COP29-dan sonra 3-cü Qarabağ müharibəsi? - Ermənistanın ziddiyyətli siyasəti...
Elxan Şıxəliyev: “Ermənistan özü bu vəziyyəti istəmir, əslində ona bunu istədirlər”
Bir sıra ekspertlər iddia edirlər ki, Ermənistanın davranışları, verdikləri ziddiyyətli bəyanatlar, müasir silah növlərini tədarük etməsi sülhə yox, yeni müharibəyə aparır və Bakı buna çox da dözən deyil.
Hətta belə iddialar var ki, COP29-dan sonra üçüncü müharibə alovlana bilər. Yeni müharibə risqləri həqiqətən mövcuddurmu və olarsa, bu, Ermənistan üçün nə vəd edə bilər?
Hərbi-siyasi şərhçi, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, son zamanlar Ermənistanla Azərbaycanın münasibətləri sülh sazişi ritorikasından mümkün ola biləcək növbəti gərginlik mərhələsinə keçib: ”Onların əsasları nədən ibarətdir? Azərbaycan tərəfinin gözləntiləri nə qədər Ermənistanın sülh sazişini imzalaması olsa da, onun sözdə sülh sazişi adı ilə arxadan sürətli silahlandırılmasıdır. Sürətli silahlanmanı da Fransa vasitəsi ilə edir. Fransa da informasiya cəbhəsində Azərbaycana qarşı düşmən mövqeyini göstərən ölkədir. Fransanın məqsədi Ermənistanın üzərindən Azərbaycana qarşı istəklərini həyata keçirməkdir. Bununla üçüncü müharibə baş verə bilər. Ermənistan özü bu vəziyyəti istəmir, əslində ona bunu istədirlər. Sülh sazişinin imzalanmasını uzadırlar. Zamanın uzadılması ilə də şərti sərhəddə atəşkəsin uzadılması, ardınca da 155 millimetrlik “sezarları” verməklə mümkün ola biləcək gərginliyin əsaslarını yaradırlar. Biz hazırda Ermənistanla nə sülh, nə də müharibə vəziyyətindəyik. Hazırda atəşkəs vəziyyətindəyik. Məsələ odur ki, atəşkəs dönəmi çox həssas dönəmdir. Atəşkəsdən sülhə də, müharibəyə də keçilə bilər. Amma Ermənistan və onu dəstəkləyən qüvvələrin mesajları revanşizm, silahlanma üzərindən verilir sanki. Yəni son bir ayda Naxçıvan, Zəngəzur karidorunun keçəcəyi istiqamətdə atəşkəsi pozub, “bizim xəbərimiz yoxdur”,- demələri böyük qlobal güclərin Ermənistan üzərində planları olduğunu göstərir. Ermənistan da bunun ifaçısı kimi baş verənlərin mərkəzində durur. Ona görə də indiki ritorika Azərbaycanla Ermənistanın informasiya cəbhəsində, analitik cameəsində özünü göstərir. Dövlət rəsmiləri, Xarici İşlər Nazirliyinin nümayəndələri, Prezidentin köməkçisi Hikmət Hacıyev səviyyəsində ciddi narahatlıq bildirildi. Adətən müharibə öncəsi vəziyyət də belə olur. Biz qiymətləndirməmizi, analitikamızı sahədə baş verənlərlə əlaqələndirib, bir nəticəyə gəlirik. Təbii ki, Ermənistan bu mövqeyini dəyişməsə üçüncü müharibənin mümkünlüyü qaçılmaz ola bilər. Bunun olmamasını əsaslandıracaq tərəf Ermənistan olmalıdır. Ancaq Ermənistanın davranışlarını biz fərqli yöndə görürük”.
Azərbaycanın hərbi baxımdan güclü olduğunu Qərb analitikləri də etiraf edirlər. Məsələn, Karneqi Beynəlxalq Sülh Fondunda təhlilçi, Qafqaz üzrə mütəxəssis kimi tanınan Tomas de Vaal bu yaxınlarda yazmışdı ki, Azərbaycan Zəngəzur dəhlizinə nəzarəti güc yolu ilə bir neçə saat ərzində ələ keçirə biləcək hərbi potensiala malikdir. Problem ondadır ki, dünyanın böyük gücləri Zəngəzur dəhlizinə nəzarət məsələsində güzəştə getmək fikrində deyillər. Məhz elə bu səbəbdən də Azərbaycan bir neçə saata həll edə biləcəyi Zəngəzur məsələsini həyat keçirməyi sülh sazişinin imzalanmasının üzərinə buraxıb.
Məhəmmədəli QƏRİBLİ
