AB-nin bütün 27 ölkəsini Ermənistana gətirirlər - Birlik ilin sonunda qərar verəcək...
Turab Rzayev: “Ermənistan ərazisində Rusiya hərbi bazasına qarşı bir əks qüvvə yaradılır”
Aİ Ermənistandakı missiyasını genişləndirməkdə qərarlıdır. Aİ-nin Ermənistandakı Müşahidə Missiyasının rəhbəri Markus Ritter bəyan edib ki, Aİ-nin Ermənistandakı Müşahidə Missiyasının tərkibinin genişləndirilməsi məsələsi bu ilin sonuna qədər Brüsseldə müzakirə olunacaq. Ritter hazırda Müşahidə Missiyasına Aİ üzvlərindən 23 ölkənin nümayəndələrinin daxil olduğunu vurğulayaraq, Missiyanın Aİ-yə üzv olan 27 ölkənin hamısının nümayəndələrinin daxil olması ehtimalının olduğunu əlavə edib:
“Missiyanın genişləndirilməsi məsələsi ilin sonuna qədər Brüsseldə müzakirə olunacaq. Nəticələri gözləməliyik. Ancaq əvvəllər deyildiyi kimi, hazırda burada baş verənlərə görə bu missiyaya böyük siyasi diqqət yetirilir”. Aİ-yə üzv olmayan üçüncü ölkənin Aİ-nin Ermənistandakı Missiyasına qoşulmasının mümkünlüyü məsələsinə toxunan Ritter Kanadanın Aİ-nin müşahidə missiyasına qoşulma qərarını xatırladaraq, digər ölkələrdən də analoji maraq olacağı halda bu məsələnin Brüsseldə müzakirə olunacağını deyib. 20 sentyabrdan sonra Azərbaycan-Ermənistan sərhədində atəşkəs pozulmur. O zaman müşahidəçilərin sayı niyə artırılır?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Avropa İttifaqının Ermənistanda bu və ya digər şəkildə öz hərbi varlığını artırmaqda maraqlı olduğu aydın şəkildə görünür: “Ermənistanda bunu əsasən mülki missiya üzərindən edir. Mülki missiya da kifayət qədər hərbiləşib. Onun tərkibində 80-90-a yaxın Fransa jandarmı, Almaniya, Hollandiya, Belçikadan polis qüvvələri var. Fransa jandarmı Fransa ordusunun tərkib hissəsidir, Fransa Müdafiə Nazirliyinə tabedir. Faktiki olaraq hərbi missiyadır və orada iştirak edən şəxslərin sayı da artıb. Hətta 1000-dən çox şəxsin olacağı iddiaları da var. Faktiki 200 nəfər nəzərdə tutulsa da, oraya əlavələr, yenidən gələnlər, yerli əməkdaşlar cəlb olunub. 6 ofislə başlamışdılar, indi ofis sayları da artıb. Demək olar ki, aktiv şəkildə hərbi kontingent formalaşdırırlar. Yəni Rusiyanın və ABŞ-ın Suriyanın şimalındakı patrul xidmətindən, hərbi qüvvələrindən Ermənistan-Azərbaycan sərhədində olan patrul xidmətinin texniki olaraq fərqi yoxdur. Adını qoymasalar da, burada bir kontingent yerləşdirirlər və patrul xidməti həyata keçirirlər. Burada iki məqsəd var. Baxmayaraq ki, Azərbaycanın Ermənistanla münasibətləri səngiyib, gözləyə bilərlər ki, potensial toqquşma anı yenidən baş versin. Çünki Azərbaycan-Ermənistan sərhədi delimitasiya- demarkasiya olunmayıb, konkret sərhəd xətləri yoxdur. Ona görə də, təxribatlara açıqdır. Ola bilsin, gözləyirlər ki, hər hansı bir tərəfdən sərhəd münaqişəsi olarsa, orada müşahidəçi qismində vəziyyəti qeyd etsinlər, yaxud da müdaxilə imkanlarını da nəzərdən keçirə bilərlər. Ancaq müşahidəçi kimi çıxış edib nə formada raport yazacaqlar, o da bəlli deyil. Çünki bundan əvvəlki iki aylıq, 40 nəfərdən ibarət mülki missiyanın hələ də verdikləri raportlara diqqət etməmişik. İkinci məqam isə, Rusiyaya qarşı istifadə edilmək üçün yerləşdirilə bilər. Çünki Qərb kütləvi və sürətli şəkildə Ermənistanı silahlandırır. Biz bunu görürük. Hərbi təlimləri, Fransa ilə təhlükəsizlik təlimlərini göstərə bilərik. Hərbi texnikalar gətirildi, Fransa Ermənistana havadan müdafiə sistemləri aldı. Bunu kimə qarşı alır, bəlli deyil. Xüsusilə hərbi büdcəsi çox az olan, iki dəfə müharibədə məğlub olmuş bir ölkə bu qədər silahlanmanı nə üçün edir? Birinci məqam Azərbaycana qarşı edirsə, digər tərəfdən də Rusiyaya qarşı ola bilər. Düşünürəm ki, Ermənistan ərazisində Rusiya hərbi bazasına qarşı bir əks qüvvə yaradılır. Sabah Ermənistan Rusiya bazasının çıxarılmasını tələb etsə, Rusiya buna qarşı çıxarsa, Ermənistan ərazisində buna uyğun balans formalaşdırılacaq. Bu da versiyalardan biridir”.
Məhəmmədəli QƏRİBLİ
