Müdafiə Nazirliyində 143 milyon yeyinti - kiçik məmurlar "çox böyük iş" görüblər...
Müdafiə Nazirliyində 143 milyonluq mənimsəmə faktı ilə bağlı müxtəlif hərbi hissələrdə çalışmış daha iki maliyyə xidmət rəisi həbs edilib.
Dövlət Təhlükəsizliyi Xidmətində davam edən cinayət işi çərçivəsində müxtəlif hərbi hissələrdə maliyyə xidmət rəisi vəzifəsində çalışmış Cəbrayıl Orucov və Vahid Novruzlu təqsirləndirilən şəxs qismində cəlb edilib. Onların hər ikisi barəsində Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham verilib.
DTX-nin İstintaq baş idarəsi tərəfindən sabiq maliyyə xidmət rəisləri barəsində həbs qətimkan tədbiri seçilməsi ilə bağlı məhkəməyə vəsatət verilib.
Bakı Hərbi Məhkəməsi tərəfindən hər iki şəxs barəsində 4 ay həbs qətimkan tədbiri seçilib. Hər iki şəxsin istintaqı və məhkəmə baxışı davam edən işlər üzrə dövlət büdcəsinə dəymiş ziyanı hazıradək ödəmədiyi üçün barələrində hüquqi məsuliyyət tədbirlərinin görüldüyü məlum olub.
Qeyd edək ki, bu iş üzrə uzun müddətdir məhkəmə prosesi keçirilir. İttihama görə, bir qrup yüksək vəzifəli zabit Azərbaycanın müdafiə xərcləri üçün dövlət büdcəsindən ayrılan külli miqdarda vəsaiti ələ keçirməkdə təqsirli bilinir. Hazırda həbsdə olan general-mayor Nizami Məmmədov məhkəmə qarşısında tək deyil. O, Hərbi Hava Qüvvələrinin (HHQ) Maliyyə Xidmətinin keçmiş rəisi, polkovnik Cəlal Kazımov, Quru Qoşunların Maliyyə İdarəsinə rəhbərlik etmiş Bayram Bayramov və bu idarənin zabiti Vüsal Əlizadə ilə birlikdə mühakimə olunur.
İttihama görə, müttəhimlər 5 il ərzində Müdafiə Nazirliyinə dövlət büdcəsindən ayrılan 143 milyon manat yeyintiyə yol veriblər. Söhbət hərbi hissələrə, hospitala, hərbi liseyə, ali hərbi məktəbə və başqa qurumlara ərzaq və avadanlıq alınarkən yol verilən yeyintilərdən gedir.
Bir müddət əvvəl Müdafiə Nazirliyinin Satınalmalar və Təchizat İdarəsinin sabiq rəisi Məlikməmməd Qurbanov bu iş üzrə dindirilərkən maraqlı faktlar açıqlayıb.
Qeyd edək ki, Məlikməmməd Qurbanov Müdafiə Nazirlində baş verən 143 milyon manatlıq yeyinti cinayət işi üzrə Dövlət Təhlükəsizliyi Xidmətində aparılan istintaq zamanı məsuliyyətə cəlb olunub. Sonradan onun barəsində olan cinayət işi ayrıca icraata götürülüb və hazırda cinayət işinə məhkəmədə baxılır. Sabiq idarə rəisi ifadəsində bildirib ki, işlədiyi dövrdə iki dəfə Maliyyə və Büdcə İdarəsinin rəisi işləmiş Nizami Məmmədova pul verib: “Nəcməddin Sadıkov məni kabinetinə çağıraraq, 2018-ci ildə 300 min, 2019-cu ildə isə 500 min manat verdi ki, Nizami Məmmədova çatdırım. Mən də onun tapşırığını icra etmişəm. Bu pulun hansı səbəbdən verilməsindən xəbərim olmayıb. Mən baş qərargah rəisinin göstərişlərini icra etmişəm. Hansı şirkətlərlə müqavilə bağlamaq lazımdır, buna da baş qərargah rəisi göstəriş verib. Şirkətlərdən gələn təkliflər, eyni zamanda bağlanan müqavilələrlə bağlı baş qərargah rəisinə məruzə etmişəm. Baş qərargah rəisi də məni çağırıb deyirdi ki, hansı şirkətlə müqavilə bağlamaq olar, hansı ilə olmaz. Şirkətlərlə bağlı komissiya 12 nəfərdən ibarət olub. Burda bir neçə nazirliyin nümayəndəsi təmsil olunub. Komissiyanın sədri isə mənim müavinim idi. Tenderlərdə əsasən “Azərsun holdinq” və onun törəmə şirkətlərinə iştirak etmək icazəsi verilib”.
Göründüyü kimi, bu işdə nazirliyin sabiq baş qərərgah rəisi Nəcməddin Sadıqovun da adı əsas fiqur, hətta demək olar ki, təşkilatçı kimi keçir. İttiham olunan zabitlər onunla bağlı açıq və detallı açıqlamalar verir. Məntiqlə götürsək, 143 milyon vəsaiti hansısa xırda işçilərin mənimsəməsi qəribə görünür. Bu cinayətdə mütləq mənada ən yüksək vəzifəli şəxslərin məlumatı və ya iştirakı olub. Onların hazırda azadlıqda qalması heç də o demək deyil ki, məsuliyyətdən tam kənarda qala biləcəklər. Görünən budur ki, bir qrupun məhkəməsi gedirsə orada açıqlanan faktlarla bağlı araşdırmalar aparılır, hətta yeni məsuliyyətə cəlb olunanlar da var. Deməli, ipin bir ucu 143 milyonun mənimsənilməsində əli olan yüksək cinli zabitlərə də gedib çıxacaq. Məhkəmədə onların adları çəkilirsə, deməli, bu məsələyə mütləq mənada obyektiv, hüquqi qiymət veriləcək.
Məhəmmədəli QƏRİBLİ
