Brüssel formatının ardınca Buriç də Paşinyanın mifik “Sülh kəsişməsi”ni dəstəklədi…
Elçin Qurbanov: “Əsl sülhə xidmət edən layihələrin adını Avropa rəsmiləri də, Paşinyan da yaxşı bilir”
Baş nazir Nikol Paşinyan Avropa Şurasının baş katibi Mariya Peyçinoviç-Buriçi qəbul edib.Görüşdə Ermənistan-Avropa Şurası 2023-2026-cı illər üçün Fəaliyyət Planının icrası və demokratik siyasətin gündəliyinin həyata keçirilməsi istiqamətində atılan addımlara toxunulub.
Avropa Şurasının baş katibi səmimi qəbula görə minnətdarlığını bildirib və Avropa Şurası ilə Ermənistan Respublikası hökuməti arasında sıx əməkdaşlığın, o cümlədən Ermənistan Respublikasında institusional islahatların həyata keçirilməsi kontekstində əməkdaşlığın vacibliyini vurğulayıb. Mariya Pejçinoviç-Buriçin sözlərinə görə, ölkə üçün çağırışlarla dolu bir dövrdə Ermənistan Respublikası hökuməti müxtəlif istiqamətlərdə islahatları səmərəli şəkildə həyata keçirir.
Regionda baş verən proseslər, Ermənistan-Azərbaycan münasibətlərinin nizamlanması prosesi, regional nəqliyyat infrastrukturunun blokdan çıxarılması imkanlarına toxunulub. Baş nazir Paşinyan Ermənistan hökumətinin “Sülh kəsişməsi” layihəsini və onun prinsiplərini təqdim edib. Avropa Şurasının baş katibi qeyd edib ki, “Sülh kəsişməsi” layihəsi Ermənistan-Azərbaycan sülh prosesi üçün mühüm ilkin şərt ola bilər.
Bu mifik layihə sülh üçün hansı uğurlu şərt rolunu oynaya bilər ki, onu Azərbaycan ümumiyyətlə qəbul etmir?
Ermənistan bu uğursuz layihəni üzərinə götürdüyü öhdəlikdən yayınmaq üçün Zəngəzur dəhlizinə alternativ kimi ortaya atıb. Bu ölkənin sülh sazişindən yayındığı, sərhədləri dəqiqləşdirməkdən boyun qaçırdığı bir zamanda hansı "Sülh kəsişməsi"ndən söhbət gedə bilər? Maraqlıdır ki, aprelin 5-də Brüsseldə keçirilən görüşdə də tərəflər bu layihəni dəstəkləmişdi. Avropa strukturlarının bir-birinin ardınca Paşinyanın bu mifik layihəsinə ifadə etdikləri dəstək nə ilə izah oluna bilər?
Ekspert Elçin Qurbanov “Bakı-Xəbər”ə açıqlamasında bildirdi ki, Ermənistanın uzun illərdir apardığı xarici siyasət ölkəni regiondakı bir sıra nəqliyyat layihələrindən kənarda qoyub: “Bu səbəbdən də baş nazir Nikol Paşinyan “Sülh kəsişməsi” layihəsini ortaya atıb. Əslində, bu layihə uzun müddətdir heç kəsin üzünə belə baxmadığı “erməni qovşağı”nın adı dəyişdirilmiş formasıdır. Paşinyan komandası layihənin reallaşa bilmə analizini aparmaqdansa, onun reklamı ilə məşğul olmağı üstün tutub. Amma bu, sadəcə daxili auditoriya üçün hesablanmış şoudan başqa bir şey deyil. Təsadüfi deyil ki, uzun müddət qoltuğunda xəritə ilə Avropanı gəzən hökumət üzvləri heç bir müsbət rəy və təklif ala bilmədilər. Qərbdən istədiyi dəstəyi ala bilməyən erməni siyasi elitası üzünü Hindistan və İrana tərəf çevirdi. Bir müddət əvvəl Ermənistan XİN başçısının müavini Mnatsakan Safaryan bildirib ki, təmsil etdiyi dövlət “Şimal-Cənub” və “Fars körfəzi-Qara dəniz” kimi regional və qlobal təşəbbüslərdə əməkdaşlığa böyük əhəmiyyət verir. Görünür, Avropa strukturları Ermənistanın könlünü almaq üçün bu layihəyə güyü önəm verdiklərini açıqlayırlar. Amma onların nə deməsindən asılı olmayaraq, Azərbayccan bu layihəni sabun köpüyünə bənzədirsə, “Sülh kəsişməsi” sülhün təməli ola bilməz. Əsl sülhə xidmət edən layihələrin adını Avropa rəsmiləri də, Paşinyan da yaxşı bilir. Bunun üçün Paşinyan Zəngəzur dəhlizinə icazə verməlidir. Sonra sərhədlərin müəyyənləşməsi ilə bağlı səmimiyyət ortaya qoymalıdır. Ardınca sülh sazişinə imza atmalıdır. Bax, sülhə doğru aparan “yol xəritəsi” budur. Avropa rəsmiləri doğrudan da sülh istəyirlərsə, zəhmət çəkib Paşinyanı götürdüyü öhdəlikləri yerinə yetirməyə məcbur etsinlər. Heç kimə lazım olmayan perspektivsiz və sərsəm idaeyanı böyük layihələrə alternativ kimi göstərməsinlər”.
Məhəmmədəli QƏRİBLİ
