İki erməni Avropa Parlamentini korrupsiya torunda batırır - ortada Ermənistan qazanır...
Qulamhüseyn Əlibəyli: “Təkcə mənfi münasibətlə əlaqədar ölkəmizə qarşı 8 qətnamə qəbul olunması real deyil”
Məlum olduğu kimi, mayın 29-da Belçika polisinin "Russiagate" işi ilə bağlı Avropa Parlamentinin ofisində apardığı axtarışda rüşvət halları aşkarlanıb. Məlum olub ki, Avroparlamentin deputatlarına Rusiya təbliğatının "Avropanın səsi" saytı vasitəsilə irəlilədilməsinə görə rüşvət verilirmiş.
Qurumun növbəti rüşvət biabırçılığı isə avroparlamentarilərin pul qarşılığında "Avropanın səsi" saytında Rusiyanı təbliğ etmələrinin aşkarlanması oldu.
O da məlumdur ki, rüşvətxor avroparlamentarilərin ən yağlı müştəriləri arasında erməni lobbisi xüsusi yerə sahibdir. Onların Belçikadakı əsas siması Kaspar Karapetyan öz biznesini, qanunsuz almaz qaçaqçılığı da daxil olmaqla, müxtəlif qeyri-leqal biznes fəaliyyətləri hesabına qurub. Adı mafiya əməllərində də hallanan Karapetyan Ermənistanın və özünün biznes maraqlarının müdafiəsi üçün avropalı məmur və deputatlara bu vaxtacan milyonlarla vəsait paylayıb. AP deputatlarına külli miqdarda rüşvət verən daha bir erməniəsilli oliqarx isə Vartan Sirmakesdir. İsveçrə vətəndaşı olan Sirmakes işğal dövründə Qarabağda bank sektoru, kənd təsərrüfatı, mədən sənayesi kimi müxtəlif sahələrdə tamamilə qanunsuz biznes fəaliyyətləri göstərib və Azərbaycanın sərvətlərini talayaraq öz biznes imperiyasını genişləndirib.
Görünən odur ki, AP-də korrupsiya şəbəkəsini quran əsasən ermənilərdir və bu qurum dalbadal Ermənistanın xeyrinə, Azərbaycanın əleyhinə qətnamələr qəbul edir. Məsələn, Vətən müharibəsindən sonra - konkret olaraq 2021-ci ildən bəri AP müxtəlif bəhanələr altında Azərbaycana qarşı 8 qətnamə qəbul edib. O baxımdan, bu iki istiqamətdə sənədlərin qəbul olunmasında AP-dəki korrupsioner erməni şəbəkəsinin nə kimi rolu var?
“O üzdən, Azərbaycana qarşı Avroparlamentin mövqeyi ilə korrupsiya faktları bir-biri ilə uzlaşmış olur”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli hesab edir ki, Azərbaycana qarşı qətnamələrin qəbul olunmasında erməni lobbisinin xüsusi rolu var: “Əvvəla, Avropa İttifaqının Azərbaycana münasibəti bir neçə amillə şərtlənir. Birinci növbədə, Avropa Parlamenti Azərbaycanın 44 günlük müharibədə qələbəsini həzm edə bilmir. Azərbaycanın öz ərazi bütövlüyünü bərpa etməsini, işğal olunmuş əraziləri azad etməsini həzm edə bilmir. Həmçinin Azərbaycanın və Türkiyənin regionda söz sahibi olmasını, Avroittifaqın isə regiondan faktiki olaraq çıxmasını qəbul edə bilmir. Bu amil var və bunu mütləq nəzərə almaq lazımdır. Eyni zamanda, Avroparlament ən çox korrupsiyalaşmış qurumlardan biridir. Biz bunun son bir neçə ildə dəfələrlə şahidi olmuşuq. Avroparlamentin müxtəlif qurumlarında, təsisatlarında müxtəlif deputatlar tərəfindən rüşvətlə işgörmə halları xeyli artıb. Təbii ki, erməni diasporu da bundan yararlanmağa çalışır. Bu baxımdan Azərbaycana qarşı olan deputatların rüşvətlə ələ alınması halları artıb. Azərbaycanla bağlı hələlik konkret faktlar olmasa da, Rusiya ilə bağlı konkret faktlar aşkarlanır. Nəzərə almaq lazımdır ki, təkcə mənfi münasibətlə əlaqədar olaraq Azərbaycana qarşı 8 qətnamə qəbul olunması real deyil. Bunun arxasında həm də erməni diasporunun rüşvət amili dayanır. Arada ciddi korrupsiyalaşma amili var ki, erməni diasporu ölkəmizə qarşı qətnamələrin qəbul edilməsinə nail ola bilir. Yoxsa həmin qərəzli qətnamələri belə tez-tez qəbul etmək mümkün olmazdı. O üzdən, Azərbaycana qarşı Avroparlamentin mövqeyi ilə korrupsiya faktları bir-biri ilə uzlaşmış olur. Çünki korrupsiya amili bu mövqeyin daha da sərtləşməsinə, tezləşməsinə, sürətlənməsinə gətirib çıxarmış olur. O baxımdan güman edirəm ki, Azərbaycanla bağlı konkret korrupsiya faktları ortaya çıxacaq”.
Vidadi ORDAHALLI
