Bu portal bir evi dəfələrlə satan MTK-ların "nəfəsini kəsəcək"...
İlqar Hüseynli: “Bütün bunların qarşısının alınması nəzərə alınacaqsa və bu yöndə təkmilləşmə aparılacaqsa bunu yalnız təqdir edə bilərik”
Azərbaycanda daşınmaz əmlakın sənədləşdirilməsi ilə bağlı vahid elektron portal hazırlanır. Bununla bağlı İqtisadiyyat Nazirliyi yanında Əmlak Məsələləri Dövlət Xidmətindən məlumat verilib. Məqsəd evlərin sənədləşdirilməsində bütün proseslərin həmin portal vasitəsilə tam elektronlaşdırması və rəqəmsal idarəetmə yaratmaqdır.
İqtisadiyyat Nazirliyinin Əmlak Məsələləri Dövlət Xidməti yanında Daşınmaz Əmlakın Dövlət Kadastrı və Reyestrinin İdarə Heyətinin sədr müavini Elşad Məmmədovun sözlərinə görə, hazırda nəzərdə tutulan informasiya vasitəsində mənzillərlə bağlı xüsusi modul yaradılacaq ki, bu da tikinti şirkətləri binanı tikməyə başladığı andan etibarən həmin binanın elektron imitasiyasını sistemləşdirəcək:
"Belə olan halda bir mənzilin iki və ya daha artıq şəxsə satılması hallarının da qarşısı alınacaq. Sözügedən portalın təşkili sənədsiz evlərlə bağlı problemi də həll edəcək".
Bildirilir ki, belə olan halda bir mənzilin iki və ya daha artıq şəxsə satılması hallarının da qarşısı alınacaq. Bu məsələdən çox adam əziyyət çəkirdi. Portal doğrudanmı bu problemi aradan qaldırmaq gücünə sahib ola bilər?
Sosial Strateji Tədqiqatlar və Analitik Araşdırmalar Birliyinin sədri İlqar Hüseynli “Bakı-Xəbər”ə açıqlamasında bildirdi ki, elektron hökumətə keçid prinsip etibarı ilə insanlara yaxşı imkanlar yaradır: “Bu həm vaxt baxımdan, həm də digər amillərə görə rahatlığa səbəb olur. Bəzi hallarda əmlakın özəlləşməsi ilə bağlı ciddi problemlər yaranır. Hansısa qurumdan sənəd almaq müşkülə çevrilir. Bu baxımdan elektron portalın yaradılması gözəldir. Rəqamsallaşmanın üstün tərəflərini burada görəcəyik. Burada bir neçə amil var ki, insan faktoruna söykənir. Elektron portala mülkiyyətin kimə məxsus olduğunu müəyyən edən sənədlər tələb ediləcək. Hansısa torpaqda vətəndaş birotaqlı ev tikibsə və sonra onu böyüdüb ikimərtəbə edibsə, mütləq mənada həmin birotaqlının sökülməsini notarial təsdiq edən sənəd lazımdır ki, ikinciyə sənəd versinlər. Bütün əmlakların sputniklə çəkilişi aparılır. Məncə, əmlakı qeydə almaq üçün bu bəs edir. Əvvəlkinin sökülməsini təsdiq edən sənədə nə ehtiyac var? Maraqlıdır, bu tpili məsələləri elektron portal necə həll edəcək? Hədəfimiz o deyil ki, bu portalın fəaliyyətində problemlərin olacağını deyək. Bir evin bir neçə adama satılması da insan faktoruna söykənən məsələdir. Zamanında hansısa şirkət öz tikdiyi mənzili bir neçə adama satıbsa, o zaman portala yalnış məlumatlar daxil edilə bilər. Burada məsuliyyət portalın deyil, bir mənzili bir neçə adama satan şirkətin olacaq. Bir az da incələmək lazımdır ki, portalın xüsüsiyyətləri nədən ibarət olacaq. Bütün bunların qarşısının alınması nəzərə alınacaqsa və bu yöndə təkmilləşmə aparılacaqsa bunu yalnız təqdir edə bilərik. Çox gözəl olardı ki, bunu zamanında tətbiq edərdilər. Çünki belə əməllərdən çoxlu sayda adam əziyyət çəkib. Hər halda, izləyək və görək portal hansı effekti verir”.
Məhəmmədəli QƏRİBLİ
