Rusiya-Azərbaycan yeni dəmiryollarının anonsu verildi...
Vüqar Bayramov: “Bu, həm regional, həm də müasir çağIrışlar baxımından yeni zərurətə çevrilib”
“Yükgöndərənlərin tələbatları bizə bu yolun yeni hissələrinin inşa edilməsinin zəruriliyini diqtə edir ki, biz bu yolda yük daşımalarını artıra bilək”. Bunu Prezident İlham Əliyev Rusiya Prezidenti Vladimir Putinlə birlikdə Baykal-Amur Magistralının (BAM) 50 illik yubileyi münasibətilə dəmir yolu sahəsinin veteranları və işçiləri ilə birgə görüşündə bildirib.
Ölkə başçısının sözlərinə görə, “Şimal-Cənub” nəqliyyat dəhlizi ilə bağlı məsələni Putinlə bir daha ətraflı müzakirə ediblər: “Hökumət üzvlərinə müvafiq təlimatlar verilib. Əminəm ki, yaxın vaxtlarda bütün məsələlər razılaşdırılacaq və biz daha bir möhtəşəm layihənin icrasına başlayacağıq. Bildirməliyəm ki, Azərbaycan ərazisində Azərbaycan-Rusiya sərhədini Azərbaycan-İran sərhədi ilə birləşdirən dəmir yolu mövcuddur. Lakin yükgöndərənlərin tələbatları bizə bu yolun yeni hissələrinin inşa edilməsinin zəruriliyini diktə edir ki, biz bu yolda yük daşımalarını artıra bilək və bununla Şimaldan Hind okeanına unikal nəqliyyat yolunu təmin edək”.
Görünər odur ki, yeni dəmir yolunun çəkilməsinə ciddi iqtisadi zərurət var. O baxımdan ekspertlər bunu necə dəyərləndirir?
“Həqiqətən də yeni dəmir yolunun inşa edilməsinə zərurət var”
Sözügedən məsələni “Bakı-Xəbər”ə şərh edən millət vəkili Vüqar Bayramovun fikrincə, prinsipcə buna ehtiyac var: “Şimal-Cənub” nəqliyyat dəhlizi bütövlükdə Rusiyadan Hindistana qədər yüklərin daşınmasına imkan verir. Azərbaycan bu dəhlizə töhfə verən ölkələrdəndir. Nəzərə almaq lazımdır ki, bu, şimal ölkələri ilə dünyanın fərqli coğrafiyasının nəqliyyat dəhlizi vasitəsi ilə birləşməsinə imkan yaradıb. Eyni zamanda, təbii ki, Azərbaycanın həm beynəlxalq yükdaşımalardan əldə etdiyi gəlirin həcminin artmasına, həmçinin geosiyasi və geoiqtisadi mövqeyinin daha da güclənməsinə xidmət edir. Azərbaycan bütövlükdə regionda nəqliyyat dəhlizlərinin genişlənməsinə və inkişafına töhfə verən ölkələrdəndir. Bu konteksdə “Şimal-Cənub” nəqliyyat dəhlizi də Azərbaycan üçün vacib layihələrdəndir və ölkəmiz bu istiqamətdə praktik olaraq öz töhfəsini davam etdirir. Bu, eyni zamanda region üçün yeni bir imkandır və artıq “Şimal-Cənub” nəqliyyat dəhlizinin genişləndirilməsi, bu dəhliz vasitəsilə daha çox yüklərin daşınması mümkün olacaq. Bu, həm regional, həm də müasir çağırışlar baxımından yeni zərurətə çevrilib. O üzdən, həqiqətən də yeni dəmir yolunun inşa edilməsinə zərurət var. Çünki bu dəhliz vasitəsilə böyük həcmdə yüklərin daşınması həyata keçiriləcək və bu daşımalar ilbəil artacaq”.
Vidadi ORDAHALLI
