Ada dövlətləri üçün Azərbaycanın növbəti planı anons edildi...
Tural İsmayılov: “Azərbaycanın bu məsələdə qlobal təşəbbüslərdə liderliyi ələ alması tarixi əhəmiyyətə malikdir”
“Biz inkişafda olan kiçik ada dövlətləri ilə də fəal işləyirik. Biz onları dəstəkləmək üçün xüsusi fond yaratmağı planlaşdırırıq”. Bu sözləri Prezident İlham Əliyev iyunun 4-də Bakı Ekspo Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz - “Caspian Oil&Gas” və 12-ci Xəzər Beynəlxalq Energetika və Yaşıl Enerji - “Caspian Power” sərgilərinin açılış mərasimindəki çıxışında söyləyib.
“Çünki bizdə, Azərbaycanda iqlim dəyişikliyi problemdirsə, bu, həmin ada dövlətlərinin mövcudluğuna olan təhlükədir. Biz bu işə məsuliyyətlə yanaşırıq”, - deyə Prezident Əliyev əlavə edib.
Məsələ ilə bağlı “Bakı-Xəbər”ə şərh verən politoloq Tural İsmayılov bildirdi ki, Azərbaycan bu gün fərqli coğrafiyalarda olan kiçik ada dövlətlərinin problemlərini qlobal məkanda qaldırır və bu problemlərin həll edilməsi üçün qlobal təşəbbüslər irəli sürür: “Dünyanın bir çox böyük ölkəsi bu gün kiçik ada dövlətlərində və fərqli-fərqli coğrafiyalarda baş verən özbaşınalıqlara göz yumduğu halda, Azərbaycan kiçik ada dövlətlərinin məsələsini hətta siyasətinin gündəmində saxlayır. Bu gün neokolonializm hücumlarına məruz qalan kiçik ada dövlətləri dünya tərəfindən unudulmuş bir vəziyyətdədir. Ən böhranlı vəziyyətlərdə, qlobal iqlim dəyişikliyi problemlərində və bir çox məsələlərdə dünyanın böyük güc mərkəzlərinin kiçik ada dövlətlərinin əhalisinin problemlərinə biganə yanaşdığını görürük. Amma Bakı Enerji Həftəsi çərçivəsində Azərbaycan Prezidenti İlham Əliyevin ünvanladığı mesajlardan da bir daha aydın olur ki, Azərbaycan dünyanın ən vacib platformalarında kiçik ada dövlətlərinin problemlərini, onların üzləşdiyi çətinlikləri qabartmaqla məşğuldur”.
T.İsmayılov əlavə etdi ki, Azərbaycan təmsil olunduğu, ev sahibliyi etdiyi bütün platformalarda kiçik ada dövlətlərinin iqtisadi-siyasi problemləri, onların üzləşdiyi kolonial hücümlara qarşı həmişə müqavimətin ön cəbhəsində yer alır. “Ona görə də, hesab edirəm ki, Azərbaycanın bu məsələdə qlobal təşəbbüslərdə liderliyi ələ alması eyni zamanda tarixi əhəmiyyətə malikdir. Fikrimcə, dünya tarixində mütləq şəkildə böyük güclərin susduğu, danışmadığı məsələlərdə Azərbaycanın göstərdiyi təşəbbüslər və qlobal liderlik cəhdləri kifayət qədər böyük diqqətlə qarşılanır və qarşılanacaq” - deyə T.İsmayılov qeyd etdi.
İradə SARIYEVA
