“Brüssel görüşü Azərbaycana qarşı deyil" fikri yalan çıxdı...
Elşən Mustafayev: “Belə sövdələşmələr, bizimlə yanaşı, bütöv regionu da gərginliyə sürükləyir”
ABŞ dövlət katibi Entoni Blinken və Avropa Komissiyasının sədri Ursula Fon der Lyayen Brüssel görüşü öncəsi Azərbaycan Prezidentinə zəng edib əmin etmək istəyirdilər ki, Ermənistanla bağlı həyata keçirilməsi nəzərdə tutulan tədbirlər Azərbaycana qarşı yönəlməyib.
Görüş yekunlaşdı, bizə söz verənlərin səmimiyyətinə inanmaq olarmı və Azərbaycan tərəfi bizə qarşı hansısa razılaşmanın əldə olunmadığına əmin ola bilərmi?
Siyasi şərhçi Elşən Mustafayev “Bakı-Xəbər”ə açıqlamasında bildirdi ki, üçtərəfli sammitdə tərəflər Ermənistana gələcək 4 il üçün maliyyə yardımı edilməsi barədə artıq razılığa gəliblər: “Ermənistan mətbuatının yazdığına görə, konfransda Nikol Paşinyan bu səylərin mənzil və iqtisadi siyasət vasitəsilə “Dağlıq Qarabağdan” olan qaçqınların layiqli həyatının təmin edilməsinə yönəldiyini bəyan edir. Lakin Prezident İlham Əliyevin də bildirdiyi kimi, üçtərəfli görüşün qeyri-şəffaf hazırlanması, qeyri-inklüziv xarakter daşıması fonunda əminliklə demək olar ki, ayrılacaq vəsait yalnız dinc məqsədlərə xidmət etməyəcək. Heç şübhəsiz, məhz bu yardımlar hesabına Qərb Ermənistanı Cənubi Qafqazda bir silahlı forpost kimi yaratmaq niyyətindədir. Bu bir daha göstərir ki, Azərbaycan sammitin regionda gərginliyə xidmət etməsi və gələcəkdə çox böyük fəsadlar törədəcəyi barədə mövqeyində nə qədər haqlıdır.
Üçtərəfli görüşün təşkilatçıları nə qədər iddia etsələr də ki, məqsədləri Ermənistanın iqtisadi təhlükəsizliyinin təmin olunması ilə bağlıdır, atdıqları addımlar, verdikləri bəyanatlar və Ermənistanı davamlı şəkildə silahlandırmaları əsl hədəflərinin fərqli olduğuna işarə edir. Ermənistanı Cənubi Qafqazda özlərinin hərbi forpostuna çevirmək istəyənlər guya bilmirlər ki, son 30 ildə Ermənistanın yeganə hərbi hədəfi məhz Azərbaycan olub? Yaxud guya biz bilmirik və ya görmürük ki, müxtəlif bəhanələrlə sülh müqaviləsini imzalamaqdan yayınan Ermənistanın iqtisadi cəhətdən təhlükəsizliyinə verilən xarici “töhfə və qrantlar” həm də onun hərbi potensialının gücləndirilməsinə yardım etmək deməkdir? Təbiidir ki, bütün bunların Azərbaycana birmənalı ziyanı var. Belə sövdələşmələr, bizimlə yanaşı, bütöv regionu da gərginliyə sürükləyir. Qonşu ölkələrin verdikləri rəsmi reaksiyalardan doğan narahatlıqlar bunu təsdiqləmiş olur”.
Lakin bir şeyi unudurlar: qarşılarında qüdrətli və torpaqlarını cəmi 44 günə azad edən güclü Azərbaycan dövləti dayanır. Heç bir qüvvə, heç bir dövlət onun nə müstəqilliyini əlindən almaq iqtidarındadır, nə də dövlət-xalq birliyini poza bilər. Ermənistan isə havadarlarının sözünə baxarsa, 44 günlük müharibənin nəticəsində olduğu kimi, yenə də biabırçı məğlubiyyətlə üzləşəcək.
Məhəmmədəli QƏRİBLİ
