"COP29-da mühüm maliyyə nəticələri lazımdır" - BMT Baş katibi
COP29-da mühüm maliyyə nəticələri lazımdır. Trend xəbər verir ki, bu barədə BMT-nin Baş katibi Antonio Quterreş Astanada "ŞƏT+" formatında keçirilən iclasda deyib.
"Emissiyaların azaldılması və ən böyük inkişaf etmiş ölkələrdən başlayaraq, iqlim ədalətinin təmin olunması üçün, həm də bütün digər ölkələri səfərbər etməklə daha çox ambisiyaya ehtiyacımız var. Bütün hökumətlər gələn ilə qədər maliyyə səviyəsində müəyyən edilmiş yeni ödənişlər etməlidir. Bu ödənişlər uzunmüddətli qlobal istiləşməni 1,5 dərəcə Selsi ilə məhdudlaşdırmaq məqsədinə tam uyğun olmalı, 2030 və 2035-ci illər üzrə emissiyaların azaldılması üzrə mütləq hədəfləri əhatə etməlidir. Burada vacib olan istiləşməni 1,5 dərəcə çərçivəsində saxlaya bilməyimizdir", - o deyib.
Quterreşin sözlərinə görə, 2030-cu ilə qədər meşələrin qırılmasına son verilməli, bərpa olunan enerji mənbələrinin (BEM) gücü üç dəfə artırılmalı və qlobal qazıntı yanacağı istehlakı ən azı 30 faiz azaldılmalıdır.
"İnanıram ki, bütün ölkələr 2040-cı ilə qədər kömür enerjisindən istifadəni tamamilə dayandıracaq. Maliyyə həlledici əhəmiyyət kəsb edir, bunu iqlim tədbirləri çərçivəsində təşviq etməliyik, bu həm də bərabərsizliklə mübarizə ilə bağlıdır. Bu il COP29-da güclü maliyyə nəticələrinə, həmçinin çoxtərəfli inkişaf banklarının kredit imkanlarının əhəmiyyətli dərəcədə artırılması və onların biznes modellərinin dəyişdirilməsi üzrə qətiyyətli tədbirlərə ehtiyacımız var ki, bu da daha çox özəl kapitalın iqlim dəyişikliyi ilə mübarizəyə yönəldilməsinə imkan verəcək. İnkişaf etmiş ölkələr adaptasiya tədbirlərinin maliyyələşdirilməsini necə ikiqat artıracaqlarını və bu il İtki və Zərər Fondunun biznes üçün açılmasını təmin etmək məqsədilə fonda mühüm ödənişlər daxil olmaqla, bütün öhdəliklərini necə tam yerinə yetirəcəklərini müəyyənləşdirməlidir", - BMT-nin Baş katibi deyib.
Onun sözlərinə görə, karbon emissiyalarının qiymətini müəyən etməyin və qazıntı yanacağı ilə işləyən şirkətlərin proqnozlaşdırılmamış gəlirlərinə vergi qoymağın vaxtı çatıb.
