Kreml Brüssel görüşünə kəskin bəyanatla cavab verdi - hələlik...
Tural İsmayılov: “Məlum bəyanat Moskvanın bu prosesdən ciddi narahatlıq keçirdiyini göstərir”
Rəsmi Moskva İrəvanı Qərbin onu aldatmasına və Ermənistanı yanlış yola salmasına imkan verməməyə çağırır. Bu barədə Rusiya XİN-in Ermənistan-ABŞ-Aİ formatında yüksək səviyyəli görüşlə bağlı bəyanatında deyilir.
“İrəvan rəhbərliyini Qərbin özünü aldatmasına və ölkəni təhlükəsizlik boşluğunun yaranması, iqtisadiyyatda ciddi problemlər və əhalinin xaricə axını ilə dolu olan yanlış yola yönəltməsinə imkan verməməyə çağırırıq”, - nazirlik vurğulayıb.
Bəyanatda qeyd edilir ki, Rusiya Ermənistan-ABŞ-Aİ görüşünü Qərbin Cənubi Qafqazı geosiyasi qarşıdurmaya sürükləmək üçün növbəti cəhdi kimi qiymətləndirir. Regiondankənar qüvvələrin Cənubi Qafqazın işlərinə dağıdıcı müdaxiləsi ən mənfi nəticələrlə nəticələnə bilər.
Qərb Ermənistanı Cənubi Qafqazda son dərəcə təhlükəli planlarını həyata keçirmək üçün alətə çevirmək istəyir: “Bizə məlumdur ki, Vaşinqton və Brüssel müvəqqəti vədlər altında Ermənistanın KTMT və Avrasiya İqtisadi Birliyindən çıxmasına, Rusiya hərbi bazası və sərhədçilərinin çıxarılmasına can atırlar. Cənubi Qafqazda həm regional, həm də ikitərəfli xarakter daşıyan problemli məsələlər 2023-cü il oktyabrın 23-də Tehranda keçirilən “3+3” Məşvərət Platformasının ikinci iclasında razılaşdırılan “regional məsuliyyət” prinsipinə uyğun olaraq həllini tapmalıdır”.
Bütün bu deyilənlərin fonunda, Rusiyanın bu cavab reaksiyasını necə dəyərləndirmək olar?
“Bütün bunlar Rusiya-Ermənistan münasibətlərində çatları və qırılmaları daha da dərinləşdirəcək”
Sözügedən məsələyə aydınlıq gətirən politoloq Tural İsmayılov “Bakı-Xəbər”ə açıqlamasında buna bir neçə aspektdən yanaşdı: “Məsələ ondadır ki, Rusiya Qərbin Ermənistan ərazisində oynadığı təhlükəli oyunların fərqindədir. Ona görə də ən kəskin formada bu prosesin əleyhinə bəyanatlar verir. Rusiya rəsmiləri Brüsseldə Aİ, ABŞ və Ermənistan arasında keçirilən üçtərəfli görüşdən əvvəl də kifayət qədər bu proseslə bağlı narahatlıqlarını ifadə etdi. Görüş keçiriləndən həmən sonra XİN-in bəyanat yayması da Moskvanın bu prosesdən ciddi narahatçılıq keçirdiyini göstərir. Çünki Rusiya fərqindədir ki, Ermənistan ərazilərində ikinci Ukrayna cəbhəsi açılır. Ermənistanda oynanılan təhlükəli ssenari birbaşa bütün region ölkələrini narahat edəcək bir məsələ olmalıdır. Xüsusən də burada Rusiyanın əleyhinə nə qədər təhlükəli bir ssenarinin qurulduğunun fərqindədilər. Qərb bu gün istəyir ki, təkcə silah təchizatı baxımından deyil, bir çox digər sahələrdə Ermənistanın Rusiyadan asılılığı sona çatsın. Daha əvvəl Fransa Ermənistanı silahlandıraraq bu ölkənin müdafiə sənayesi bazarında Rusiyanın rolunu kiçiltməyə çalışdı. İndi isə Ermənistana müxtəlif iqtisadi yardımlar və vədlər verərək bu ölkədə Rusiyanın mövcudluğini tamamilə bloklamaq, azaltmaq istəyir. O baxımdan hesab edirəm ki, Rusiyanın bu cavab reaksiyası indiki məqamda kifayət qədər dolğun və sərt idi. Əslində bununla bağlı İran da çox kəskin və sərt mövqe ortaya qoymalı idi. Ancaq çox təəssüflər olsun ki, bugünə qədər İran tərəfindən Ermənistandakı hakimiyyətin Qərb imperialistləri ilə oynadığı təhlükəli oyunla bağlı hansısa bir kəskin reaksiya verilmir. Nəticədə İran bütün regionun siyasətində də nə qədər qeyri-səmimi olduğunu göstərmiş olur. Bütün bunlar Rusiya-Ermənistan münasibətlərində çatları və qırılmaları daha da dərinləşdirəcək”.
Vidadi ORDAHALLI
