Azərbaycanda 25 minə yaxın cinayətkar qrup zərərsizləşdirildi...
Şəmsəddin Əliyev: “25 minə yaxın cinayətkar qrupun zərəzsizləşdirilməsi Azərbaycan polisinin çoxşaxəli prinsipial mövqeyini təzahür edir”
“2003-2023-cü illərdə cinayətlərin qarşısının alınması, açılması, istintaqı, bütövlükdə vətəndaşların qanuni mənafelərinin qorunması sahəsində davamlı iş aparılıb, o cümlədən 25 minə yaxın cinayətkar qrup və dəstə zərərsizləşdirilib”. Bu barədə daxili işlər naziri general-polkovnik Vilayət Eyvazovun iştirakı ilə “Polis Günü”nə və 2023-2024-cü tədris ilinin buraxılışına həsr olunmuş təntənəli mərasimdə məlumat verilib.
Məlumata görə, dövr ərzində əllərdə qanunsuz saxlanılan 35 mindən çox odlu silah yığılıb və onun tətbiqi ilə törədilən hüquqazidd əməllərin sayı xeyli azalıb.
“Azərbaycan dövlətinin cinayətkarlıqla mübarizə siyasətinin formalaşmasında polis orqanları fəal iştirak edir”
25 minə yaxın cinayətkar qrup və dəstənin zərərsizləşdirilməsi barədə fikir bildirən “Polisə Dəstək” İctimai Birliyinin rəhbəri, hüquqşünas Şəmsəddin Əliyev “Bakı-Xəbər”ə şərhində bildirdi ki, 1918-ci ildən bəri Azərbaycan polisi cinayətkarlıqla mübarizə aparır. Bu illər ərzində əldə olunan nəzəri və praktiki təcrübə cinayətkarlıqla mübarizə sahəsində öz təsirini göstərib: “25 minə yaxın cinayətkar qrupun zərəzsizləşdirilməsi Azərbaycan polisinin çox şaxəli prinsipial mövqeyini təzahür edir. Avropa ilə Azərbaycan polisini müqayisə etsək görərik ki, qeydə alınan cinayətkarlıq səviyyəsi olduqca aşağıdır. 100 min əhalinin sayına görə ölkəmizdə təxminən 200-300 cinayət hadisəsi qeydə alınırsa, Avropada 6000-7000 düşür. Burada Azərbaycan polisinin prinsipiallığı, içdiyi anda sadiqliyi mühum rol oynayır. Bu gün ölkədə sabitliyin dayanıqlı və davamlı olmasında zəhməti və xidmətləri ölçüyəgəlməz Azərbaycan polisinin rolu danılmazdır, böyükdür. Təkcə ötən il ağır və şəxsiyyət əleyhinə qeydə alınan cinayətlərin sayında azalma qeydə alınıb. Ümumi dinamikada cinayətlərin sayı artıb. Bunun 89,6 faizinin açılması təmin edilib. Cinayətlərin əksər qismi cəmiyyətə, ictimaiyyətə bəlli olmayan qeyri-aşkar şəraitdə baş verib. Bu cinayətlərin açılmasında polisin rolu yüksəkdir. Qeyd etdim ki, ötən illə müqayisədə cinayətlərin sayı artıb. Artım daha çox dələduzluq, narkotik vasitələrin qanunsuz dövriyyəsi ilə bağlıdır. Buna baxmayaraq, Azərbaycan polisinin prinsipiallığı sayəsində qeydə alınan bütün cinayətlər açılır”.
Həmsöhbətimiz hesab edir ki, dələduzluq cinayətlərinə qarşı mübarizə sərtləşməlidir: “Xatırladım ki, Xəzər rayonunda əvvəllər dələduzluq cinayəti ilə bir neçə dəfə məhkumluğu olmuş, axtarışda olan Rövşən Allahverdiyev onu yaxalanmağa gedən polisləri qətlə yetirdi. Bu səbəbdən də hesab edirəm ki, dələduzluqla bağlı qanun sərtləşdirilməlidir”.
Ş.Əliyev onu da əlavə etdi ki, Azərbaycan dövlətinin cinayətkarlıqla mübarizə siyasətinin formalaşmasında Azərbaycan polis orqanları fəal iştirak edir və bunun həyata keçirilməsini sədaqətlə təmin etməyi bacarırlar.
Günel CƏLİLOVA
