KTMT hələ xəyallardadır - Ermənistanın KTMT-də qaranlıq nəyi qalıb ki...
Ramil Məmmədli: “KTMT-də və Rusiyada belə bir yanlış yanaşma var ki, Nikol Ermənistan demək deyil”
“Kollektiv Təhlükəsizlik Müqaviləsi Təşkilatı (KTMT) İrəvanın təşkilatla münasibətinə aydınlıq gətirəcəyinə ümid edir”. Bunu KTMT Parlament Assambleyası (PA) Şurasının iclasında təşkilatın baş katibi İmanqali Tasmaqambetov deyib.
“Ümid edirik ki, respublikanın siyasi rəhbərliyi KTMT ilə münasibətlərinin perspektivlərinə aydınlıq gətirəcək. Bu, ilk növbədə gələcək birgə fəaliyyətlərin tam planlaşdırılması üçün təşkilatın bütün iştirakçılarının xeyrinə olardı”, - o deyib.
Baş katib onu da qeyd edib ki, son bir il ərzində Ermənistan təşkilatın tədbirlərində iştirakını nəzərəçarpacaq dərəcədə azaldıb: “Bununla belə, Ermənistan təşkilatın tamhüquqlu üzvü olaraq qalır, bu ölkə qarşısında bütün öhdəliklər tam şəkildə saxlanılır”.
Görünən odur ki, KTMT-də hələ də ümidlidilər ki, Ermənistan təşkilatla münasibətlərinin perspektivini aydınlaşdıracaq. Yəni doğrudanmı Ermənistanın bu təşkilatla münasibətlərində aydın olmayan, qaranlıq nəsə var?
“Bunlar anlamaq istəmirlər ki, Paşinyan hakimiyyətdə olduğu müddətdə bu baş verməyəcək”
Sözügedən məsələyə aydınlıq gətirən hərbi ekspert Ramil Məmmədlinin fikrincə, əslində Ermənistanla KTMT arasında qaranlıq bir şey yoxdur: “Hər şey ortadadır. Ermənistan KTMT-dən uzaqlaşmaq üçün 2021-ci ildən bu təşkilatı ittiham edir. İttiham üçün də yeganə bəhanə odur ki, 44 günlük müharibədə qurum Ermənistana yardım etməyib. Guya Azərbaycan Ordusu Ermənistan ərazisinə daxil olub və s. Ancaq hamı bilir ki, deyilənlərin nə hüquqi, nə də hərbi-siyasi əsası var. Ermənistan KTMT-dən aralanmaq üçün ardıcıl olaraq təşkilatı iqnor edir. KTMT tədbirlərinə qatılmır, öhdəliklərini yerinə yetirmir, təlimlərində iştirak etmir. Bütün bunlarla yanaşı, KTMT-dən rəsmən çıxmır və formal olaraq qurumda təmsil olunur. Bunun da yeganə səbəbi Rusiya amilidir. Çünki Paşinyan Moskvadan çəkinir. KTMT rəhbərliyi isə hələ də ümid edir ki, Ermənistan haçansa qurumda yaxından təmsil olunacaq. Bunlar anlamaq istəmirlər ki, Paşinyan hakimiyyətdə olduğu müddətdə bu baş verməyəcək. Nəinki Paşinyan, mövcud komanda hakimiyyətdə qaldıqca, Ermənistanın KTMT-də mövcudluğu formal xarakterli olacaq. Hətta istisna etmirəm ki, Ukrayna müharibəsinin gedişindən asılı olaraq Ermənistan hərbi təşkilatdan çıxa da bilər. Ancaq KTMT-də və Rusiyada belə bir yanlış yanaşma var ki, Nikol Ermənistan demək deyil və Paşinyandan sonra Ermənistan yenidən Rusiya ilə sıx münasibətlər quracaq. Ancaq nəzərə almırlar ki, keşiş Baqratın rəhbərliyi ilə keçirilən etiraz aksiyaları nəticə vermədi. Çünki cəmiyyət revanşist müxalifətə etibar etmir. Erməni cəmiyyəti də anlayır ki, Köçəryanla Sarkisyan yenidən hakimiyyətə gəlsə belə, Qarabağı ələ keçirmək mümkün deyil”.
Vidadi ORDAHALLI
