Bəs deyirdiniz AXC-nin çıxardığı rus ordusunu İlham Əliyev yenidən qaytardı?!
Xəbər verdiyimiz kimi, Qarabağda müvəqqəti yerləşdirilən Rusiyanın sülhməramlı kontingenti Azərbaycanı nəzərdə tutulan vaxtdan əvvəl tərk edir. Artıq bu xəbər hər iki ölkənin rəsmiləri tərəfindən də təsdiqlənib.
Ölkə daxilindəki bəzi radikal dairələr, eyni zamanda ölkədən xaricdə olan anti-Azərbaycan qüvvələri içərisində yer alan antimilli şəxslər Rusiya sülhməramlılarının Azərbaycana gəlişini, az qala, ölkəmizin rus qoşunları tərəfindən işğalı kimi dəyərləndirirdilər. Onlar elə güman edirdi ki, Rusiya sülhməramlıları burada əbədi qalacaq, ən müxtəlif bəhanlərlə Rusiya burada özünün hərbi bazasını yenidən bərpa edəcək. Lakin Müzəffər Ali Baş Komandan İlham Əliyevi tanıyanlar, onun fəaliyyətini diqqətlə izləyib, onun fəaliyyətinə, şəxsi keyfiyyətlərinə obyektiv qiymət verən hər bir kəs bilirdi ki, bu mümkün olmayacaq. Çünki ölkə Prezidenti bir problemi həll edib, ikinci problemi Azərbaycan xalqı üçün qoymayacaq.
Artıq bu proses baş verdi, ancaq “AXC- nin çıxardığı rus ordusunu İlham Əliyev yenidən qaytardı” tezisini əllərində bayraq edənlərdən nəsə səs çıxmır.
Gəlin, konkret faktlara diqqət edək və görək ki, kimlər çıxıb ən azından buna görə üzr istəməlidir?
Demokratik Qüvvələrin Milli Şurasının sədri Cəmil Həsənlinin aprelin 21-də Bakıda mitinq keçirilməsi ilə bağlı müxalifətin qərarını necə şərh etdiyinə diqqət edək. Cəmil Həsənli deyir:
“Faktiki olaraq, ermənilər Azərbaycan ərazisini tərk edəndən sonra Rusiya ordusunun Azərbaycanda qalmasının anlamı nədir? Hökumət bunun normal izahını verməlidir. Bir müddət uydurdular ki, onlar guya ermənilərdən müsadirə olunan silahları saxlayırlar. Guya bu silahları saxlamağa Azərbaycanın hansısa bir batalyonu yoxdur? Bunu gərək hökmən rus kontingenti saxlasın? İndi də belə bir tezis ortaya atıblar ki, guya bu sülhməramlılar Xocalı və ətraf ərazilərdə minaların təmizlənməsi ilə məşğul olacaq. Əvvəla, mina təmizlənməsi üçün xüsusi hazırlığı olan yarımhərbi təşkilat lazımdır. Bizim bildiyimiz qədər, elə hamının bildiyi qədər bu kontingentdə xidmət edənlərin belə bir hazırlığı yoxdur. Yəni bunlar sülhməramlı kontingent adı ilə gəlib və onların funksiyası tamamilə başqadır. Bunlardan guya minatəmizləyən kimi istifadə etmək Azərbaycan hakimiyyətinin Azərbaycan xalqına dediyi yalanlardan biridir. Sadəcə, bu, rus qoşununu Azərbaycanda saxlamaq cəhdidir. Biz bunu ona görə mitinqin tələblərinə salmışıq ki, Azərbaycan hakimiyyəti izahat versin. Rus qoşununun Azərbaycanda qalma səbəbi aradan qalxdığı halda bu qoşunları niyə indiyədək ölkədə saxlayır? Bu, ölkənin təhlükəsizliyi ilə bağlı məsələdir”.
İndi Cəmil Həsənli gərək həm mitinqin gündəliyini dəyişə, həm də özündə cəsarət tapsa, bu dediklərinə görə üzrxahlıq edə. Ancaq hələ də onların susduğunun şahidi oluruq.
Başqa bir misal. Uzun illərdir ABŞ-da yaşayan jurnalist Sevinc Osmanqızının da “proqnozları” yenə özünü doğrultmadı. O, 2023-cü ildə çıxışlarının birində deyib ki, 2025-ci ildə Rusiya sülhməramlıları Qarabağdan çıxmayacaq. S.Osmanqızı bildirib ki, Rusiya qoşunları Moldovadan, Ermənistanddan, Gürcüstandan çıxacaq, amma Azərbaycandan çıxması mümkün olmayacaq. O deyib ki, əgər ruslar Qarabağdan çıxsa, İlham Əliyevə “bravo”, “Müzəffər” deyəcək.
Budur, Rusiya hərbi kontingenti Azərbaycanı tərk edir. S.Osmanqızının sözünü tutmaq vaxtı gəlib. Çıxıb efirdən İlham Əliyevə Müzəffər ali Baş Komandan desin.
Azərbaycana düşmənçilik edənlər növbəti dəfə yanıldıqlarının fərqindədirlər. İlham Əliyevi Qarabağı ruslara satmaqda suçlayanlar, Azərbaycan dövlətinə şər atanlar darmadağın edildi.
Ən azı, bu reallıqları ifadə etməyə adamda siyasi mədəniyyət və verdiyin sözə sahib çıxmaq kimi keyfiyyət olmalıdır. Yaranan susqunluq bunu deməyə əsas verir ki, hakimiyyətə opponentlik edən dairələr bu keyfiyyətləri də lazımınca əxz etməyib. Ölkəmizin suverenliyini tam təmin etməsi, heç bir ölkənin hərbçilərinin ərazimizdə qalmaması yalnız hakimiyyətin deyil, həm də dövlətimizin böyük uğurudur. Dövlətin uğuru isə həm də müxalifəti sevindirməlidir. Təəssüf ki, bunu görmürük…
Məhəmmədəli QƏRİBLİ
