Rusiya məmuru Avropanın seçkilərini bəyənmədi - Azərbaycanda isə baxışlar haçalandı...
Avropa Parlamentinə seçkilər ciddi məhdudiyyətlər, ədalətli rəqabətin olmaması, informasiya sahəsinin alternativ informasiya mənbələrindən təmizlənməsi və anti-Rusiya kampaniyası şəraitində keçirilib. Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
Diplomat Rusiya ilə qarşıdurmaya qarşı çıxan siyasi qüvvələrin ayrıseçkiliyə, tez-tez təqiblərə məruz qaldığını vurğulayıb: “Brüsselin yeritdiyi siyasət və onun Aİ-də sosial-iqtisadi vəziyyət üçün nəticələri ilə razılaşmayan istənilən ifadə dərhal “Kremlin maraqlarına işləmək”lə eyniləşdirildi”.
Diplomatın sözlərinə görə, çətin şərtlərə baxmayaraq, bir çox avropalı seçici son illərdə “Aİ-nin əsas axını”nın yürütdüyü siyasətə qarşı çıxıb.
Bəlllidir ki, Qərb dairələri də Rusiyada keçirilən seçkiləri daim tənqid edir. Rusiyalı diplomatın Avropadakı seçkilərə verdiyi qiymət reallıqdan doğur, yoxsa geopolitik qarşıdurmadan doğan təzahürdür?
Elşən Mustafayev: “Zaxarovanın mövqeyini real qiymət yox, geopolitik ziddiyyətdən doğan fikirlər kimi dəyərləndirə bilərik”
Siyasi şərhçi Elşən Mustafayev “Bakı-Xəbər”ə açıqlamasında bildirdi ki, Rusiyanın özündə keçirilən seçkiləri bütün dünya tənqid edir: “Avropa Biriliyi adından da Rusiyadakı seçkilərlə bağlı bənzər fikirlər səslənir. Deyirlər ki, seçkilər müstəqil tənqidçilərin qorxudulması atmosferində, eləcə də beynəlxalq müşahidəçilərin qeyri-mövcudluğu şəraitində baş tutub.
AB Rusiyanın ATƏT müşahidəçilərinin imkanlarını ciddi məhdudlaşdırmaq haqqında qərarına daim təəssüf etdiyini deyib. Təbiidir ki, bütün bunların fonunda Zaxarovanın mövqeyini real qiymət yox, geopolitik ziddiyyətdən doğan fikirlər kimi dəyərləndirə bilərik”.
Mirkazım Seyidov: “Qərbdə demokratiya qalmayıb, sadəcə, bu məfhumla manipulyasiya edirlər”
Müstəqil siyasətçi Mirkazım Seyidov isə “Bakı-Xəbər”ə açıqlamasında tam fərqli fikirdə olduğunu bildirdi. Onun sözlərinə görə, bu elə əsl həqiqəti özündə ehtiva edən mövqedir: “Necə olur ki, Qərb bütün ölkələrə seçki saxtakarlığı bəhanəsi ilə müdaxilə edəndə olur, ancaq Rusiya rəsmisi oradakə seçki ilə bağlı mövqe ortaya qoyanda olmur? Bu, doğru məntiq deyil. Qərbin mövqeyini görmüşük. Azərbaycanda seçki mühitini saxta əsaslarla tənqid edirdi, ancaq Ermənistanda prezidentliyə namizədi küçənin ortasında güllələyirdilər, ona susurdu. Budur Qərbin seçkiyə yanaşması. Qərbdə keçirilən seçkiyə Zaxarovanın qiyməti obyektivdir. Zaxarova seçki mühitinin pis olduğunu dilə gətirib. Burda da həqiqət payı var. Fransa kimi ölkə demokratiyadan danışır, ancaq etirazçılara güllə atır. Qərbdə demokratiya qalmayıb, sadəcə, bu məfhumla manipulyasiya edirlər”.
Məhəmmədəli QƏRİBLİ
