"Şuşa Bəyannaməsi Qars müqaviləsi ilə müqayisə oluna bilər" - Aydın Quliyev
"Şuşa bəyannaməsi dövlətlərarası işləksənəddir. Eyni zamanda, perspektiv üçün bütün istiqamətlərdə geniş əlavə əməkdaşlıqlar üçün imkanlar açan sənəddir". Bu sözləri mətbuata açıqlamasında siyasi ekspert Aydın Quliyev deyib. "Şuşa bəyannaməsinə bundan sonra da 10 illər boyu hər hansı yeniləmələrə ehtiyacı olmayacaq. Bundan sonra onda hər hansı yeniləmələr aparmadan Azərbaycan-Türkiyə qardaşlığını onun əsasında bütün səviyyələrə çıxarmaq mümkündür.
Həqiqətən də, bu bəyannamə öz əhatəsinə və təsirinə görə Qars müqaviləsi ilə müqayisə oluna bilər. Əslində Şuşa bəyannaməsini Qars müqaviləsinin davamı hesab etmək lazımdır.
Şuşa bəyannaməsi iki ölkə liderlərinin şərait üçün ən uğurlu və uzaqgörən qərarının nəticəsidir. Bəyannamənin üzərində hərbi, hərbi-texniki, siyasi, təhlükəsizlik, humanitar və mədəni sahədə iki qardaş ölkənin əməkdaşlığını ən yüksək templərdə inkişaf etdirmək mümkündür. Yəqin ki, iki ölkənin rəhbərliyi bu unikal şansların maksimum reallaşdırılması fürsətini əldən verməyəcəklər.
Şuşa bəyannaməsi hazırda Azərbaycan-Türkiyə qardaşlığını bütün mənalarda əhatə edə bilir. Bəyannamə münasibətlərimizin hərbi qarşılıqlı müdafiə sazişi formasında rəsmiləşdirilməsinə geniş yol açır. Şuşa bəyannaməsinin ən böyük gücü odur ki, Azərbaycan-Türkiyə qardaşlığını, strateji birliyini və hərtərəfli tərəfdaşlığını regionumuzda hamının qəbul etdiyi faktor kimi təsdiqlədi. İndi iki ölkə məhz Şuşa bəyannaməsini əsas tutaraq Cənubi Qafqazda sülhə qarşı olan bütün təzahürlərə qarşı heç kimə hesabat vermədən birgə addımlar ata bilirlər. Eyni zamanda, Şuşa bəyannaməsi iki qardaş ölkəyə bütün Avrasiyanın inkişaf və təhkükəsizlik sxemlərini daim birlikdə yeniləşdirmək cəhdləri etməyə imkan verir.
Şuşa bəyannaməsinin nə zamansa Azərbaycan-Türkiyə qarşılıqlı hərbi müdafiə paktına çevriləcəyinə şübhə yoxdur. Onu da unutmaq olmaz ki, Şuşa bəyannaməsi bütün türk dünyasında hərtərəfli inteqrasiyanı tənzimləyə bilən sənəddir.
Türk dövlət başçılarının zirvə görüşlərinin birində Şuşa bəyannaməsinin nümunəsində türk dövlətlərinin ümumi əməkdaşlıq mexanizminin yaradılmasına yəqin ki, baxılacaq. Şuşa bəyannaməsi bütün türk dövlətlərinin mənafelərinə və inteqrasiya meyllərinə uyğun sənəddir.
Mən əminəm ki, bu bəyannamənin işlək olmayan bir sənədə çevrilməsini istəyən böyük qüvvələr var. Əslində belə qüvvələr bəyannamənin imzalandığı vaxtlarda da öz işlərində idilər. Lakin xoşbəxtlikdən Şuşa bəyannaməsini istəməyənlərin onun qarşısını almağa gücləri çatmadı. Bu mənada Şuşa bəyannaməsi Əliyevlə Ərdoğanın o zamankı düşmən siyasi qüvvələr üzərində qələbəsini təmin etmiş sənəddir".
Mətləb
