Qarabağ Universitetinə tələbə qəbulunu SABAH qrupları aparacaq? - Yenilik, ya anlaşılmazlıq?..
Vüsalə Ağabəyli: “Burda problemli və anlaşılmaz vəziyyət yoxdur”
Tələbələr Qarabağ Universitetinə Dövlət İmtahan Mərkəzinin qəbul imtahanları (I tədris ilinə), Elm və Təhsil Nazirliyinin SABAH qruplarına imtahan və müsahibələri əsasında (II tədris ilinə) cəlb ediləcəklər.
Bu barədə Prezident İlham Əliyev iyulun 5-də Xankəndi şəhərində Qarabağ Universitetində görülən işlərlə tanış olarkən Elm və təhsil naziri Emin Əmirullayev ölkə başçısına məlumatında bildirib.
Məlumatda bildirilir ki, Qarabağ Universitetinə birinci tədris ilində qəbul DİM-in imtahanları ilə, ikinci tədris ilində isə Elm və Təhsil Nazirliyinin Sabah qruplarının müsahibə və imtahanları ilə olacaq.
Bu necə ola bilər? Bu nə deməkdir? Bütün universitetlərə qəbul DİM-in keçirdiyi imtahanlarla həyata keçirldiyi halda, nə üçün Qarabağ Universitetinə tələbələr ikinci tədris ilində SABAH qruplarının müsahibəsi ilə qəbul ediləcək? Buna normal yanaşmaq olarmı? Bu yenilikdir, ya anlaşılmazlıq?
“Bu il digər universitetlərin I kurslarını bitirən və müsahibədə iştirak etmək istəyən tələbələr arasından seçim edilərək Qarabağ Universitetinin SABAH qruplarına cəlb ediləcək”
Filologiya üzrə fəlsəfə doktoru, dosent, elm və təhsil üzrə ekspert Vüsalə Ağabəyli “Bakı-Xəbər”ə şərhində bildirdi ki, bu nə yenilikdir, nə də anlaşılmazlıq, bütün ölkə ali məktəblərində proses bu cür gedir. “Burda problemli və anlaşılmaz vəziyyət yoxdur. Sadəcə olaraq, yəqin ki, çoxları yanlış anlayıb. Açıqlama üçün deyim ki, SABAH qruplarına Elm və Təhsil Nazirliyinin tabeliyində olan ali təhsil müəssisələrində müəyyən edilmiş ixtisaslar üzrə I kursda əyani formada təhsil alan, I tədris ilinin I semestrinin nəticələrinə görə akademik borcu olmayan və orta müvəffəqiyyət göstəricisi 61-dən aşağı olmayan tələbələr müraciət edə bilər. SABAH qruplarına tələbə qəbulu mərkəzləşdirilmiş qaydada üç mərhələdən ibarət olmaqla müsabiqə yolu ilə (akademik göstəricilərin qiymətləndirilməsi, test imtahanı və müsahibə) elektron proqram təminatı tətbiq olunmaqla həyata keçirilir. Qarabağ Universiteti yeni yaradılmış universitet olduğu üçün hazırda I kurs tələbələri yoxdur. Ona görə də, bu il digər universitetlərin I kurslarını bitirən və müsahibədə iştirak etmək istəyən tələbələr arasından seçim edilərək Qarabağ Universitetinin SABAH qruplarına cəlb ediləcəklər”-deyə V.Ağabəyli qeyd etdi.
V.Ağabəylinin sözlərinə görə, növbəti il isə Qarabağ Universitetinin I kurs tələbələri də digər universitetlərin tələbələri kimi müsahibədə iştirak edə biləcəklər. “Yəni istənilən halda, SABAH layihəsində ali təhsil müəssisələrinə DİM yolu ilə qəbul olunmuş tələbələr müsabiqədən keçmək üçün müraciət edə bilər. Tələbə üçün mobil təhsil sistemi, keyfiyyətli təhsil mühiti yaratmaq üçün SABAH layihəsi, əslində, uğurlu layihədir. Deyək ki, tələbə BSU-da I kursda oxuyur, SABAH müsabiqəsinə müraciət edib, eyni ixtisas üzrə II kursu ADPU-da SABAH qruplarında iştirak edə bilər. Eləcə də, Qarabağ Universitetində”-deyə V.Ağabəyli qeyd etdi.
İradə SARIYEVA
