Bölgələrimizdə uşaq doğumları xeyli azalıb - səbəb?
Fatimə Hacıbəyli: “Savadlı, öz büdcəsinə əmin olan insan neçə uşaq dünyaya gətirəcəyinə də özü qərar verir”
Son illərdə dünyada demoqrafık qocalma tendensiyası müşahidə edilir. Əhalinin qocalması həm də yeni doğulanların sayının azalması ilə əlaqədardır. Ölkəmizə gəldikdə, bu il doğulan uşaqların sayı azalıb. Belə ki, yanvar-fevral aylarında Ədliyyə Nazirliyinin rayon (şəhər) qeydiyyat şöbələri tərəfindən 17 min 81 doğulan körpə qeydiyyata alınıb.
Ötən ilin eyni dövründə isə ölkədə 19 min 158 körpə doğulub. Bu da doğulan körpələrin sayının azalması deməkdir. Rəqəmlərə baxdıqda ilbəil daha az körpənin doğulduğunu görmək mümkündür.
“Ölkədə əhali azalanda ölkəyə daxil olan miqrantların sayı artır, miqrantlar isə etnik tərkibin dəyişməsinə səbəb olur”
Sosioloq Fatimə Hacıbəyli “Bakı-Xəbər”ə açıqlamasında qeyd etdi ki, çoxuşaqlı ailələrin azalmasının səbəbi maddi-iqtisadi durumla daha çox bağlıdır: "Cəmiyyətdə iqtisadi-sosial durum zəiflədikcə, dünyaya gələn uşaqların da sayı azalır. Bu gün hər bir valideyn düşünür ki, övladı dünyaya gələndən sonra onu necə saxlayacaq. Cəmiyyət daha əvvəlki kimi deyil. Əvvəllər ailələrdə 6-7 uşaq dünyaya gəlirdi, balaca uşaqlara böyüklər baxırdılar. Uşaqlar çox nadir hallarda küçələrə buraxılırdı, məcburi əməyə cəlb edilirdi. Amma indi vəziyyət dəyişib. Savadlı, öz büdcəsinə əmin olan insan neçə uşaq dünyaya gətirəcəyinə də özü qərar verir. Düşünürəm ki, bu yaxşı haldır. Hər kəs baxa biləcəyi, təmin edə biləcəyi qədər övlad dünyaya gətirməlidir”.
Sosioloq ölkədə əhalinin sayının azalmasının mənfi nəticələri olduğunu da dilə gətirdi. Onun dediyinə görə, ailədə bir uşaq varsa, bu zaman həm ölkədə əhalinin sayı sürətlə azalır, həm də evdə uşağın ev mühiti olmur. Uşağın evdə ünsiyyətdə olduğu adamlar yalnız ata-anası, nənə-babası olur: “Bu zaman həmin uşaq məhz uşaq kimi formalaşa bilmir, onda böyük komplekslər yaranmağa başlayır. Evdə iki uşaq olanda yenə də əhalinin sayı artmır. Çünki bəzən heç evlənməyən insanlar olur. Həmçinin iki uşaq olanda onlar daim bir-biri ilə konfliktdə böyüyürlər. Üç uşaq olanda isə evdə əsl uşaq mühiti olur, eyni zamanda ölkədə əhalinin artımı normal tənzimlənir. Həmçinin, ölkədə əhali azalanda ölkəyə daxil olan miqrantların sayı artır. Miqrantlar isə etnik tərkibin dəyişməsinə səbəb olur”.
F.Hacıbəyli hesab edir ki, çoxuşaqlı ailə modelini stimullaşdırmaq üçün sosial müdafiə paketləri gücləndirilməlidir: “Sosial müdafiə paketi deyiləndə, illərdir deyilən uşaq pulundan söhbət gedir”.
Günel CƏLİLOVA
