Putin və Kim razılaşdı - Rusiya və Şimali Koreyaya hücum olsa...
Rusiya prezidenti Vladimir Putin və Şimali Koreya lideri Kim Çen In Pxenyanda görüşüb. Putin və Kim arasında görüş paytaxtda təşkil edilən mərasimlə başlayıb. Görüş iki ölkənin nazirləri və rəsmilərinin iştirakı ilə geniş tərkibdə davam edib.
Görüşün mətbuata açıq hissəsində çıxış edən Putin, Rusiya ilə Şimali Koreya arasındakı münasibətləri yüksək dəyərləndirdiyini deyib: "Rusiya siyasətinə, o cümlədən Ukrayna məsələsinə davamlı və sarsılmaz dəstəyinizi yüksək qiymətləndiririk. Burada ABŞ və müttəfiqlərinin illərdir Rusiyaya tətbiq etməyə çalışdığı hegemon və ekspansionist siyasətə qarşı mübarizəmizi nəzərdə tuturam" .
Kim və Putin görüşdən sonra Hərtərəfli Strateji Tərəfdaşlıq Sazişi imzalayıblar. Putin, imzalanan razılaşmalarla bağlı deyib ki, Şimali Koreya ilə imzalanan müqavilədə ölkələrə hücum zamanı “qarşılıqlı yardım” da yer alır.
Hərtərəfli tərəfdaşlıq haqqında müqavilədə iştirakçılarından birinə qarşı təcavüz olduqda, qarşılıqlı yardım göstərilməsi nəzərdə tutulub. Moskva imzalanmış sazişə uyğun olaraq Şimali Koreya ilə hərbi-texniki əməkdaşlıq imkanlarını da istisna etmir.
Putin ad çəkmədən AB və ABŞ-a işarə edərək, “Rusiya və Şimali Koreyanın şantaj dilinə dözməyəcəklərini” deyib. O, yeni strateji sazişi Moskva və Pxenyan arasında əlaqələri “yeni səviyyəyə” çıxaracaq “sıçrayış” kimi dəyərləndirib.
Qeyd edək ki, Rusiya prezidenti Putin siyasi təmaslar aparmaq üçün 24 ildən sonra ilk dəfə dünən Şimali Koreyaya gedib. Putinin səfəri Pxenyan-Moskva alyansının müxtəlif sahələrdə, o cümlədən müdafiə sahəsində əməkdaşlığı gücləndirmək cəhdi kimi şərh edilib.
TAHİR
