Rusiyanın ən böyük atom sualtı qayığı ABŞ sularında müəmmalı planın icrasına başlayıb…
Elxan Şıxəliyev: “Müharibə bitməyənə kimi biz hələ nüvə silahının ritorikasını çox eşidəcəyik”
Rusiyanın Şimal Donanmasının gəmilərindən ibarət dəstə Venesuelanın şimalında yerləşən La Quayra əyalətinin limanına daxil olub. Buraya nüvə sualtı gəmisi “Kazan” da daxildir. Bu barədə Rusiya Müdafiə Nazirliyinin mətbuat xidməti məlumat yayıb.
Elə bu gün Britaniyanın “Daily Express” qəzeti Rusiya prezidenti Vladimir Putinin “Kazan” atom sualtı gəmisini Kubaya göndərərkən ABŞ-a siqnal göndərdiyini və Rusiyanın dəniz gücünün təhlükəli ola biləcəyini yazan məqalə dərc edib.
Donanmaya “Kazan” nüvə sualtı gəmisi, “Admiral Qorşkov” freqatı, “Nikolay Çiker” xilasedici yedək gəmisi və limana ilk daxil olan təchizat tankeri “Akademik Paşin” daxildir. Qrupa Hərbi Dəniz Qüvvələrinin Baş Qərargahının əməliyyat şöbəsinin rəisi, vitse-admiral Mixail Neupokoyev komandirlik edir. Bildirilir ki, gəmilər bir neçə gün yanalmada qalacaq. Bundan sonra onlar Atlantik okeanında onlara verilən tapşırıqları yerinə yetirməyə davam edəcəklər. Nazirlik bildirib ki, kampaniyanın əsas məqsədləri bayrağın nümayişi və uzaq okean zonasının əməliyyat baxımından mühüm ərazilərində hərbi-dəniz qüvvələrinin mövcudluğunu təmin etməkdir. Rusiyanın bu gedişinin ABŞ-a hər hansı formada təsiri olacaqmı?
Hərbi-siyasi şərhçi Elxan Şıxəliyev “Bakı-Xəbər”ə açıqlamasında bildirdi ki, Rusiya-Ukrayna müharibəsinin fonunda Rusiyanın atom sualtı qayığını Venesuela sahillərinə, bundan əvvəl də Kubaya yönləndirməsi Amerikanı Ukraynanı dəstəkləməkdən çəkindirəcək bir güc göstəricisi kimi qiymətləndirilməlidir: “Bu, eyni zamanda, 1962 - ci ildə, sovet dönəmində də Sovet İttifaqının Kubaya yönləndirdiyi sualtı atom başlıqlı raket daşıyıcıları üzərindən baş vermişdi. O zaman ABŞ geri addım atdı. Sırf atom başlıqlı raket sistemləri, nüvə silahı ilə Amerika vətəndaşlarına bir mesaj verir ki, əgər ABŞ Ukraynanı dəstəkləyərsə, onlara verdikləri “Atakan” raket sistemlərinin 300 km dərinlikdə zərbə endirməsinə icazə verərsə, həmin raket sistemləri Rusiyada olan nüvə başlıqlı raket daşıyıcıların birləşmə məntəqələrinin saxlanclarına zərbə endirərsə, o zaman Rusiya həmin raketlərdən ABŞ - ın özünə və ərazilərinə qarşı istifadə edəcək. Bu, Rusiya tərəfindən söz deyil, real olduğu üçün noyabra qədərki seçkilər ərəfəsində Rusiya ilə ABŞ arasında nüvə müharibəsinin başlanacağına dair qorxu yaratmaq məqsədi daşıyır. Eyni zamanda istəkləri ondan ibarətdir ki, Bayden yox, Tramp seçilsin. Tramp da müharibəni dayandıracağını deyir. Böyük plan ondan ibarətdir ki, ABŞ Ukraynaya olan dəstəyini məhdudlaşdırsın, yaxud bir yerə qədər etsin. Əks təqdirdə Rusiya istədiyi kimi addım ata bilər. Ukrayna-Rusiya müharibəsini nüvə toqquşmasına gətirməmək üçün ABŞ bu məsələyə diqqət etməlidir. Əgər ABŞ Rusiyanın strateji məğlubiyyətinə kimi Ukraynanı dəstəkləyəcəksə, o zaman Rusiya da nəzarətdən çıxa bilər. Sırf Rusiya ilə Ukrayna müharibəsinin nəticələrinə hesablanan ikinci sülh sammitinin keçirilməsi üçün də Ukraynanı razılaşdırmağa çalışırlar. Qlobal güclər nə Ukraynanın, nə də Rusiyanın istədiyi kimi sülh istəyirlər. Ona görə də, müharibə bitməyənə kimi biz hələ nüvə silahının ritorikasını çox eşidəcəyik”.
Məhəmmədəli QƏRİBLİ
