginləşməyə başlayır. Bunun üçün ailələr uşaqla yaşına uyğun oyunlar oynamalı, onlara hekayələr danışmalıdırlar. Nitqdə əgər hər hansı bir nöqsan nəzərə çarparsa, həkim, pedaqoq, psixoloq, loqopedə müraciət etmək lazımdır.
Uşaqların ünsiyyət bacarığının formalaşdırılmasına həsr olunan bu seansda uşaq evində yerləşən, seansda iştirak eliyən uşaqların nitqindəki qüsurlar, unsiyyət bacarıqları əvvəlcə müşahidə edildi, dərəcəsi müəyyən edildi, daha sonra isə onlar pedaqoq və loqopedə yönləndirildi.
