"Halal hotellər"in digərlərindən fərqləri...
Hazırda turizm sənayesinin ən çox yayılmış formalarından biri də halal istirahət mərkəzləridir. Qeyd edək ki, Türkiyədə ilk ixtisaslaşdırılmış halal otel şəbəkələri 2000-ci illərin əvvəllərində fəaliyyətə başlayıb və bu illər ərzində ölkədə yüzlərlə halal otel açılıb. Bu, Türkiyədə daxili turizmə böyük dəstək verib. Halal turizm Türkiyədə orta qiymət səviyyəsində xidmət göstərir.
Qeyd edək ki, Azərbaycanda da “halal hotel” şəbəkəsi yaranacaq. Dövlət Turizm Agentliyinin yaydığı məlumatda qeyd edilir ki, beynəlxalq təcrübə əsasında halal turizm xidmətləri üzrə yeni dövlət standartı qəbul olunduqdan sonra turizm obyektlərinə "halal hotel" sertifikatı veriləcək: “Hotellər maraqlı olduğu təqdirdə halal sertifikatlaşmadan keçib, özlərini müştərilərinə "halal hotel" kimi təqdim edə biləcəklər”.
Azərbaycan Standartlaşdırma İnstututu halal turizm xidmətləri üzrə yeni dövlət standartı hazırlamaqdadır.
Ekspertlər hesab edir ki, bu il qəbul edilməsi nəzərdə tutulan standart Azərbaycanda turizmin inkişafına xüsusi töhfə verəcək.
Maraqlıdır, Azərbaycanda “halal otel” standartına uyğun fəaliyyət göstərən məkanlar varmı? Ümumiyyətlə, Azərbaycanda halal turizmi necə inkişaf etdirmək olar?
Elçin Rüstəm: “Azərbaycanda otellərdə halal standartlarının tətbiqi islam ölkələrindən gələn turist axını ilə əlaqədardır”
Turizm sahəsi üzrə ekspert Elçin Rüstəm “Bakı-Xəbər”ə açıqlamasında bildirdi ki, halal standartı ilə fəaliyyət göstərən otellərdə qadınlar və kişilər üçün ayrıca hovuz, namaz otağı olmalı, alkoqollu içkilər olmamalı, verilən yeməklər halal standartı ilə istehsal edilən məhsullardan hazırlanmalıdır: “Gələcəkdə yeni otellər inşa olunanda sahibkarlar öz yerləşdirmə obyektlərini halal standartları əsasında qura bilərlər. Hazırkı otellərin bu tipdə qurulması üçün isə sahibkarlara əlavə sərmayə lazımdır. Ona görə də bu standartları həyata keçirmək o qədər də asan məsələ deyil. Azərbaycanda otellərdə halal standartlarının tətbiqi islam ölkələrindən gələn turist axını ilə əlaqədardır”.
Həmsöhbətimiz onu da əlavə etdi ki, dünyada “dini turizm" deyilən bir başqa turizm də var ki, bu, halal turizmdən tamamilə fərqlidir: “Dini turizmlə səfər edənlər ildə bir dəfə müxtəlif müqəddəs şəhərlərə, İranın, İraqın şəhərlərinə səfər edirlər. Bu başqa dinlərdə də var. Məsələn, dini məqsədlə Romaya, Qüdsə səfərlər təşkil edilir. Amma dediyimiz kimi, bu dini turizmdir”.
Ceyhun Aşurov: “Bazarda “halal hotel” standartına tələbat var”
Turizm eksperti Ceyhun Aşurov hesab edir ki, bazarda “halal hotel” standartına tələbat var: “Azərbaycana gələn turist seqmentinin bir hissəsi müsəlman ölkələridir. Onların da rahat qala biləcəkləri və tələbatlarına uyğun yerlərin olmasına ehtiyac var. Bu həm də turizm məhsullarının çeşidlənməsi deməkdir. Düşünürəm ki, bu cür çeşidlənmə müştərilərin tələbatının ödənilməsinə görədir. Hazırda Bakı şəhərində və regionlarda bir neçə otel özlərini bu cür mövqeləndirərək təqdim edir. Burada riayət olunması gərəkən müəyyən kriteriya və standartlar var. Bu addımlar turizm məhsullarının çeşidləndirilməsinə xidmət edir”.
Günel CƏLİLOVA
