Belə dələduz qadınlar bağça direktorluğuna necə gəlib çıxır?
Elyar İslamoğlu: “Bu cür dələduz qadınlar özlərini “yüksək təhsilli” kimi göstərərək, insanların etibarından sui-istifadə edirlər”
Yerli mətbuatda yayılan məlumata görə, Bakıda məşhur “Moon Kids” Uşaq Bağçasının təsisçisi və direktoru Rüstəmova Havvaxanım İmamət qızı saxlanılıb və o, dələduzluq əməlində ittiham edilir.
Qeyd olunur ki, Havvaxanım Rüstəmova xeyli sayda insandan işə düzəltmə və digər məsələlərlə bağlı müxtəlif məbləğlərdə pul alaraq mənimsəməkdə ittiham olunur. Mətbuat yazır ki, artıq H.Rüstəmovanın rəhbəri olduğu “Moon Kids” Uşaq Bağçası da fəaliyyətini dayandırılıb. Bağçanın bütün sosial şəbəkələrdəki hesabları silinib.
Bildirilir ki, Havvaxanım Rüstəmova 2023-cü ildə “İlin ən uğurlu iş xanımı” nominasiyasına layiq görülüb.
Biz də araşdırma apardıq, bağça barədə Youtube-də videogörüntülər, google-də informasiyalar olsa da, amma “Moon Kids”in sosial şəbəkə hesabları bağlıdır. Amma onu deyə bilərik ki, “Moon Kids” Uşaq Bağçası onlayn mediada kifayət qədər reklam olunub.
Məlum olduğu kimi, son dövrlər təkcə H.Rüstəmova deyil, müəyyən vəzifə tutan digər qadınlar arasında da dələduzluq maddəsi ilə ittiham edilənlər olub. Bu insanlar onlara həvalə edilən vəzifənin məsuliyyətini dərk etmək əvəzinə, oturduqları kreslodan sui-sitifadə edərək dələduzluq edib, insanların külli miqdarda vəsaitini mənimsəyiblər.
Çox maraqlıdır ki, saxlanılan H.Rüstəmova da daxil olmaqla bu yolu seçən xanımların əksəriyyəti özünü reklam etdirib, hətta müxtəlif mükafatlar da alıblar. Özəl bir uşaq bağçasının müdiri olan H.Rüstəmovanın reklamı o qədər güclü olub ki, hətta o, “İlin ən uğurlu iş xanımı” nominasiyasına layiq görülüb. Bəs onu bu nominasiyaya layiq görənlər o xanımın fəaliyyətini araşdırmayıbmı? Araşdırsaydılar, daha həssas yanaşsaydılar onun əməllərini aydın görə bilərdilər.
“Belələrinin bağça direktoru vəzifəsinə qədər gəlib çata bilmələrinin səbəblərinə gəlincə, onlar bu vəzifələri müxtəlif yollarla tuturlar”
Belələri necə, hansı yolla irəli çəkilir, onlara vəzifələr verilir? Belə dələduz qadınlar bağça müdirliyinə qədər necə gəlib çatır?
Filologya üzrə fəlsəfə doktoru, elm və təhsil mütəxəsisi, ictimaiyyətçi Elyar İslamoğlu “Bakı-Xəbər”ə bildirdi ki, özəl bağçalardan birinin müdirinin saxlanılması xəbərini mətbuatdan oxuyub: “Demə ki, o, “İlin ən uğurlu iş xanımı” nominasiyasına layiq görülübmüş. Əslində, belə nominasiyaların hansı şərtlərlə, hansı yollarla verildiyini aşağı-yuxarı hər kəs bilir. Biz belə qondarma nominasiyaların verildiyinin şahidi oluruq və belə mükafatları adətən pulla verirlər. Hansısa təşkilatlar belə nominasiyalar təşkil edir və onlardan pul alaraq bu nominasiyaları onlara verir. Qaldı özəl bağçaların fəaliyyətinə, özəl bağçaların fəaliyyəti dərindən yoxlanılmalıdır. Hər kəs özəl bağça aça bilməməlidir. Kimsə kefi istədiyi yerdə, istədiyi şəkildə uşaqları toplayıb bunların tərbiyəsi ilə məşğul olmağa iddialı olmamalıdır. Çox istərdim ki, dövlət tərəfindən bu məsələlər nəzarətə götürülsün. Çünki biz bəzi hallarda görürük ki, bəzi məmurların xanımları, yaxud kimlərinsə sevgililəri bağçalar, tədris mərkəzləri açır. Əvvəllər görürdük ki, klinika, gözəllik salonları açırdılar. Hazırda belə qadınlar artıq bağça müdiri kimi işləməyə başlayıblar”.
E.İslamoğlu bildirdi ki, belə dələduzların bağçalara rəhbərlik etməsi uşaqların psixologiyasında problemlər yaradır. Onların əksəriyyətinin idarəetməni bacarmadığını deyən müsahibimiz qeyd etdi ki, belələri öz vəzifələrinin sərhədlərini bilmir: “Bu sahədə qeyri-peşəkar olduqları üçün, mətbuatın yazdığı kimi, dələduzluqla, fırıldaqçılıqla məşğul olurlar. Bu cür dələduz qadınlar özlərini “yüksək təhsilli” kimi göstərərək insanların etibarından sui-istifadə edirlər.
Belələrinin bağça direktoru vəzifəsinə qədər gəlib çata bilmələrinin səbəblərinə gəlincə, onlar bu vəzifələri müxtəlif yollarla tuturlar. Ümumiyyətlə, özəl uşaq bağçalarına ciddi dövlət nəzarəti olmalıdır və bu cür dələduzlar bu sektora buraxılmamlıdır. Bu çox vacib məsələdir”-deyə alim bildirdi.
İradə SARIYEVA
