Brüsseldə məxfi razılaşmalara dair ciddi şübhələr var...
Azər Həsrət: “Ola bilər ki, bununla bağlı hansısa ümumi fikir mübadiləsi aparılıb”
Brüsseldə ABŞ Dövlət katibi Entoni Blinken, Avropa Komissiyasının Prezidenti Ursula fon der Lyayen və Ermənistanın baş naziri Paşinyan arasında görüş başa çatsa da, onun nəticələri hələ uzun müddət müzakirə olunacaq.
Görüş, gözlənildiyinin əksinə olaraq sönük olmaqla yanaşı, beynəlxalq diqqəti özünə cəlb etməyib. Yəni Ermənistanın təqdim etdiyi kimi ajiotaj doğurmayıb.
Ümumilikdə, Avropa İttifaqının, ABŞ-ın Ermənistana maliyyə yardımı ayırması xaric, konkret razılaşmalarla bağlı ortada bir məlumat yoxdur. O baxımdan hesab etmək olarmı ki, sözügedən görüşdə çox ciddi məxfi razılaşmalar var, amma hələ bunu açıqlamırlar? Yəni gözləntiləri sakitləşdirmək üçün əldə olunmuş razılaşmaları gizlədirlər. O üzdən, belə bir ehtimal varmı?
“Düşünmürəm ki, çox da gizli məsələlər müzakirə edilib və bununla bağlı hansısa qərar qəbul olunub”
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Azər Həsrət məsələyə müxtəlif prizmadan yanaşdı: “Düşünmürəm ki, çox da gizli məsələlər müzakirə edilib və bununla bağlı hansısa qərar qəbul olunub. O ola bilər ki, bununla bağlı hansısa ümumi fikir mübadiləsi aparılıb. Təhlükəsizlik məsələləri, Azərbaycanla münasibətlərin müzakirə mövzusu olması ehtimalı böyükdür. Zatən Azərbaycanla münasibətlərin normallaşmasının vacibliyi müzakirə mövzusu olub. Ancaq Ermənistana hərbi yardımlar edilməsi və onun Azərbaycana qarşı silahlandırılması, gücləndirilməsi məsələlərini müzakirə edib bir gizli qərar qəbul olunmasını güman etmirəm. Niyə? Ona görə ki, Birləşmiş Ştatlar NATO-nun bir nömrəli dövlətidir və Türkiyə ilə eyni hərbi alyansda olduğuna görə belə addıma getməz. Üstəlik, gedə də bilməz. İkincisi, Avropa İttifaqı Azərbaycanla enerji tərəfdaşlığı çərçivəsində fəaliyyət göstərir. Təbii ki, belə bir şəraitdə açıq-açığına qurum ölkəmizə qarşı hərbi addımlar atmaz. O baxımdan Ermənistanın Aİ və ABŞ-la hansısa məxfi hərbi mahiyyətli müzakirə aparıb qərar qəbul etməsi imkanları yoxdur. Maliyyə yardımları haqqında danışılır və biz bunun əleyhinə deyilik. Əlbəttə ki, Ermənistana, Azərbaycana, başqa dövlətlərə bu yardımlar edilə bilər. Xüsusən bizim üçün diqqət çəkən məqam ondan ibarətdir ki, orada Qarabağ ermənilərinin Ermənistan cəmiyyətinə inteqrasiyasının sürətləndirilməsi üçün maliyyə yardımından söhbət gedir. Biz bunun da əleyhinə deyilik. Əksinə, lehinəyik. Çünki Qarabağ erməniləri nə qədər tez Ermənistan cəmiyyətinə inteqrasiya olunsalar, bu həm ermənilərin, həm də bizim xeyrimizədir. O baxımdan narahat deyilik. Əksinə, bunun yaxşı bir addım olduğunun fərqindəyik. Yəni ümumi götürəndə ABŞ və Aİ bu üçlü görüşmə ilə faktiki olaraq Azərbaycanın ciddi narahat ola biləcəyi səhvə yol verməyib. Bu görüşdən əvvəl Azərbaycan Ermənistanla hərbi pakt imzalana biləcəyi ilə bağlı həyəcan təbili çalırdı. Artıq o həyəcan arxada qalıb və hər hansı hərbi paktdan söhbət getmir. Təbii ki, ABŞ, Aİ Azərbaycanla münasibətlərə dəyər verdikləri üçün həddi aşacaq qərarlara yol vermədilər”.
Vidadi ORDAHALLI
