Azərbaycan ABŞ-ın regionda sülh fəaliyyətini yüksək qiymətləndirir
Artıq dünyada qəbul olunur ki, Cənubi Qafqazın firavan və dinc gələcəyi naminə Ermənistan və Azərbaycan arasında barışığın əldə edilməsi zəruri xarakter daşıyır. Belə mövqedə olan dövlətlərdən biri kimi ABŞ Azərbaycana və onun regionda tutduğu mövqeyə hörmətlə yanaşır.
Hazırda Vaşinqton qəbul edir ki, Cənubi Qafqazın ən güclü və inkişaf etmiş ölkəsi kimi Azərbaycanın iştirakı olmadan regionda hər hansı bir layihənin icra edilməsi mümkün deyil.
Bütün bunlar fonunda o da bəllidir ki, ABŞ Ermənistan və Azərbaycan arasında sülh əldə edilməsi istiqamətində son günlərdə olduqca aktiv fəaliyyət həyata keçirir. ABŞ Dövlət Departamentinin sözçüsü Vedant Patel yenidən bu məsələyə toxunaraq bildirib ki, Birləşmiş Ştatlar gələn həftə Vaşinqtonda NATO sammiti çərçivəsində Azərbaycan-Ermənistan danışıqlarının təşkilinə ümid edir: “Bu məsələ üzərində iş aparılacağına şübhəm yoxdur. Sammit çərçivəsində konkret görüşlər gözlənir, ancaq hələlik, qrafiklə bağlı danışmaq istəmirəm”. ABŞ dövlət katibinin köməkçisi Ceyms O'Brayn keçən həftə deyib ki, hər iki ölkənin xarici işlər nazirləri NATO-nun digər tərəfdaş ölkələri ilə birlikdə sammitə dəvət olunublar. Elə ABŞ dövlət katibi Entoni Blinken Vaşinqtonda bir təhlil mərkəzinin tədbirində deyib ki, Azərbaycanla Ermənistan arasında sülh razılaşmasını gerçəkdən əlçatan sayır: “Ölkələr arasında sülh sazişini gerçəkləşdirmək üçün müstəsna imkan yaranıb”. ABŞ prezidenti Cozef Bayden Azərbaycan prezidenti İlham Əliyevə Müstəqillik Günü münasibətilə ünvanladığı təbrik məktubunda sülh məsələsinə xüsusi toxunub. Baydenin regionda sülhün təmin edilməsi istiqamətində dövlətimizin səylərini dəstəklədiyini ifadə edən məktubu bir daha beynəlxalq aləmin də Qafqazda davamlı sülhdə maraqlı olduğunu göstərir. Azərbaycan ABŞ-ın bu yanaşmasını təqdir edir. Bunu prezident İlham Əliyevin Cozef Baydenə göndərdiyi təbrik məktubundan da görmək olar. Məktubda qeyd olunur ki, Azərbaycan Amerika Birləşmiş Ştatları ilə münasibətlərinə xüsusi əhəmiyyət verir: “Ölkələrimiz mürəkkəb regional çağırışların həlli istiqamətində, terrorizmə qarşı mübarizə və beynəlxalq təhlükəsizlik məsələlərində hər zaman yaxından əməkdaşlıq ediblər. Enerji sahəsindəki uzunmüddətli və səmərəli birgə fəaliyyətimiz xüsusi əhəmiyyət kəsb edir. Birləşmiş Ştatların Azərbaycanın enerji strategiyasının gerçəkləşməsində, Avropanın enerji təhlükəsizliyinin təmin edilməsində mühüm rol oynayan Cənub Qaz Dəhlizinin reallaşmasına verdiyi qətiyyətli dəstəyini yüksək qiymətləndiririk”. Qeyd olunur ki, Azərbaycan Ermənistanla sülh müqaviləsinin və onun əsasını təşkil edən 5 prinsipin təşəbbüskarı olaraq sülh gündəliyinin irəli aparılması üçün daim siyasi iradə nümayiş etdirir: “Ermənistanla münasibətlərin normallaşdırılmasına, bölgədə davamlı sülhün bərqərar edilməsi, sülh müqaviləsinin hazırlanması prosesinə ABŞ-ın hər zaman dəstək vermək əzmini təqdir edirik”.
Artıq ABŞ, eləcə də dünyanın əksər ölkələri Azərbaycanı güclü, dinamik inkişaf edən, terrorizmə qarşı qlobal mübarizəyə qoşulan, sabitliyə və təhlükəsizliyə mühüm töhfə verən, qlobal müstəvidə önəmli təşəbbüslərlə çıxış edən ölkə kimi qiymətləndirir. Azərbaycan daima beynəlxalq antiterror əməliyyatlarında fəal iştirak edib. Hərbçilərimiz müxtəlif ölkələrdə davamlı sülhün və təhlükəsizliyin təmin edilməsində mühüm işlər görüblər. Dövlətimiz bu gün də dünyada sülhün və təhlükəsizliyin təmin olunmasına yardımını əsirgəmir. Bunları nəzərə alan ABŞ Azərbaycanın regionda sülh təşəbbüslərinə tam dəstək ifadə edir. Görünən odur ki, ABŞ administrasiyasının təhlükəsizliklə bağlı ümumi narahatlıqlar və regional barışıq məsələlərinin həlli istiqamətində Azərbaycanla birgə çalışmaq istəyi var. Amerika bununla bağlı firavan və dinc gələcək naminə Ermənistan və Azərbaycan arasında barışığın təşviq olunmasına çalışır. ABŞ burada onu da nəzərə alır ki, dünya enerji bazarında həm təhlükəsizliyin təminində, həm də bazarın sabitləşməsində Azərbaycanın xüsusi rolu var. Vaşinqton Azərbaycanın Ukraynanın suverenliyinə verdiyi dəstəyi, Ukraynaya göstərdiyi humanitar və enerji sahəsində yardımı vacib addım hesab edir və bunu alqışlayır. ABŞ Azərbaycanın hansı risqlər və çətinliklər hesabına Ukraynaya dəstək verdiyinin fərqindədir və ölkəmizin bu cəsarətli addımını, beynəlxalq hüquqa sadiqliyini yüksək qiymətləndirir. ABŞ hazırda Cənubi Qafqazda davamlı sülhə nail olmaq üçün mühüm imkanın olduğuna inanır və bu baxımdan Azərbaycanla Ermənistan arasında diplomatik təmasların intensivləşdirilməsinə və Azərbaycanın iqtisadi, nəqliyyat və insanlararası əlaqələrinin qurulmasına kömək etməyə hazır olduğunu bildirir. Bununla ABŞ bütün Qafqaz və hətta Transxəzər regionunun inkişafında, Cənubi Qafqazda sülhün əldə olunmasında Azərbaycanın müstəsna roluna və imkanlarına diqqət çəkir və bizə hərtərəfli dəstək də vəd edir. Azərbaycan bütün bunları yüksək qiymətləndirir. ABŞ isə Azərbaycanı bundan sonra da özünün stateji tərəfdaşı kimi görür və əməkdaşlıq imkanlarını genişləndirməyi planlaşdırır.
Ramil QULİYEV
