İlham Əliyev "konstitusiyanı dəyişin" dedi- Paşinyan "yaxın 1 ayda saziş imzalaya bilərik " cavabı verdi...Yanlışlıq haradadır?
"İlham Əliyev "konstitusiyanı dəyişin" dedi- Paşinyan "yaxın 1 ayda saziş imzalaya bilərik " cavabı verdi...Yanlışlıq haradadır? Ermənistan hakimiyyəti bu günlərdə yaxın bir ay ərzində Azərbaycanla sülh sazişi imzalamağa hazır olduqlarını bəyan etdi.Elə konkret və qəti dedilər ki, hər şeyin sanki bir an içində həll olunmaq üzrə olduğu təəssüratı yarandı."
Bu fikirlər “Bakı-Xəbər” Media Qrupunun rəhbəri, politoloq Aydın Quliyevin öz Facebook səhifəsində paylaşdığı statusunda yer alır. A.Quliyev daha sonra yazır: "Doğrudanmı sazişin yaxın bir ay ərzində imzalana biləcəyi kimi əlverişli nöqtəyə gəlib çıxmışıq? Xeyr...
Buna yalnız sadəlövh adamlar inana bilər.Hələ razılaşılmamış böyük məsələlər qalır.Hansıların ki, yaxın 1 ayda həll olunacağı qəti inandırıcı gəlmir.
Bəs belədə Ermənistanın XİN, parlament rəhbərliyi guya "hər müşgülün düzələcəyi 1 ay" söhbətini niyə ortaya atdı?
Fikrimcə ,bu bəyanat reallığı qəti göstərmir, əksinə, reallığı gizlədən oyuna çox bənzəyir.
Əvvala,Qərbi azərbaycanlıların taleyinin necə olacağı, Zəngəzur dəhlizinin iş rejimi və nəzarət məsələsinin necə həll olunacağı, təzminat məsələsinin necə razılaşdırılacağı, 30 illik müharibə canilərinin taleyinin necə olacağı və digər məsələlərin sazişdə necə əks olunacağı hələ məlum deyil. Bunlar həll edilməyibsə,sazişin yaxın bir ayda imzalanacağı mümkün deyil..
İkinci, Ermənistan "1 ay" müdətini İlham Əliyevin Konstitusiya dəyişikliyinin zəruriliyi "barədə bəyanatından dərhal sonra gündəmə gətirdi. Ermənistan parlamentinin sədri bəyan etdi ki, konstitusiyanı dəyişmək bizim daxili işimizdir, imzalayacağımız sazişdə ərazi bütövlüyünün qarşılıqlı tanınması əks olunacaq , qeyd ediləcək ki, tərəflərdən heç kim bu sazişin müddəalarını pozmaq üçün daxili qanunvericiliyə istinad edə bilməz və bu səbəbdən sazişi tezliklə imzalamaqla qarşılıqlı etimad yaratmaq olar. Diqqət yetirin.Ümdə və incə nüans da məhz buradadır. Yəni "konstitusiyanı dəyişməyək, ərazi iddialarından imtinanı əks etdirən sülh sazişini imzalayaq, bununla da hər şey bitsin" - deyə Ermənistan rəhbərliyi çox bic mövqe tutur. Demək, Ermənistan rəhbərliyi Azərbaycanın konstitusiya dəyişikliyi tələbindən rahat şəkildə yayınmaq üçün sazişin yaxın bir ayda imzalanmasının mümkünlüyü ideyasını ortaya tulladı. Halbuki Ermınistan rəhbərliyi hamıdan yaxşı bilir ki, sazişin yaxın bir ayda imzalana bilməsi real deyil. Bu şişirdilmiş ideya sadəcə konstitusiya dəyişikliyi tələbini aktual gündəmdən kənara çəkmək taktikasıdır .
Çox aldadıcı üsuldur .Ermənistanın demək istədiyi budur: "Özündə bütün ərazi iddialarını rədd edən sazişi mümkün qədər tez imzalayaq ki, konstitusiyanı dəyişmək kimi uzun- uzadı yolu getməyə ehtiyac qalmasın" ...
Ancaq xeyr...Heç bir beynəlxalq sənədin ölkə konstitusiyasından üstün olmadığı hər bir dövlətin süverenlik prinsipidir, bunu az qala uşaqlar da bilir və imzalanmış sazişin konstitusiya ilə ziddiyyətə girdiyi məqamlarda konstitusiyanın mübahisəsiz üstün tutulacağını da hər kəs bilir...
Qısası , Ermənistan konstitusiyanı hələ dəyişməyibsə , deməli yaxın bir ayda saziş sadəcə nağıldır....."
