Rusiyanın "Vaqner" qrupu da İsrailə qarşı müharibəyə qoşulur - ABŞ-dan ŞOK İDDİA...
Xəbər verildiyi kimi, HƏMAS-ın silahlı qanadı İzzəddin əl-Qəssam Briqadaları oktyabrın 7-də İsrailə qarşı “Əqsa tufanı” adlı əməliyyata başlayıb. İsrailin HƏMAS-a cavab olaraq hava, quru və dənizdən başlatdığı genişmiqyaslı hücumlar Qəzzada vəziyyətin daha da ağırlaşmasına səbəb olub. Hücumlara cavab olaraq Hizbullah qruplaşması da Livandan İsrailə doğru raket hücumları təşkil edilir.
Bütün bu hücumlar fonunda xarici media diqqət çəkən iddia ilə çıxış edib. Belə ki, iddialara görə, Rusiyanın muzdlu qruplaşması “Vaqner” İsraillə müharibəyə kömək etmək üçün Livan Hizbullahına “Pantsir-S1” hava hücumundan müdafiə raket sistemi verməyə hazırlaşır.
Xarici mediada, "Vaqner" hələlik silahı Livana təhvil verməsə də, silahın HƏMAS-a kömək məqsədilə Qəzzaya da çatdırıla biləcəyi iddia edilib.
Wall Street Journal (WSJ) yazır ki, ABŞ rəsmilərinin kəşfiyyat məlumatlarına əsaslanan məlumatlara görə, Rusiyanın paramiliter təşkilatı "Vaqner" qrupu Livanın Hizbullah milis qruplaşmasına hava hücumundan müdafiə sistemi verməyi planlaşdırır. Bildirilib ki, Rusiyanın göndərməyi planlaşdırdıqları SA-22 sistemi təyyarələrin qarşısını almaq üçün zenit raketləri və hava hücumundan müdafiə silahlarından istifadə edir.
WSJ ABŞ rəsmilərinin Rusiyanın Ukraynaya təcavüzündə əsas rol oynayan "Vaqner" qrupunun İsrailə qarşı Hizbullaha zenit sistemləri verə biləcəyinə inandığını yazıb.
Hazırda bölgədə hava üstünlüyü tamamilə İsrailin əlindədir. Lakin hərbi ekspertlər Rusiyanın SA-22 sisteminin Hizbullaha veriləcəyi təqdirdə bölgədəki bu balansın İsrailə əleyhinə dəyişəcəyi qənaətindədir. Müşahidəçilərə görə, əgər bu baş tutsa, Hizbullah hava hücumundan müdafiə sistemi sayəsində İsrailin F-16 və F-35 döyüş təyyarələrini, həmçinin ballistik raketlərini və hipersəs raketlərini vura biləcək.
“Times of Israel”in yazdığına görə, İsrail uzun müddətdir ki, “Hizbullah”a qabaqcıl silahların ötürülməsinin qarşısını almaq üçün Suriyada hücumlar həyata keçirir.
"Pantsir" kimi də tanınan SA-22 təyyarələri, helikopterləri, İHA-ların ballistik raketlərini və qanadlı raketləri məhv edə bilən yük maşınına quraşdırılmış qısa mənzilli hava hücumundan müdafiə batareyasıdır.
Qeyd edək ki, Hizbullah lideri Həsən Nəsrullah sabah televiziya qarşısına çıxaraq oktyabrın 7-dən sonra ilk dəfə çıxış edəcək. Nəsrullahın çıxışından əvvəl bütün gözlər İsrail ordusu ilə Hizbullah arasında qarşılıqlı hücumların davam etdiyi Livan-İsrail sərhədinə çevrilib.
Tahir TAĞIYEV
