Rusiya mediası İlham Əliyevin səfərinə həmişəkindən isti yanaşdı...
Şakir Ağayev: “Rusiya mətbuatında Azərbaycan Prezidentinin səfərinə bu cür isti münasibət sərginlənməsi müsbət tendensiyadır”
Rusiya mediası Prezident İlham Əliyevin bu ölkəyə işgüzar səfərinə və Rusiya Prezidenti Vladimir Putinlə görüşünə geniş diqqət ayırıb. Bu xəbərlərdə ölkələrimiz arasında münasibətlərin inkişafı baxımından bu görüşün mühüm əhəmiyyət daşıdığı xüsusi vurğulanıb.
TASS Agentliyində yer alan xəbərdə Azərbaycan Prezidenti İlham Əliyevin Kremldə rusiyalı həmkarı Vladimir Putinlə görüşünün iki dövlət arasında münasibətlərin inkişafına yeni təkan verəcəyinə əminlik ifadə olunur.
“RİA Novosti”, “Moskovski Komsomolets” nəşrləri Rusiya Prezidenti Vladimir Putinin Azərbaycan Prezidenti İlham Əliyevlə görüşdə Ümummilli Lider Heydər Əliyevin Baykal-Amur Magistralının tikintisinə mühüm töhfə verməsi barədə fikirlərini diqqətə çatdırıb.
“İnterfaks” nəşrinin xəbərində Rusiya Prezidenti Vladimir Putinin Azərbaycan Prezidenti İlham Əliyevlə görüşdə təhlükəsizlik məsələləri, ikitərəfli münasibətlər və bir sıra digər mövzularda müzakirələr aparılacağını bildirdiyi qeyd olunub.
“News.ru” hər iki ölkə prezidentinin bu il yenidən ali dövləti vəzifəyə seçildikdən sonra ilk dəfə görüşdüklərini xüsusi vurğulayıb. “Onların daha əvvəl başladıqları işləri davam etdirəcəkləri gözlənilir. Politoloqlar hesab edir ki, Ermənistan-Azərbaycan sərhədinin delimitasiyası məsələsində ümidverici irəliləyişdən sonra Moskva və Bakı Cənubi Qafqazda yeni geosiyasi reallıqda münasibətlərin inkişaf perspektivlərini müzakirə etmək niyyətindədir”, - nəşrdə yayımlanan xəbərdə qeyd olunub.
“Arqumentı i faktı” nəşri də yazır ki, Rusiya Prezidenti Vladimir Putin Ümummilli Lider Heydər Əliyevin Baykal-Amur Magistralının tikintisinə verdiyi töhfəni xatırladıb. Nəşr qeyd edib ki, Vladimir Putin Heydər Əliyevin SSRİ dövründə BAM-ın tikintisi ilə bağlı məsələlərə birbaşa nəzarət etdiyini və Rusiyanın buna görə ona minnətdar olduğunu vurğulayıb.
“Qazeta.ru” portalı Azərbaycan Prezidenti İlham Əliyevin “Rusiya Qafqazda və daha geniş coğrafiyada regional təhlükəsizlik üzrə əsas ölkədir” fikrini xüsusi vurğulayıb. “Bu gün iki dövlət başçısı Rusiya və Azərbaycanı birləşdirəcək Şimal-Cənub Beynəlxalq Nəqliyyat Dəhlizi layihəsini müzakirə etməyi planlaşdırır. Eyni zamanda, Azərbaycan liderinin fikrincə, bu dəhliz yükdaşımaların təhlükəsizliyinin təmin olunması üçün mühüm əhəmiyyət kəsb edir”, - deyə Rusiya nəşrinin xəbərində bildirilib.
“Ren.tv”də yer alan xəbərdə Prezident Vladimir Putinin Rusiya ilə Azərbaycan arasında ticarət dövriyyəsinin artmasını xüsusi vurğuladığına diqqət çəkilib. “Onun sözlərinə görə, bu rəqəm 4 milyard dollardan çoxdur. Bundan başqa, Rusiyanın yatırdığı 6 milyard dollarlıq sərmayə Azərbaycan iqtisadiyyatının bir hissəsini təşkil edir”, - deyə telekanalın xəbərində qeyd edilib.
“Sübut olundu ki, Azərbaycan öz müstəqil, stabil və uğurlu xarici siyasəti ilə regionda Rusiyanın etibar etdiyi ən yaxın tərəfdaş ölkələrdən biridir”
Azərbaycan Prezidentinin Rusiyaya işgüzar səfərinə Rusiya mediasının geniş yer ayırmasının səbəblərini şərh edən “Novoye Vremya” qəzetinin baş redaktoru Şakir Ağayev “Bakı-Xəbər”ə bildirdi ki, bu qətiyyən təsadüfi sayıla bilməz və Azərbaycan-Rusiya əlaqələrinin çox yüksək səviyyədə inkişaf etdiyinin göstəricilərindən biridir. “Prezident İlham Əliyevin Rusiyaya işgüzar səfərinə bu ölkənin mediasının geniş yer verməsi təbii qarşılanmalıdır. Birincisi, İlham Əliyevin Rusuya səfəri Azərbaycanın indiki diplomatik qələbəsindən sonra gerçəkləşib. Bu səfər sülhməramlıların Qarabağdan çıxmağa, eyni zamanda Ermənistanla delimitasiya prosesinin ilk mərhələsinin uğurla başlanmasından, Azərbaycanın işğalda olan 8 kəndindən 4-nün bir güllə atılmadan geri qaytarılması barədə razılığa gəlinməsindən sonra baş tutub. Bundan əlavə, dünyada gedən mürəkkəb proseslər, Rusiyanın dünya nizamında oynadığı rol, bu ölkənin dünya nizamının birqütblülükdən çoxqütblülüyə dəyişməsində əsas faktor olduğu bir vaxtda, eyni zamanda rus-Ukrayna müharibəsinin, Yaxın Şərqdəki savaşın hələ davam etdiyi və başqa bu cür proseslərin fövqündə Azərbaycan Prezidenti Rusiyaya səfər edib. Bilirsiz ki, İlham Əliyev Baykal-Amur Magistralının 50 illiyi ilə bağlı çox mühüm bir tədbirə dəvət edilmişdi. Bu magistralın tikintisində o dövrdə SSRİ Nazirlər Soveti sədrinin birinci müavini olmuş Heydər Əliyevin böyük rolu olub, o bu komissiyaya sədrlik edib. Heydər Əliyevin bu magistralın əsrəyə gəlməsində müstəsna rolu vardı.
Rergionda gedən bugünkü proseslər göstərdi ki, Rusiyanın daim özünə müttəfiq saydığı, daim ondan aslı olan Ermənistan heç də etibarlı müttəfiq deyil, onun çətiri altından çıxıb Qərbin, Avropa Birliyinin çətiri altına düşmək istəyir. Gürcüstanla da vəziyyət məlumdur. Sübut olundu ki, Azərbaycan öz müstəqil, stabil və uğurlu xarici siyasəti ilə regionda Rusiyanın etibar etdiyi ən yaxın tərəfdaş ölkələrdən biridir. Bundan başqa, Azərbaycan Prezidentinin də qeyd etdiyi kimi, nəinki Cənubi Qafqazın, eləcə də dünyanın təhlükəsizliyində Rusiya fundamental bir ölkədir. Prezident vurğuladı ki, Cənubi Qafqazın təhlükəsizliyinin təminatı Rusiyadan aslıdır”-deyə Ş.Ağayev bildirdi.
Ş.Ağayevin sözlərinə görə, Rusiya da çox yaxşı anlayır ki, təhlükəsizlik təminatının olması, regionda stabilliyin qorunmaı çox əhəmiyyətlidir. “O region ki, bu gün Rusiya üçün çox böyük əhəmiyyət kəsb edir. Yəni söhbət Cənubi Qafqazdan gedir. Biz bilirik ki, ABŞ başda olmaqla, Qərb dövlətləri Rusiyaya qarşı Ukrayanadan sonra ikinci cəbhə açmağa cəhd ediblər. Bu Gürcüstanda alınmadı. Rusiya bilir ki, bunu Ermənistan vasitəsilə etmək istəyirlər. Azərbaycan müstəqil, stabil uğurlu siyasət aparan bir dövlət kimi, təbii ki, buna imkan vermir. Rusiya anlayır ki, Cənubi Qafqazın təhlükəsizliyi Azərbaycandan çox asılıdır, Azərbaycan bunun təminatçısı ola bilər”.
Ş.Ağayev vurğuladı ki, iki ölkənin liderlərinin münasibətləri çox yüksək səviyyədədir, Əliyevin və Putinin görüşdə istinad etdiyi 2022-ci ildə imzalanmış müttəfiqlik bəyannaməsi var, Rusiya və Azərbaycan arasında ticarət dövriyyəsi 4 milyard dollara çatıb, 6 milyard dollar həcmində Rusiya ölkəmizə sərmayə qoyub. “Ən əsası da, bu gün Rusiya və Azərbaycan üçün çox əhəmiyyətli olan Şimal-Cənub Beynəlxalq Nəqliyyat Dəhlizi və “Zəngəzur dəhlizi”dir. İndiki sanksiyalar dövründə “Zəngəzur dəhlizi” Rusiyanın maraqlarına çox uyğundur. Təbiidir ki, bu bizim maraqlarımıza da tam uyğundur. Bu proseslər - Cənubi Qafqazda gedən və hələ də sona çatmayan böyük güc dövlətlərinin, maraqlı oyunçuların regionda maraq müharibəsi çərçivəsində Azərbaycan kimi bir ölkənin rəhbərinin Rusiyaya səfəri və bu ölkənin prezidenti ilə danışıqları, təbii ki, Rusiya dövləti üçün çox önəmlidir. Rusiya mətbuatında Azərbaycan Prezidentinin səfərinə bu cür isti münasibət sərginlənməsi müsbət tendensiyadır. Çünki əvvəllər biz həmişə Rusiya mətbuatını ittiham edirdik ki, Azərbaycana qarşı birtərəfli mövqe tutulur, Azərbaycanın haqq işinə yer verilmir. Amma bu gün tarix hər şeyi yerinə qoydu və Azərbaycan Prezidentinin səfərinə çox böyük diqqət ayrılır. Hesab edirəm ki, bundan sonra da bu ənənə davam edər” - deyə Ş.Ağayev əlavə etdi.
İradə SARIYEVA
