Avropa Birliyi Ermənistana “Sülh Fondundan”, Azərbaycana qeyri-fondlardan yardım qərarı verdi - niyə?..
Təbriz Musayev: “Problem ondadır ki, məqsədyönlü şəkildə Ermənistanı himayə edirlər”
Macarıstan Avropa İttifaqının Ermənistana ilk hərbi yardımına veto qoymağı dayandırıb. Avropa İttifaqının diplomatik mənbələri “Azadlıq Radiosu”nun Ermənistan bölməsinə belə bir məlumat ötürüblər.
Məlumatda qeyd edilir ki, aylarla davam edən müzakirələrdən sonra 27 dövlətdən ibarət blok bu ilin əvvəlində Aİ tərəfdaşlarının müdafiə qabiliyyətini artırmaq üçün nəzərdə tutulmuş xüsusi fond olan Avropa Sülh Fondundan 10 milyon avro (təxminən 11 milyon dollar) dəyərində “qeyri-öldürücü” yardımı təsdiqləyib. Bu vəsait növbəti iki il yarım ərzində səhra hospitalının və taborluq erməni ordusu bölməsi üçün yardımçı obyektlərin yaradılmasına sərf ediləcək. Vəsait Aİ-nin bütün üzv dövlətlərinin yekdil dəstəyi ilə ayrılır.
Apreldə Macarıstan bu qərarın qəbuluna veto qoymuşdu. Bildirmişdi ki, Ermənistana yardım edilirsə, Azərbaycana da analoji yardım ayrılmalıdır. Erməni mediasına o da bildirilib ki, iyulun 1-də Aİ-nin dönəmli sədrliyini təhvil alan Budapeşt sonradan digər Avropa ölkələri ilə kompromis razılaşmasının bir hissəsi kimi vetodan imtina etməyə razılaşıb. Həmin müqaviləyə əsasən, Aİ Azərbaycanda minatəmizləmə fəaliyyətini başqa mənbədən maliyyələşdirəcək. Yəni Avropa Sülh Fondundan yox, digər mənbədən maliyyələşəcək.
Göründüyü kimi, Aİ Azərbaycana münasibətdə ayrıseçkilik edir. Ermənistana həmin yardım birbaşa Sülh Fondundan edilsin, Azərbaycana isə başqa fondlardan. Nəyə görə belə olmalıdır? Bu günlərdə Brüsseldə Avropa İttifaqı-Azərbaycan təhlükəsizlik dialoqunun beşinci iclasında Prezidentin xarici siyasət üzrə köməkçisi Hikmət Hacıyev də iştirak edib. Həmin tədbirlə bağlı məlumatda qeyd edilir ki, Sülh Fondu çərçivəsində gələcəkdə Azərbaycanla Aİ arasında əməkdaşlıq açılsın. Belə olan halda niyə Ermənistana Sülh Fondu vasitəsi ilə, Azərbaycana isə başqa fondlar vasitəsi ilə yardım edilir? Halbuki, sülh istəyən ölkə Azərbaycan, sülh müqaviləsindən yayınan ölkə Ermənistandır. Müharibəni törədən, yaşayış məntəqələrimizi məhv edən ölkə Ermənistandır. Ən nəhayət, Macarıstanın bu məsələdə güzəştə getməyi bir qədər qəribə görünür. Doğurdanmı Budapeşt bu məsələdə güzəştə gedib?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, bütün bunlar Avroittifaqın Azərbaycana münasibətdə necə ədalətsiz siyasət yeritdiyinin növbəti göstəricisidir: “Əvvəla, təcavüzə məruz qalan tərəf Ermənistan yox, Azərbaycan olub. Azərbaycanın 20 faizə yaxın ərazisi 30 ilə yaxın işğal altında olub. Ətraf 7 rayonda bütün yaşayış məntəqələri məhv edilərək xarabalığa çevrilib. Onların bərpa edilməsi üçün milyardlarla vəsaitə ehtiyac var. Digər tərəfdən, Ermənistan işğal dövründə, 44 günlük müharibə və ondan sonrakı dövrdə ərazilərimizi kütləvi şəkildə minalayıb. Minalanmış ərazilərin dəqiq xəritələrini vermir. Bu da işi xeyli çətinləşdirir. Məgər bütün bunları Avropa İttifaqı bilmir? Məgər bilmirlər ki, ərazilərimiz minalandığı üçün Azərbaycanın yardıma ehtiyacı var? Məgər bilmirlər ki, xaraba qoyulan kəndlərin bərpası üçün olduqca böyük vəsaitlərə ehtiyac var? Hər şeyi çox gözəl bilirlər. Sadəcə bu reallıqları görmək istəmirlər. Problem ondadır ki, məqsədyönlü şəkildə Ermənistanı himayə edirlər. Xristian amilindən çıxış edirlər. Ermənistanı yenidən dirçəltməyə, gücləndirməyə çalışırlar. Siyasi ironiyaya bax ki, təcavüzə məruz qalan ölkə qalır kənarda, işğalçı ölkəyə Sülh Fondundan vəsait ayrılır. Buna heç vaxt ədalətli izahat vermək olmaz. Bunun adı siyasi riyakarlıqdır. Onu da Avroittifaq edir. Macarıstana gəldikdə isə, çox güman bu ölkəyə Aİ müstəvisində güclü təzyiq edilib. Ancaq buna rəğmən Macarıstan birtərəfli güzəştə getməyib. Başqa fondlardan Azərbaycana yardım müqabilində, Sülh Fondundan Ermənistana yardıma razılıq verib”.
Vidadi ORDAHALLI
