Azərbaycan qazından imtinaya çağıran ermənilərə sərt zərbəni Bayden vurdu...
Arzuman Abdulkərimov: “Baydenin ünvanladığı təbrik məktubları sözügedən qlobal anti-Azərbaycan şəbəkəsinin məğlubiyyətinin rəmzi də sayıla bilər”
Amerika Birləşmiş Ştatlarının Prezidenti Cozef Bayden Azərbaycan Prezidenti İlham Əliyevə məktub ünvanlayıb. Məktubda deyilir:
“Hörmətli cənab Prezident.
Şadam ki, Azərbaycanın qlobal enerji məkanında transformasiyaya yol açan rolunu nümayiş etdirən Bakı Enerji Həftəsinə yenidən ev sahibliyi edirsiniz. Builki tədbirlər Bakının noyabr ayında həlledici COP29 tədbirinə ev sahibliyi etməyə hazırlaşdığı dönəmdə xüsusi əhəmiyyət kəsb edir. Temperatur artımının 1,5 dərəcədə saxlanılması hədəfinə nail olunması istiqamətində birgə işlədiyimiz bir vaxtda COP29 neft və qaz sektorunda metan tullantılarının məhdudlaşdırılması və təmiz enerji keçidinin irəlilədilməsi kimi əsas qlobal təşəbbüslərin inkişafı baxımından Azərbaycan üçün misilsiz imkan təqdim edir.
Azərbaycan xüsusilə Avropada qlobal enerji təhlükəsizliyinin mühüm sütunu olaraq qalır. Xəzər qazı getdikcə çoxsaylı ölkələrə ixrac edilir və bu da Avropa ölkələrinə enerji mənbələrinin şaxələndirilməsinə, kömürdən imtinanın sürətləndirilməsinə yardım edir. Azərbaycan öz enerji tarixində yeni səhifə açarkən təmiz enerji və metan tullantılarının azaldılmasına artan diqqət və sadiqlik məndə məmnunluq doğurur. Xəzərin sahib olduğu əhəmiyyətli külək enerjisi potensialı Azərbaycanın təmiz enerji ixracının neft və qaz ixracını üstələyəcək gələcəyə gətirib çıxara bilər.
Regional sabitlik və əlaqələr Birləşmiş Ştatlar üçün prioritet məsələlərdir. Onilliklərlə davam etmiş münaqişəyə son qoyacaq möhkəm və ləyaqətli sülh sazişi Cənubi Qafqazı transformasiya edəcək və Azərbaycanın regiondakı rolunu fundamental şəkildə dəyişəcək. Birləşmiş Ştatlar bu nəcib iddianı dəstəkləməyə hazırdır. Biz sülh və firavanlığın təmin edilməsinin əsas prinsiplər olaraq qəbul olunmasını gələcək nəsillərə borcluyuq.
Mən möhkəm ikitərəfli əlaqələrimizə yeni təkan vermək imkanını alqışlayıram və COP tədbirinin uğurla keçirilməsi üçün qarşıdakı aylarda birgə əməkdaşlıq etmək arzusundayam. Bakı Enerji Həftəsinin uğurla keçməsini diləyirəm”.
Göründüyü kimi, Bayden Azərbaycanın Avropanın enerji təminatında sütun rol oynadığını xüsusi olaraq vurğulayır. Bu, həm də dünya erməni lobbisinin məkrli niyyətlərinə verilən ən gözəl cavab və vurulan ən böyük zərbədir. Çünki onlar 44 günlük müharibənin gedişi və ondan sonrakı dönəmdə Avropa ölkələrinə Azərbaycan qazından imtina ilə bağlı müraciətlər edirdilər.
Siyasi şərhçi Arzuman Abdulkərimov “Bakı-Xəbər”ə açıqlamasında bildirdi ki,
burada vacib və diqqəti çəkən məqam odur ki, son bir həftədə Bayden ikinci dəfə Azərbaycana məktub yazır. Bu, dünyada çox nadir enerji toplantısıdır ki, ABŞ prezidenti təbrik göndərib: “Məktubda ABŞ-Azərbaycan münasibətləri, bu münasibətlərin pozmaq istəyən dairələrin iflasa uğramasına eyham önəmli məqamdır. Görünən odur ki, bu əlaqələri pozmağa çalışan erməni lobbi dairələri heç nəyə nail olmadılar. ABŞ bundan sonra da Azərbaycan-Ermənistan münasibətlərində neytrallığını qorusa, Bakı-Vaşinqton əlaqələri daha da inkişaf edəcək. Məktubda yer alan məqamlar da bunun xəbərçisidir. O baxımdan Baydenin ikinci məktubu Azərbaycana əvəzsiz tərəfdar kimi baxmasının ifadəsidir. Bu bir daha onu göstərir ki, Azərbaycanın rolu dünya üçün önəmlidir. Ermənilər çalışırdı ki, müəyyən əlaqələri vasitəsilə Azərbaycanla ABŞ arasında gərginlik yaratsınlar. Eyni zamanda Avropa ölkələrinə müraciət edirdilər ki, bizim enerji resurslarımızdan imtina etsinlər.
28 May təbrikində Azərbaycanın Avropanın enerji təhlükəsizliyində rolu ayrıca vurğulanmışdı. Eyni zamanda, Bakı və Vaşinqton arasında enerji təhlükəsizliyi, regional təhlükəsizlik və terrorçuluqla mübarizə də daxil olmaqla birgə maraqlara söykənən tərəfdaşlıq məxsusi qabarıdılırdı.
Eyni pozitiv ritorika Baydenin son müraciətində də davam etdirilir. İkinci məktub birincinin yaxşı mənada davamı, ölkəmizin bölgədəki lider rolunun etirafı sayıla bilər. Baydenin ünvanladığı təbrik məktubları sözügedən qlobal anti-Azərbaycan şəbəkəsinin məğlubiyyətinin rəmzi də sayıla bilər.
ABŞ-ın birinci şəxsinin Azərbaycanla əməkdaşlıq müstəvisini üstün tutması ABŞ-Azərbaycan ikitərəfli əlaqələrinin gələcəkdə daha da inkişafı üçün dəyərli mesajı özündə ehtiva edir”.
Məhəmmədəli QƏRİBLİ
