Rusiya Trampın Ukrayna müharibəsini bir gündə bitirmək vədini rədd etdi - Kiyevə növbəti xəbərdarlıq...
Rusiyanın BMT-dəki nümayəndəsi ABŞ-ın keçmiş prezidenti Donald Trampın prezident seçiləcəyi təqdirdə Rusiya-Ukrayna müharibəsinin bir gündə həll olunacağı vədinə münasibət bildirib. O, Trampın vədini rədd edib və bildirib ki, Ukrayna böhranını bir gündə həll etmək mümkün deyil.
Vasili Nebenzia Rusiya və Ukraynanın 2022-ci ildə müharibəni bitirmək üçün razılaşmaya “çox yaxın” olduqlarını deyib. O, Putinin iyunun 14-də, Kiyev 2022-ci ildə Moskvanın ilhaq etdiyi dörd bölgədən qoşunlarını çıxarmağa başlayarsa və NATO-ya daxil olmaq planından əl çəkərsə, Ukraynada “dərhal” atəşkəs elan etmək və danışıqlara başlamaq təklifini xatırladıb.
Heç bir torpaqdan imtina etməyəcəyinə söz verən Zelenski isə, Putinin ultimatumunu rədd edib.
Qeyd edək ki, Tramp 2023-cü ilin mayında münaqişəni bir gün ərzində həll edəcəyini deyib: “Ruslar və ukraynalılar ölür. Mən onların ölməsini istəmirəm. Mən bunu həll edəcəm, 24 saat ərzində həll edəcəm”.
O, bunun Zelenski və Rusiya prezidenti Putinlə görüşdən sonra baş verəcəyini deyib. Tramp, seçki kampaniyası zamanı da bu iddiasını dəfələrlə təkrarlayıb.
Keçən həftə prezident Baydenlə debat zamanı Tramp deyib: “Əgər bizim gerçək bir prezidentimiz olsaydı, Putinin hörmət etdiyi, hər şeyi bilən prezidentimiz olsaydı... o, heç vaxt Ukraynanı işğal etməzdi”.
Nebenzia həmçinin, Zelenskinin sülh düsturunu “uğursuz” adlandırıb və bildirib ki, aprel ayından bəri baş verənləri nəzərə alaraq, “real” olmalıdırlar. O, xəbərdarlıq edib ki, Ukrayna üçün döyüş meydanındakı vəziyyət nə qədər çətinləşərsə, müharibəni bitirmək üçün diplomatiya da bir o qədər çətinləşəcək.
TAHİR
