Azərbaycan iqlim probleminin həllinə əməli dəstəyini davam etdirir - neft rəqəmi dəyişmədi...
Xalid Kərimli: “...Qlobal iqlim dəyişikliyi ilə mübarizəyə bir töhfədir”
Neft İxrac edən Ölkələr Təşkilatına (OPEC) üzv və qeyri-üzv ölkələrin nazirlərinin onlayn formatda 37-ci iclasında “Əməkdaşlıq Bəyannaməsi”nin müddətinin 2025-ci il yanvarın 1-dən dekabrın 31-dək uzadılması ilə bağlı qəbul edilmiş qərarı Azərbaycan da dəstəkləyib.
Yeni qərar “OPEC plus” ölkələrində mövcud xam neft istehsal səviyyəsinin gələn il sabit saxlanılmasını, üç müstəqil mənbə tərəfindən istehsal göstəricilərinin qiymətləndirilməsinin 2025-ci ilin noyabrın sonuna qədər uzadılmasını və bu nəticələr əsasında 2026-cı il üçün yeni baza səviyyəsinin müəyyənləşdirilməsini nəzərdə tutur. Yeni qərara uyğun olaraq gələn il Azərbaycanın 551 min barrel həcmində gündəlik xam neft hasilat kvotası dəyişməz qalır.
Əlbəttə, Azərbaycanın xam neft istehsalı səviyyəsini gələn il üçün dəyişməz saxlaması iqlim dəyişikliyinə bir töhfədir.
Mütəxəssislər qeyd edirlər ki, dünyanı təhdid edən iqlim dəyişikliyi ilə mübarizədə Azərbaycanın xüsusi yeri var. Ekspertlərə görə, ölkəmizdə də iqlim dəyişikliyinə qarşı çox həssas münasibət var. Mütəxəssislər deyirlər ki, Azərbaycan neft-qaz ölkəsi olmaqla yanaşı, həm də “yaşıl enerji” istiqamətində qarşıya qoyduğu məqsədlərə doğru irəliləyir. “Yaşıl enerji”yə keçid ölkəmizin əsas hədəflərindən biri kimi diqqəti çəkir.
Neft-qaz hasilatçılığından tədricən “yaşıl enerji” istehsalçısına çevirilmədə olan Azərbaycan bu yolla iqlim dəyişikliklərinə böyük töhfə verməkdədir. “Yaşıl enerji” sektorunda Azərbaycanın reallaşdırdığı layihələr çoxdur.
“Bunun özü də bir dəstəkdir”
İqtisadçı ekspert Xalid Kərimli “Bakı-Xəbər”ə şərhində “Azərbaycanın “yaşıl enerji” sahəsindəki sistemli addımları qlobal iqlim dəyişikliyi ilə mübarizəyə bir töhfədir. Ölkəmizdə külək, günəş, su enerjisi sahəsinə böyük investisiyalar qoyulur. Bunun özü də bir dəstəkdir”-deyə bildirdi.
X.Kərimli həmçinin bildirdi ki, bu, “OPEC plyus”un dünya enerji bazarında qiyməti tənzimləmək siyasətinin davamıdır. O, vurğuladı ki, “OPEC plyus” qəsdən hasilatı azaltmır, bazardakı qiymətləri tənzimləmək, bazarda həddən artıq təklifin qarşısını almaq üçün bu addımı atır. “Azərbaycan da “OPEC plyus” layihəsində iştirak edir. Bu baxımdan, Azərbaycan üçün hasilatda stabilləşmə maraqlıdır. 2010-cu ildən sonra Azərbaycanda hasilat təbii surətdə azala-azala gedir. Azərbaycanın ümumdaxili məhsulunun çox aşağı artmasının və yaxud da artmamısının səbəblərindən biri də nefty hasilatının azalmasıdır. Bu baxımdan, təbii addımdır”-deyə X.Kərimli qeyd etdi.
Belə nəticəyə gəlmək olur ki, Azərbaycan iqlim probleminin həlli üçün əməli dəstəyini davam etdirir. Bu səbəbdən də rəqəm dəyişmədi. Yəni Azərbaycanın 551 min barel həcmində gündəlik xam neft hasilat kvotasının dəyişməz qalması doğrudan da iqlim dəyişikləri ilə mübarizəyə verilən dəstəyin tərkib hissəsində yer alır. Onu da qeyd edək ki, bu dövrdə həm də “yaşıl enerji” sektorunda böyük canlanma yaranacaq. İqlim dəyişikliyi ilə mübarizə, bərpaolunan enerji ehtiyatlarından səmərəli istifadə ölkəmizin əsas hədəflərindən biridir və bu özünü bütün proseslərdə göstərir.
Əli TURABOV
