Azərbaycan-Rusiya ticarətinin 50-70 faizi “dolların çətirindən” çıxarıldı...
Aydın Hüseynov: “İki ölkənin iqtisadi təşəbbüskarlığı regionda yeni maliyyə sistemini formalaşdıra bilər”
Prezident İlham Əliyev Astanada Rusiya lideri Vladimir Putinlə görüşündə dedi ki, milli valyutalarda qarşılıqlı hesablaşmalar artır:
“Əlbəttə, həm keçən il, həm də bu il əmtəə dövriyyəsinin artması ölkələrimizin iqtisadiyyatlarının fəal qarşılıqlı fəaliyyət göstərdiyini nümayiş etdirir. Sevindirici haldır ki, həmçinin milli valyutalarda qarşılıqlı hesablaşmalar artır. Bu, Azərbaycanın Rusiyaya ixracında artıq 70 faizdən çoxdur, Rusiyanın Azərbaycana ixracında isə 50 faizə yaxındır. Beləliklə, Sizinlə bir neçə il əvvəl danışdıqlarımız artıq uğurla həyata keçirilir”.
Ümumilikdə, iki ölkə arasında milli valyutalarda qarşılıqlı hesablaşmaların artmasının əhəmiyyətini ekspertlər necə dəyərləndirir?
“Əmtəə dövriyyəsinin artması ölkələrimizin iqtisadiyyatlarının fəal qarşılıqlı fəaliyyət göstərdiyini nümayiş etdirir”
Sözügedən məsələni “Bakı-Xəbər”ə şərh edən millət vəkili Aydın Hüseynov buna müsbət prizmadan yanaşdı: “Azərbaycan və Rusiya bölgədə irihəcmli ticarət dövriyyəsinə malik ölkələr kimi öz iqtisadi-maliyyə sistemlərində qarşılıqlı hesablaşmaların da tətbiqinə geniş yer verməkdədir. İki ölkə arasında imzalanmış Strateji Müttəfiqlik Bəyannaməsində əsas yer tutan bəndlərdən biri tərəflər arasında investisiya layihələri, iqtisadi-ticari əməliyyatlarda milli valyutaların qarşılıqlı hesablaşmalar kimi nəzərə alınması əksini tapıb. Bu prisipə uyğun olaraq son 2 ildə iqtisadi-hüquqi çərçivə yaradılıb və milli valyutalarda qarşılıqlı hesablaşmaların həyata keçirilməsi təmin edilir. Həm keçən il, həm də bu il əmtəə dövriyyəsinin artması ölkələrimizin iqtisadiyyatlarının fəal qarşılıqlı fəaliyyət göstərdiyini nümayiş etdirir. Azərbaycan və Rusiyanın iqtisadi təşəbbüskarlığı regionda yeni maliyyə sistemini formalaşdıra bilər. Rusiya ölkəmizin əsas ticarət tərəfdaşıdır və ticari dövriyyənin hər il artması müşahidə edilir. Bu isə, sözsüz ki, milli valyutalarda qarşılıqlı hesablaşmaların həcmini də artırır. Belə ki, 2024-cü ilin birinci yarısında ölkələr arasında ticarət dövriyyəsi 13 faiz artıb. 2024-cü ilin əvvəlində Rusiya ilə Azərbaycan arasında milli valyutalarda qarşılıqlı hesablaşmalar 54 faizi ötüb. Azərbaycan və Rusiyanın bölgədə təhlükəsizlik, davamlı iqtisadi inkişaf üçün olduqca mühüm addımları və təşəbbüskarlığı digər region ölkələri üçün də platforma rolunu oynayır. Böyük bir iqtisadi coğrafiyada yeni maliyyə sisteminin formalaşmasına zəmin yaradır. Hər iki ölkə Qərbi Avropanı Asiya ilə birləşdirən “Şimal-Cənub” beynəlxalq nəqliyyat dəhlizinin yaradıcısıdır və dəhlizə 13 ölkə qoşulub ki, bu da böyük bir maliyyə valyuta sisteminin qurulmasına imkan verə bilər”.
Vidadi ORDAHALLI
