Bayden hər enerji konfransına məktub yazmır ki?! - Əliyev düz tutdu...
Vüqar Bayramov: “Baydenin müraciəti Azərbaycana verilən ciddi önəmin göstəricisidir”
“Heç də hər enerji tədbiri ABŞ Prezidentinin müraciəti şərəfinə nail olmur”. Bu fikirirləri Prezident İlham Əliyev “Euronews” televiziyasına müsahibəsində səsləndirib.
Ölkə başçısının sözlərinə görə, tədbir artıq 30 ildir keçirilir: “Birincisi, o, hələ 1994-cü ildə təşkil olunmuşdur. İkincisi, ölkələrin coğrafiyasına və şirkətlərin sayına baxsanız görərsiniz ki, iştirakçıların sayı artır. Heç də hər enerji tədbiri ABŞ Prezidentinin müraciəti şərəfinə nail olmur. Bu tədbirin bütün illəri belə olub və bu, əslində, onun unikal mahiyyətini və gücünü nümayiş etdirir. Düşünürəm ki, bütün bu amillər həmin tədbiri müxtəlif məsələləri həll edən, inkişaf yolunu göstərən, çox inkişaf etmiş və inklüziv platformaya çevirir. Birincisi, Xəzər Neft və Qaz Sərgisi oldu. Sonra biz qaz hasilatına başladıq. Tədbir artıq Xəzər Neft və Qaz Sərgisi və Konfransı adını aldı. Sonra biz bərpaolunan enerji sahəsində işə başladıq və tədbir fərqli sektorları əhatə edən Bakı Enerji Həftəsinə çevrildi. Siz qısa müddət ərzində bir ölkədə hər istiqamətdə - neft, təbii qaz və indi isə yaşıl enerji sahələrində uğurları görə bilərsiniz”.
Bütün bu deyilənlərin fonunda, ABŞ prezidentinin Azərbaycanda keçirilən enerji konfransına diqqət göstərməsini, önəm verməsini ekspertlər necə dəyərləndirir?
“Ölkəmizin reallaşdırdığı tədbirlər, həyata keçirdiyi layihələr aparıcı ölkələrin diqqət mərkəzində olur”
Sözügedən məsələni “Bakı-Xəbər”ə şərh edən millət vəkili Vüqar Bayramov buna bir neçə aspektdən yanaşdı: “Təbii ki, Azərbaycan enerji sektorunda yeni ideyaları, innovasiyaları tətbiq edən ölkə olmaqla yanaşı, həm də regionun enerji təhlükəsizliyinə xüsusi töhfə verir. Azərbaycanın reallaşdırdığı tədbirlər, həyata keçirdiyi layihələr aparıcı ölkələrin diqqət mərkəzində olur. O baxımdan, sözsüz, enerji forumuna, Birləşmiş Ştatlar da daxil olmaqla, aparıcı ölkələrin rəhbərlərinin həm diqqəti, həm də müraciəti ondan xəbər verir ki, Azərbaycan enerji sahəsində kifayət qədər ciddi uğurlara imza atmış ölkədir. Artıq Azərbaycan yeni yanaşma və tendensiyalarla çıxış edir. Yaşıl enerji zonasının formalaşmasına, eyni zamanda iqlim dəyişikliklərinə xüsusi töhfə verən ölkədir. Alternativ mənbələrdən enerji istehlakının artırılması ilə bağlı xüsusi hədəflər var. 2030-cu ilədək ümumi istehlakın 30 faizinin alternativ mənbələrdən əldə edilməsi nəzərdə tutulub. Bu da praktik olaraq ondan xəbər verir ki, Azərbaycan həm də enerji sahəsində innovativ ideyaları tətbiq edən ölkələrdən biridir. Bütün hallarda, Baydenin müraciəti Azərbaycana verilən ciddi önəmin göstəricisidir”.
Vidadi ORDAHALLI
