Ermənistanın Müdafiə Nazirliyində ABŞ-ın hərbi müşaviri təyin olundu - Rusiya necə dözəcək...
Hüseyn İbrahimov: “Rusiya bunu sona qədər həzm etməyəcək”
ABŞ Ermənistan, Ukrayna, Moldova və Balkan ölkələrinin müdafiə nazirliklərinə xüsusi müşavirlər göndərir. Qeyd olunub ki, məqsəd həmin ölkələrin ordusunu Amerika qüvvələrinə uyğunlaşdırmaq və Rusiya modelindən uzaqlaşdırmaqdır.
Bununla yanaşı, Ermənistan müdafiə naziri Suren Papikyan da Brüsseldə Avropa Birliyi Hərbi Komitəsinin sədri general Robert Briqerlə görüş keçirib. Ermənistan Müdafiə Nazirliyinin bununla bağlı yaydığı məlumatda deyilir: “Görüşdə qarşılıqlı maraq doğuran sahələrdə əməkdaşlığın inkişaf etdirilməsi ilə bağlı razılıq əldə olunub. Müdafiə naziri Ermənistan silahlı qüvvələrinin islahatlarının gedişini təqdim edib. Həmçinin regional təhlükəsizliklə bağlı məsələlər müzakirə edilib”.
Ukrayna ilə Moldovanı, Balkan ölkələrini anladıq. Bunların bir qismi NATO-ya üzvdür, Ukrayna ilə Moldova da alyansa üzv olmağı qarşılarına məqsəd qoyublar. Belə olan halda KTMT üzvü olan Ermənistanın bu müşavirləri qəbul etməsi, Rusiya modelindən uzaqlaşmaq yolu tutması nə deməkdir?
Sözügedən məsələni “Bakı-Xəbər”ə şərh edən İdarəetmə Akademiyasının müəllimi, sosioloq Hüseyn İbrahimovun fikrincə, Ermənistan odla oynayır: “Məsələ ondadır ki, Ermənistan sıradan bir ölkə deyil. Ermənistan hansısa hərbi blokda təmsil olunmasaydı, o zaman bu dövlətin Birləşmiş Ştatlarla yaxınlaşmasını görməzdən gəlmək olardı. Ancaq məsələ ondadır ki, Ermənistan KTMT-də təmsil olunur. Rusiya-Qərb münasibətlərinin necə kəskin olması isə ortadadır. Söhbət Ukrayna müharibəsi ilə əlaqədar olaraq tərəflər arasında yaşanan konfrantasiyadan gedir. Belə bir şəraitdə Ermənistan ABŞ hərbçiləri ilə birgə hərbi təlimlər keçirir. Ötən ilin avqustunda bu təlimlər keçirilib. Aprelin 5-də Brüsseldə Avropa Komissiyasının prezidenti Ursula von der Leyen, ABŞ dövlət katibi Antoni Blinken və Ermənistanın baş naziri Nikol Paşinyan üçtərəfli görüş keçirib. Brüsseldə üçtərəfli formatda keçirilmiş Blinken-Paşinyan-Leyen görüşündə əsas diqqət mərkəzində kapitulyant ölkəyə hərbi dəstəyin verilməsi olub - rəsmən bəyan edilməsə də. İndi də ABŞ hərbi müşavirlərini Ermənistana göndərir. Ona görə də burada hərbi məsələlərlə yanaşı, məsələnin siyasi tərəfləri də var. Siyasi tərəfləri odur ki, ABŞ Ermənistanı Rusiyanın təsir dairəsindən çıxarmağa çalışır. Hərbi müşavirləri ona görə göndərir ki, Ermənistan ordusu NATO standartları əsasında formalaşdırılsın. Nəzərə alsaq ki, Ermənistanda Rusiyanın hərbi bazaları var, o zaman müşavirlərin ora göndərilməsi birbaşa Moskvanın maraqlarına qarşı yönəlmiş addımdır. Ona görə də Rusiya bunu sona qədər həzm etməyəcək. Ukrayna müharibəsinə başı nə qədər qarışsa da Kreml Ermənistanda gedən prosesləri izləyir. Ona görə də Ermənistanın bu siyasi oyunları regionda gərginliyin yaranmasına səbəb ola bilər. Çünki Ermənistan bütün vasitələrlə kənar oyunçuları bölgəyə gətirməyə can atır”.
Vidadi ORDAHALI
