“Ağıllı kənd” layihəsi Türk dünyasında qəbul olundu - iqlimə davamlı kəndlər forumu başlayır...
Vüqar Bayramov: “İmzalanan Qarabağ bəyannaməsi qeyd edilən sahədə əməkdaşlığın genişləndirilməsinə xidmət edəcək”
İyulun 6-da Şuşada “Türk Dövlətləri Təşkilatının qeyri-rəsmi Zirvə görüşünün Qarabağ Bəyannaməsi” imzalanıb. Bəyannamədə bir sıra məsələlər yer alıb. O cümlədən, İqlimə Davamlı Kəndlər Forumunun yaradılması üzrə müzakirələrin aparılması təşəbbüsü irəli sürülüb.
Bildirilib ki, günəş, külək və su elektrik enerjisi kimi təmiz enerji mənbələrinin inteqrasiyasına diqqət yetirməklə dayanıqlı inkişafın təşviq edilməsi və rəqəmsal infrastruktur, ictimai xidmətlər və dayanıqlı təcrübələrin təkmilləşdirilməsi yolu ilə həyat keyfiyyəti yaxşılaşdırılmalıdır. İqtisadi artımı gücləndirmək, iqlim fəaliyyətini dəstəkləmək üçün türk dövlətləri çərçivəsində “ağıllı şəhər və kəndlər” konsepsiyasının iqlimə davamlılığının inkişafının təşviqi və bu xüsusda TDT-nin İqlim və Yaşıl Rəqəmsal Platformasının və TDT-nin İqlimə Davamlı Kəndlər Forumunun yaradılması üzrə müzakirələr aparılmalıdır.
“Yaşıl enerji, şəhərsalmanın inkişafı baxımından “ağıllı şəhər və kəndlər” konsepsiyasının iqlimə davamlılığının inkişafının təşviq edilməsi olduqca əhəmiyyətlidir”
Millət vəkili Vüqar Bayramov “Bakı-Xəbər”ə şərhində bildirdi ki, Azərbaycan regionda “ağıllı kənd”, “ağıllı şəhər” konsepsiyasını tətbiq edən ilk ölkədir: “Bu konsepsiya inkişaf etmiş ölkələrdə artıq tətbiq edilib. Şərqi Zəngəzur və Qarabağda məhz “ağıllı kənd” prinsipinə uyğun olaraq yaşayış məntəqələrinin salınması həyata keçirilir. Şərqi Zəngəzurda Ağalı kəndi, Qarabağda - Füzuli rayonunun Dövlətyarlı kəndində “ağıllı kənd” layihəsi tətbiq edilib. Bu səbəbdən də belə bir təcrübənin digər türk dövlətləri ilə birləşdirilməsi vacibdir. Ümumiyyətlə, şəhərsalma sahəsində əməkdaşlığın gücləndirilməsi çox vacibdir. Bu səbəbdən də Şuşada imzalanan Qarabağ bəyannaməsi qeyd edilən sahədə əməkdaşlığın genişləndirilməsinə xidmət edəcək. Eyni zamanda, türk dövlətləri arasında yaşıl enerji zonasının inkiişaf etməsinə də səbəb olacaq. Yaşıl enerji, şəhərsalmanın inkişafı baxımından “ağıllı şəhər və kəndlər” konsepsiyasının iqlimə davamlılığının inkişafının təşviq edilməsi olduqca əhəmiyyətlidir”.
Günel CƏLİLOVA
