YUNESKO qədim İrəvanın taleyinə hələ də laqeydlik edir...
Zaur İbrahimli: “Ermənilər azərbaycanlılara aid mədəni tarixi irsin silinməsini sistemli hala salıb”
Azərbaycan vətəndaş cəmiyyətinin təmsilçiləri (QHT) UNESCO-nun Baş direktoru Odre Azuleyə (Audrey Azoulay) İrəvanın qədim Təpəbaşı məhəlləsi ilə bağlı açıq məktub ünvanlayıb. QHT-lər Ermənistanda Azərbaycan xalqının maddi mədəni irsinin dağıdılmasını dayandırmaq üçün hərəkətə keçməyə çağırıb.
Məktubda azərbaycanlıların tarixən yaşadığı Ermənistanda azərbaycanlılara məxsus bütün irsə münasibətdə məhvetmə siyasəti aparıldığı, tarixi izlərin silinməsinə cəhd edildiyi bildirilib.
Sənəddə vurğulanıb ki, Ermənistan hakimiyyətinin, Təpəbaşı daxil olmaqla, mədəniyyət abidələrinə qarşı təcavüzü İqtisadi, Sosial və Mədəni Hüquqlar Haqqında Beynəlxalq Pakta, Ümumdünya mədəni və təbii irsin qorunması, Qeyri-maddi mədəni irsin qorunması, İrqi ayrı-seçkiliyin bütün formalarının aradan qaldırılması haqqında konvensiyalara zidd fəaliyyətdir.
“Erməniləri dayandırmasaq, onlar tarixi silmək cəhdlərindən əl çəkən deyillər, bu səbəbdən də onlara qarşı təsirli tədbirlər görülməlidir”
Məktubu imzalayan "Prioritet" Sosial İqtisadi Araşdırmalar Mərkəzi İctimai Birliyinin sədri Zaur İbrahimli “Bakı-Xəbər”ə açıqlamasında qeyd etdi ki, Azərbaycan Vətəndaş Cəmiyyəti dəfələrlə Ermənistanın Azərbaycan mədəni irsinin dağıdılması, tarixi izinin silinməsi ilə bağlı beynəlxalq təşkilatlara müraciət edib: “Bu səfərki müraciət tarixən azərbaycanlıların yaşadığı İrəvan şəhərinin Təpəbaşı adlı qədim məhəlləsi ilə bağlıdır. Hazırda ermənilər həmin məhəllənin adını dəyişdirib və orda olan məscid, qəbiristanlıqları dağıdır. Bu isə tarixi izlərin silinməsinə göstərilən cəhddir. Hesab edirəm ki, UNESCO və digər beynəlxalq təşkilartlar ermənilərə dur deməlidir. Ermənilər azərbaycanlılara aid mədəni tarixi irsin silinməsində sistemli hala salıb. Demək olar ki, dövlət səviyyəsində bu siyasət aparılır. Çox təəssüf ki, Ermənistanda 1870-ci ildə qeydiyyatdan keçən 269 məsciddən bu gün yalnız 1-i qalıb. Bundan əlavə 30 illik işğal dövründə Qarabağ bölgəsində olan706 tarixi abidənin əksəriyyəti dağıdılıb. Baxmayaraq həmin abidələrdən 11-i beynəlxalq əhəmiyyətli abidə kimi qeydiyyata alınmışdı. Qarabağ müharibəsi nəticəsində 400-ə yaxın abidə dağıdılıb. Bütün faktlar onu göstərir ki, Azərbaycan vətəndaş cəmiyyəti öz narazılığını bildirməkdə haqlıdır. UNESCO və digər beynəlxalq təşkilatlar məlum məsələ ilə bağlı hərəkətə keçməlidir. Erməniləri dayandırmasaq onları tarixi silmək cəhdlərində əl çəkən deyillər. Bu səbəbdən də ermənilərə qarşı təsirli tədbirlər görülməlidir”.
Z.İbrahimli onu da əlavə etdi ki, Azərbaycan vətəndaş cəmiyyətləri məlum problemlə bağlı UNESCO ilə əməkdaşlıq etməyə hazırdır. O cümlədən, digər ixtisaslaşmış beynəlxalq təşkilatlarla da əməkdaşlıq edilməlidir. Bu istiqamətdə Azərbaycan QHT-lərinin fəaliyyəti davam edəcək: “Ermənilərin tarixi məhv etməsinə göz yummayacağıq. Bu istiqamətdə daha təsirli tədbirlər, işlər görüləcək”.
Günel CƏLİLOVA
