Şanxay ölkələrinin Azərbaycana COP29 dəstəyi aktual gündəmə çevrildi...
Mətin Məmmədli: “Belə bir təşkilatın COP29-a hazırlıq mərhələsində ölkəmizə siyasi və mənəvi dəstəyi bizim üçün böyük əhəmiyyət daşıyır”
“Biz Bakıda keçiriləcək COP29 çərçivəsində inkişaf etmiş və inkişaf etməkdə olan ölkələr arasında körpü yaratmaq üçün səylərimizi əsirgəməyəcəyik və inkişaf etməkdə olan ölkələrin legitim maraqlarını nəzərə alacaq razılaşmanın əldə edilməsinə çalışacağıq”. Bu fikri Azərbaycan Prezidenti İlham Əliyev iyulun 4-də Qazaxıstanın paytaxtı Astana şəhərində keçirilən “ŞƏT plyus” formatında görüşdə çıxışında deyib.
Prezident Əliyev bildirib ki, Azərbaycanın prioritetləri sırasında həm də iqlim dəyişikliyinin mənfi təsiri səbəbindən ekzistensial təhlükə ilə üzləşən inkişaf etməkdə olan kiçik ada dövlətlərinə dəstək yer alır. Azərbaycan inkişaf etməkdə olan kiçik ada dövlətləri üçün xüsusi texniki yardım fondunun yaradılması təşəbbüsü ilə çıxış edib.
“Biz dünyada ən böyük beynəlxalq tədbir olan COP29-un keçirilməsinə hazırlıq istiqamətində ŞƏT ilə işi davam etdirəcəyik”, - deyə Prezident İlham Əliyev vurğulayıb.
Prezident bəyan edib ki, biz inkişaf etməkdə olan ölkələrin legitim maraqlarını nəzərə alan razılaşmanın əldə olunmasına çalışacağıq.
Prezidentin bu fikri olduqca maraqlıdır.
İnkişaf etməkdə olan ölkələr əsasən Şanxay Əməkdaşlıq Təşkilatının (ŞƏT) üzvü olan ölkələr və Qoşulmama Hərəkatına üzv olan dövlətlərdir. Prezidentin bu fikri əslində yaşıl enerjiyə keçid mərhələsində inkişaf etməkdə olan ölkələrin mənafelərinin müdafiəsinə yönəlmiş bir tezisdir.
Şanxay Əməkdaşlıq Təşkilatı COP29-un hazırlıq mərhələsində nə kimi dəstəklər verə bilər?
“Bütün ölkələr ölkəmizə bu məsələdə ciddi dəstək verir”
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli “Bakı-Xəbər”ə şərhində “Ölkə başçısının bu fikirləri həm də onu sübut edir ki, Azərbaycan beynəlxalq arenada yalnız özünün deyil, digər ölkələrin də haqlı maraqlarını, haqlı mövqeyini müdafiə edir, bunu ən yüksək kürsülərdə səsləndirir. Təəssüf ki, dünyamızda ədalətsizlik hökm sürür. Bu istər siyasətdə, istər iqtisadiyyatda, istər resursların bölgüsündə, onların istifadəsində olsun, yəni bu ədalətsizlik var. Hər zaman Azərbaycan dövləti tərəfindən də belə ədalətsizliyin olduğu qeyd olunur”-deyə bildirdi.
M.Məmmədlinin sözlərinə görə, biz dövlət olaraq həmişə çalışırıq ki, inkişaf etməkdə olan ölkələrin də haqlı, legitim maraqları və mənafeləri təmin olunsun. “Düşünürəm ki, Azərbaycan COP29 tədbirinə ev sahibliyi etməklə həm də bu məsələdə fikirlərini, mövqeyini təmin etmək imkanları əldə edib. COP29 tədbirinə ev sahibliyi etməklə eyni zamanda bu problemə diqqəti yönəltmək imkanına sahiblənib. Cənab Prezident də məhz Şanxay Əməkdaşlıq Təşkilatın sammitində bu məsələ ilə bağlı fikirlərini səsləndirib”-deyə M.Məmmədli qeyd etdi.
“Məlum olduğu kimi, ŞƏT dünyada ən böyük təşkilatlardan biridir. Yəni bu təşkilata dünyanın bir çox dövlətləri, regional ölkələri daxildir. Məsələn, Çin dünyanın siyasi, iqtisadi sahədə nəhənglərindən biridir. Bu təşkilatın da əsas yaradıcısı məhz bu ölkədir. Eyni zamanda Rusiya, İran, kimi dövlətlər, Mərkəzi Asiya ölkələri, türk dövlətləri ŞƏT-də təmsil olunurlar. Baxsaq görərik ki, son illərdə bu təşkilata maraq daha da artıb. Təbii ki, belə bir təşkilatın COP29-a hazırlıq mərhələsində ölkəmizə siyasi və mənəvi dəstəyi bizim üçün böyük əhəmiyyət daşıyır”-deyə bildirən M.Məmmədli qeyd etdi ki, bu ilin noyabrında Azərbaycan böyük bir tədbirə ev sahibliyi edəcək. “Belə ciddi bir prosesdə ŞƏT kimi böyük bir təşkilat tərəfindən verilən dəstəyin həqiqətən də bizim üçün çox böyük əhəmiyyəti var. Bunun həm siyasi, həm də mənəvi əhəmiyyəti danılmazdır. Düşünürəm ki, bu tədbirin uğurla baş tutmasında ŞƏT kimi təşkilatların, böyük dövlətlərin dəstəyi vacibdir. Astanada keçirilən sammitdə də verilən mesajlardan aydın olur ki, ŞƏT, bu təşkilata daxil olan böyük dövlətlər, bir sözlə bütün ölkələr ölkəmizə bu məsələdə ciddi dəstək verirlər”-deyə M.Məmmədli bildirdi.
İradə SARIYEVA
